البنت الكبيرة

زاد الاردن الاخباري -

اصدقائي
انا تعبانة نفسيا كتير ومش عارفة كيف اشرح مشكلتي لأنها من نواحي كثيرة وسببت لي ضغوطات من كل النواحي
انا فتاة ابلغ من العمر 30 عاما غير متزوجة لاني عايش ومش عايش شغلي كل حياتي ومقطوعة تماما عن العالم الخارجي حتى اني لما اخذ اجازة بعد 100 جاهة وبطلع على الشارع بحس حالي زي كأني كنت ميت من 10 سنوات ورجعت عالدنيا ولانو معي سيارة ساعدت في انعزالي اكتر
مشكلتي هي مع ابوي امي واخواني واخواتي ، عودت ابوي وامي اشاركهم مسؤولياتهم العائلية المادية والاجتماعية واكون طرف ثالث بكل شي يخصهم يعني كمسؤوليات عائلية انا كتير براقب اخواتي وبراقب تصرفاتهم وكتير بتخانق معهم لاي شي بحسه يضرهم لدرجة اني نسيت اني بنت زيي زيهم حتى تجربة العلاقات والحب تخليت عنها لاني بفكر فيهم مابدي اكون قدوة بهيك موضوع وحتى بعد ماتخرجو اخواتي كنت طرف بتوظيفهم، ماديا انا بدعم العائلة بالمصروف والاغراض المنزلية وبشاركهم ديونهم واجتماعيا انا سائق العائلة بكل مشاويرها
طبعا كل ماسبق اعمله عن حب وتعودت اشارك اهلي المسؤولية في كل شيء لاني الكبيرة ولاني بملك شخصية قوية تساعدهم يتكلوا علي في كثير امور
مع الايام ياأصدقائي صار الموضوع نقمة علي وبطريقة قاتله صرت احس اهلي بيرمو علي كل البيت ومشاكله وصرت بيوم وليلة ربة لاسرة كبيرة ونسيت اني بنت ونسيت نفسي واي وقت لازم استغله لاطلع واغير جو تعودوا اهلي انو ماألك حق احنا اولى وانتي لازم بأجازتك تكوني معنا
الي بدو يشتغل صار لازم الاقيله شغل الي عندو مشلكة لازم احاول احلها عنه الي عنده جامعة لازم اتابعه اول بأول وإذا حمل مادة بس انا الي لازم اعرف لانه لازم ادفع وانا ساكتة مابدي حد يزعل من حد و الي متزوجين من اخواتي لازم اعمل مشاويرهم الخاصة لانو زواجهم تعودوا انو انا احل محلهم في هيك امور
يا جماعة انا كتير بحب اهلي وبحب اساعد بس صار الكل يتكل علي في كل شي صار الموضوع فوق طاقتي وما حد فاهم هالشي الكل صار اتكالي وصرت لما احكي مادخلني الكل يهاجمني هذا مش من حقك وماتكوني انانية بالاخير صاروا يحكولي احمدي ربك انو لسة متحملينك عنا
وصلت لمرحلة صعبة جدا ويائسة من حياتي ومن تصرفات الكل في البيت معي ويائسة من شغلي لانه حارمني كل شي
بنفس الوقت صعب اغير شخصيتي او اشوف وظيفة بدوام اقل لانو مافي شغل وصعب اتحول شخص غير متعاون والاصعب انو احسس حد اني ضعفت واني مش قد المسؤولية ونفسي ارجع افكر بحالي !!