يا ناجحين .. شو هالموكب !

بقلم : حكمت محمود البشير
من المؤكد أننا نعيش أجواء التخريج والنجاح وما رأيته من مشاهدة تقود إلى الجنون لأن ما فيها ليس معقول في ظل الأوضاع الاقتصادية التي نعيشها، ولا أدري قد يكون في مجتمعنا مبالغات أكثر مما شاهدته وفعلا إنه مثل ما قال المثل :اضرب حتى توجع ، واطعم حتى تشبع ... تابعوا
أبو حمدان يستيقظ من قيلولته على أصوات بييييييييييب طووووووووووط طاططططط وزوامير اشي صوت بقرة واشي صوت عصفور ، واشي صوت إطفائية .... الكل ماشي بنفس الفاردة وتعال اتفرج الشارع مسكر ، وسيارة (الكومبريصر )المستأجرة راكب بيها الخريج والطاقية طايرة مشان السبايكي ما يخرب ، وسيارة التصوير قدام ، والقرايب مصنفين حسب الدرجة اللي من الدرجة الخامسة بالباصات واللي من الأولى بالسيارات الغير شكل أما الصحاب كثار ومن هون تعالوا شوفوا نظمي اسم عمسمى ولما بيصلوا بتلاقيهم الفزيعة للفرح ما شاء الله (بالكلاشينات ) ( والمسدسات ) وطاط طيط والمضحك أكثر إنه ما بيه صبر الألعاب النارية بعز النهار كل مجموعة بخمسين دينار هاه كيف هاظا؟ نظمي تخرج ؟!
أبو حمدان : وين حمدان خليه يلبس مشان نروح عالجيران.
حميدة : يابه حمدان ما بتفوته فايته ...زمان سبقك.
أبو حمدان : اندهي يابه على عمك أبو سالم .... بروحوا مع بعض عالتخريج.
أبو حمدان : بقعد بوجه الصيوان برصد الأحداث وأبو سالم مش عاجبه إشي.
أبو سالم : قال بقولوا البلد طفرانه ... والحكومة بتقول إحنا تصرفنا هيك مشان ولادنا ما يدفعوا الثمن ... وليش هوه فكرك همه العقب هاظا سائل لا عنده ولا عند باله .
أبو نظمي : هلا بالحبايب وعينك ما تشوف إلا... الدله تسكب عالفنجان وبهارها جوزة الطيب ولا الكنفجي رابط باب الدار بعجن بهالكنافة مشان تسري وتمري. مشربه بالسمنة البلقاوية.
أبو حمدان : أبيه يا يابه حميدة بالتوجيهي جابت معدل غير شكل ورحت أنا أسويلها لزاقيات شوف بعينك... أبو سالم : يعني انته شايف إشي عاجبك ... أبو حمدان : إن الله يحب أن يرى أثر نعمته على عبده ، ... أبو سالم : مهوه أبو نظمي مشنشل بالدين مثل ما يشنشلوا العروس بالذهب الروسي (صلاة النبي ) إذا هيك بالتخريج ؟ كيف لعاد بالعرس لنظمي أفندي .؟
أبو حمدان : يا زلمه ما تدق كثير خلي الناس تفرح أي هوه انته دافع إشي من جيبتك خليك قاعد واتفرج.. نظمي بده يسلم عالناس عيمنه بيه نقوط.. نظمي : أهلين أنكل أبو حمدان عؤبال حمدان... معزب حالك عموه أبو سالم والله ما فيه داعي (تنقطني خمس ليرات ) ميرسي لإلك كتير.. بدكوا ما تواخزوني بدي روح لعند الدبيكه مشان هلأ بدهن يحملوني لفوؤ ويلئفوني إتلعوا عليه هلأ .... سي يو أنكل وويل كم بيكوا .......
أبو سالم : هاية هيه الجامعة الشب بدال ما يكون زلمه وخشن صاير مثل الفراطة بتطعوج
أبو حمدان : شو بدك تسوي انته بدك تعمر الكون تعال خلينا نشوف كيف بدهم يلئفوه ويزموه هاهاهااههههههههههه ، والله يا ابو سالم اخر زمن الله يكون بعونك يا ابو نظمي على ابنك انعوج لسانه ، قال بلئفوني ... يلقفه المحق انشالله !!
أبو نظمي : بهلي وبرحب وبقرب من الحبايب وبقعد.
أبو حمدان : شايف إنه كل إشي عاجبه أبس صاب أبو سالم الفضول وصار بده يسأل أبو نظمي ..أبو سالم : يا ريته صبار بركة ... شو ناوي يسوي نظمي هسا بعد التخرج.
أبو نظمي : بصراحة تخصصه مش ولا بد (تربيه مهنيه ) وبعدين إذا قدم لديوان الخدمة المدنية هاظا التخصص ما عليه طلب ، وحتى ما في وظائف اصلا الا بواسطه ... ولا تنسى إنه معدله مش ولا بد... جايب (مقبول ) عكلن احتمال إنه يقعدله أكمن سنه بالدار يرتاح من القرايه والتعب ... وبعدين فرج إن شاء الله .
أبو سالم: منفعل.... كل هالطن والرن واشي فرقة ، وألف قنينة عصير وكنفجي رابط باب الدار والطخ شغال ، والألعاب النارية ، والحجاجي مكيسة وفوقهن عشا...وميه مفلترة ، وكراسي مخمل وصواوين ، وكل هاظا مشان مقبول عن جد إشي مش معقول صدق اللي قال الشعب الأردني هوه اللي إذا بضحك بتمزعن شدوقه عند الفرح وبتخزقن جيوبه ، ويا لطيف إذا بحزن ... الله يعدينا الشر بنعمن عيونه .... أشهد إنه حكي سليم.
أبو حمدان : بدون تعليق ... على حسبتك يا أبو نظمي قديش هاية الشوشرة تقريبا كلفتك خيوه؟
أبو نظمي: حط عندك كل اللي قاله أبو سالم وفوقية (بنزين سيارات الفاردة) كلفني بس 3000ألاف نيرة....أبو حمدان....أنا بصدق وغيري ما بصدق لأنه كله فتاش بالهوى مش لو إنك اعتدلت أحسنلك أقل ما بيها بظلن مصروف لنظمي بسنوات البطالة ....هاظا كيف لو تخرج بجيد مش مقبول فعلا كل اللي قاله أبو سالم معاه حق بيه هاظا فرح بجنون .. ويا ناس صلوا عالنبي
من صيوان أبو نظمي نقل لكم الأحداث أبو حمدان .... ومن دون كلام ... أترك لكم التعليق.

والى اللقاء مع يوميات ابو حمدان .... في موقع اخر

Hikmat_b@yahoo.com
0777406706