( الفيسبوك صار والي المدينة .. ساخر)

ادخل اسمك ..
وكلمة السر ....

يا جماعة الخير شو قاعد بصير .. هو كل ما دق الكوز بالجرة .. يلا شباب على الفيسبوك .. اذا بدنا انعارض او نقاطع او نمدح او نذم او انشل واحد او نفضحوا او نحشدلوا يلا شباب على الفيس بوك .. خلينا نفتح صفحة ونستنكر او نقاطع .. شو هاذ
اتقول الفيسبوك صار محكمة ولا حزب ولا ديوان عرب ولا بيت المختار ولا مول ولا مجمع باصات ... ولا شو مش فاهم انا بالظبط .. بكره اذا واحد بدو يخطب بقولك الجاهة على صفحة من صفحات الفيسبوك جهزنا كل اشي اهلا وسهلا بالجميع .. واذا بدو الواحد يفتح بيت عزا برضو ( كرفته ) الناس ما بتشوفها الا وتوجهت على الفيس بوك بناءا على دعوة صاحبها .. يعني بكرة اذا واحد بدو ...
1- يطلق مرتو ... يلا على الفيس بوك برمي عليها هناك يمين الطلاق قدام كل المتواجدين بهذيك اللحظه بغرفة الشات وبروح .. وهي بتغلق حسابها وبتروح.
2- اذا بدو يدفع نفقه .. بحط المصاري عند ( محرر الموقع ) وبروح.
3- اذا بدو يمسح بواح الارض.. يلا على الفيسبوك
4- اذا بدو يشرب مي... يلا على الفيسبوك
5- اذا بدو يطقس على بنت الجيران ... يلا على الفيسبوك
6- اذا بدو يتظاهر... يلا على الفيسبوك
7- اذا بدو يعارض التظاهر... يلا على الفيسبوك
8- اذا بدو ( يش.. ...) ... بروح على الفيسبوك وما بعرف اذا في مي هناك ولا لا .. لازم يمدو ( حنفيه مي للفيسبوك من مرة ) مهي خربانة خربانة.
9- اذا اب بدو يضرب ابنو بقولوا اسبقني على الفيسبوك
10- اذا الحكومة اخذت قرار وما عجب الناس .. اخبط الا والشعب صار بالفيسبوك.
11- اذا اتعين واحد او استقال او انحبس او عطس او او وقع يلا شباب على الفيس بوك بنحكي هناك.
12- اذا واحد بدو يعزم زاخد بقولا بتلاقيني على الفيس بوك .. عازمك على جوز ( روابط ) و (كتف البوم صور ) ووقية ناس بتعرفهم .. وعلى هش ونش من كلام الشات.
13- اي ما ظل الواحد الا ويدخل ( ليلة دخلتو ) بالفيس بوك.
وبعدين مع هالشغلة وهو فش ورانا الا الفيس بوك .. شو هو منزل .. اصلا هو موقع انوجد للتعارف .. العرب حولوا لمجمع ( حل وربط ) . . اتقول سوق عكاظ .
شو اعمل انا هسه ... بطلت اعرف احكي مع واحد شخصي .. اي زوجتي صرت اشوف شو طلباتها وطلبات لولاد عن طريق الفيسبوك ...
يا جماعة الخير ... مش لهالدرجة .. بنام وبنقوم عل سيرة الموقع الملعون هاذ ... اي حتى الفضائيات والاعلام والسياسة والاقتصاد واحوال العالم ومستقبل العالم والتطورات والخطط والمفاهيم والنظريات كلها صارت اتمر واتجيب سيرة الفيسبوك .. مش فاهم انا ... اي لن استبعد ولن استغرب ولن اتفاجأ ان ( يدفنوا الناس امواتهم ) غدا بالفيسبوك .. ويصير للفيسبوك ( مقبرة ) .. عجبكم هيك.
وبصير الواحد يدخل الفيس بوك يمر على المقبرة يقرأ الفاتحة وبعدين بزور اخوانه واخواته واهلوا واصحابو من مرة بالفيس بوك وبروح .. قصدي برجع بنام .. هو على ( التخت ) بقوم بكل واجباتو العائلية وغير العائلية ... اي مش يستبعد الواحد يروح على شغلوا عن طريق الفيس بوك ويخلص شغلو .. وهذه صارت في ناس بتشتغل وهي ببيوتها عن طريق الانترنت .. اذا ممكن الفيس بوك ايكون مكان للعمل والترفيه والتسوق والزيارات والاجتماعات وكل اشي .
اذا الامور بدها اتوصلنا لهيك .. خلص نقعد ببيوتنا وانمشي حياتنا عن طريق الفيس بوك .. لا راح اتشوف واحد بروح على الشغل ولا المدرسة ولا الجامعة ولا بركب باصات ولا تكسيات ولا بزور اهلوا) اصلا هيك بنوفر طاقة وبنزين وورق واشياء كثيرة ...
اي في ناس بتنسى اتصلي وتعبد ربها وهي مشغوله بهالموقع ( المنحوس هاذ ) ... اللي بدي اقولوا باختصار ... اذا كان بالامكان حدا يفيدني ويعطيني عنوان صاحب الموقع .. ناوي ابعثلوا رسالة انو ليش لهسه مش عامل ( شقق مفروشه ) بالفيسبوك .. وليش مش فاتح كازيات .. وليش ما في ارصاد جويه .. وليش ما في صاله تزلج على الجليد ... وليش ما في حاويات وليش الرابط بين ( المعلومات الشخصية ) (والرسائل والمجموعات ) كلها مطبات ومش معبدة ...
سؤال كبير اشوي ؟ .. هسه هذا الهبيلة صاحب موقع الفيس بوك فرضنا ( شطب ولغى ) موقع الفيسبوك .. هل كل الناس هاي رايح تتشتت وتتفرق واتضيع وتخرب مصالحها وتنهار ؟ .. اي والله بقص ايدي ( من الكوع ) .. لأ .. من ( الكتف ) اذا ما ثلاث ارباع شعوب العالم راح اتضيه وتدمر وممكن ناس كثيرة تنتحر ..
معقول الناس جمعهم موقع الكتروني جامد بعد ما حفي الواحد اللسانو هو يحاول يجمعهم على دين ومبدأ وعروبة وقوميه .. الخ
الاغرب والادهى والامر انو الواحد امصاحب مليون وحدة وواحد( بعيد عن بلدوا ملايين من الكيلوا مترات وبحكي معاه كل يوم وبطمن عليه ( وجارو او اهلوا ) ما بشوفهم بالسنة مره .. انا لا اسيء لموقع ( الفيسبوك ) يوجد فيه حسنات كثيرة .. لكن الشعوب مش عارف شو صرلها عامله الفيسبوك شغلتها وعملتها وربطت حياتها ومصيرها كلو بالفيسبوك مش لهالدرجة .. خليك وسطي ... حتى اذا اتوقف البرنامج يوم ما لا تتفاجأ وتتعطل مصالحك ... اشي ومنو .
انا اللي حساب على الفيسبوك ما بنكر .. بس مش عاملو شغلتي وعملتي على الطالعة والنازلة ...ويا ريتو موقع عربي كان اهون بلى .. بس المشكلة موقع اجنبي والله اعلم شو غاياته واهدافه ونواياه.

ملاحظة : فش ملاحظات .. يلا على الفيسبوك انكمل موضوعنا هناك .. والله القعدة هناك بتشرح الصدر .. ليش الحكي.
والسلام عليكم
Burhan_jazi@yahoo.com