الشعور بالرهاب الاجتماعي

زاد الاردن الاخباري -

السلام عليكم
انا موظفة عمري 27 سنة،  مشكلتي هي الرهاب الاجتماعي وبعاني منه من وأنا بالمدرسة، يعني كنت احيانا ما اشارك بالصف مع اني عارفة الجواب، حالتي مش شديدة، انا عايشة حياتي بشكل طبيعي الحمدلله، عندي صحباتي و بروح وباجي، لكني بتحاشى كتير من المواقف اللي بتخليني محط انظار الناس.
 
في فترات يشتد علي الشعور بالرهاب وفترات  تانية بخف، وهادا كله حسب حالتي النفسية.
 
نفسي اتعالج من هادا المرض بشكل نهائي، لأنه احيانا بتظهر علي اعراض زي احمرار الوجه، التعرق، الرجفة، زيادة في ضربات القلب، بتخليني احس بالاحراج وبتظهرني زي الهبلة قدام الناس، وطبعا الناس بستغريوا مني.
 
كتير مرات بستحي احكي مع المدير او الموظفين، ما بقدر احكي قدام مجموعة من الناس، إلا إذا كنت بعرفهم منيح و متعودة عليهم، وغير هيك برتبك ووجهي بحمر، حتى لما يجيني عرسان عالبيت كتير بستحي لهيك باخد حبوب مهدئة قبل ما يجوا لحتى ما ارتبك و اكون على طبيعتي قدامهم.
 
نفسي اصير طبيعية 100 % و احكي مع مين ما بدي بكل جرأة وامام أي عدد من الناس.
 
انا عم بكتبلكم لأنه اكيد في منكم عانوا من نفس المشكلة، بدي اعرف كيف ممكن اشفى منه؟ في دكتور نفسي شاطر مجرب لهيك حالة وممكن يساعدني؟ مرّة سمعت عن عشبة بتشفي من هادا المرض، هل فعلا هالشي صحيح؟ بدي علاج فعلا مجرّب و نجح ومش بس نصائح.
وجزاكم الله الف خير.