( القانون .. وكلام الناس)

سؤال . .اللي بذم بدفع مصاري هيك انا افهمت .. طيب واللي بمدح بتعطوا مصاري ؟

سؤال بريء من مواطن انشا الله ما اكون متهم ... هسه اللي افهمتو من قانون ال (23) انو اي واحد بذم او بستغيب او بغتال شخصيه راح يدفع مصاري .. طيب يا جماعة الخير اذا الواحد مدح فلان او شخصيه بتعطوا مصاري .؟ .. ولا هذا ما عليه اشي .. ولا مكافأتو أنو ما دفع غرامه ونجي من العقوبة ؟
طيب يا جماعة معلش خذوني على قد عقلاتي .. والله انا مسخم وحالتي حاله .. هسه انا مثلا اذا بدي ( اعلق ) على موضوع معين وابين وجهة نظري او انتقد ما جاء فيه بطولني مسؤوليه وبدخل من باب الذم واغتيال الشخصيه .. مثلا الكاتب او اي وسيله اعلام او الشخص او الجهه المذكوره بالماده الصحفيه او المرئيه او المسؤولين عنهم ( الهم ) حق حسب القانون انهم يرفعوا علي قضيه تشهير ويطبق علي القانون وادفع غرامه ؟ .. اذا الجواب .. نعم .. ففعلا يا هملالي .. يا سعدي .. يا خراب بيتك يا ابو السعيد ... يعني هيك الواحد ( اتكربس اتكربس) .. يعني لا يمكن انك ( اتعلق اوتنتقد ابدا .. يا اما بتمدح وبس ويا اما بتوكلها بجنابك وبتسكت وبتقرأ او بتسمع وبس ....
طيب يا سيدي .. برضو خذني على قد لحافك مد رجليك .. هسه انا شخصيا اذا علق واحد على اي ( مقال ) او اي من كتاباتي وانتقدني .. هل يجوز ان ارفع عليه قضيه تشهير ... اذا الجواب نعم ... ففعلا يا هملالي ... على هالموال انا متاكد زي ما انا شايف ( نجوم الظهر) انو ثلاث ارباع المواطنيين راح يصفوا بالمحاكم .. كل واحد رافع على الثاني قضيه ( تشهير او اغتيال شخصية او ذم ) .. رايح يصفي المواطن (مرفوع ورافع ) يعني مرفوع عليه قضيه ورافع على واحد قضيه .. يعني اللي بكسبهم من فلان كغرامة تشهير رايح يدفعهم لفلان غرامة تشهير او اغتيال شخصيه .. انا لهسه بسأل وبستفسر .. ايوه .. خليك مركز معي .ز انا ما جبت سيره حدا .. انا بحكي بشكل عام ..
انا بقول .. ربما انا رجل مش قانوني بس انا بفكر على مستواي على مستوى مواطن عادي بسيط ... انا بقول انو هذا القانون ممكن وربما يكون الو مداخل ومخارج تخرب بيت الناس ... كل واحد ممكن يفسر القانون على كيفوا .. كيف على كيفوا ؟.. بمعنى انا اذا ما عجبني كلام فلان راح اعتبر من جهتي حسب القانون انو بذم في وبشهر في وممكن هو يرد علي بأنو لا مش هيك المقصود واني انا افهمتو غلط .. يعني ما بعرف كيف بدها تنحسم الشغله .. على ايه حال انا اختصارا لهالحكي كلو ... انا يا عمي رجل مسالم ... وانا بحب وبحترم الجميع .. وكل الناس اكويسين .. وكل الكتاب بكتبوا صح .. وكل مواطن على حق ... انا بعترف اني انا السيء والجاهل وقليل الحيا .. والجميع على راسي والله .. حتى الاخبار بالفضائيات وغير الفضائيات والمؤيد منها والمعارض كلهم حبايبي .. وكل الناس خير وبركه .. يا حيا الله والله .. واهلا وسهلا بالجميع ..
انا لهسه ب ( save side) .. بالجانب الامن .. ما ذمت حدا بالعكس انا مدحت الكل .. اتقولوا عني منافق ... ذمتي كاوتشوك .. هزاز ذنب ... كذاب .. العوباني ... عديم الشخصيه .. تابع ... بوجهين .. جبان .. عادي والله عادي .. انا مع الجميع وبحب الجميع .. لأنو انا بصراحة (طفران ) وما معي احلق .. ولا عندي امكانيه او اي استعداد اني ادفع قرش احمر .. وعشان شو ؟ .. عشان انتقدت او ذميت فلان او علنتان .. لا يا عمي .. الكل يسرح ويمرح ويسوي اللي بدو اياه ولن اشير الو باصبع الاتهام او انتقدوا او حتى اشكي عليه .. بطلنا القصص هاي .. لانو صار فيها دفع .. اي انا لو ( طجيتني بالارض طج ) وخبطت ببطني ما بطلع مني تعريفه وحده ولا برن رنه حتى .. ممكن يطلع معاك فواتير هذا ما املكه .
انا لست ضد اي قانون يصدر.. في ناس اولى واحكم واخبر مني بهذه المسائل .. انا شخصيا شاعر انو هذا القانون ما انحط من اجلي انا كمواطن عادي بسيط .. لانو الواحد مشغول بهموا .. اعتقد انو هذا القانون وضع لاشخاص او جهات حياتها كلها تدور ضمن هذا الاطار ... هو نوع من القيود او للتراجع او التفكير قبل الاقدام على اي ذم او اتهام او تشهير او هو وضع حد للاستهتار بحياه وسيره الانسان ممكن .. انا شخصيا ما بعرف .. على ايه حال ...
تشهد الساحه الاردنيه كثير من المواضيع والاخبار ومش عارف انا حقييقة شو اللي قاعد بصير مثلا ...
1- شو قصة ( الفستق ) اللي معبيه كل المواقع والاخبار .. ليش ماخذه هذه الاخبار صنف نخب اول ودرجه اولى مع اني مش شايف فيها اشي .. يا جماعه والله الناس والعالم يا خوفي بتضحك علينا .. ناس اكلت فستق شو صار يعني .. حسبي الله ونعم الوكيل بس .. لازم تتصدر الاخبار ونعمل من الحبه قبه وننسى مواضيعنا الاساسية والاصليه والمهمه .. والله كل اشي بصير ها الايام.
2- موضوع فلان استقال وفلان ما استقال .. وفلان اتعين وفلان ما بدو يتعين .. وفلان اتقاعد وفلان على راس عملو .. ايوه وبعدين .. لازم برضو تتصدر الاخبار والمواقع والاعلام .. ليش احنا غير العالم .. ليش بنمسك بالصغيره وبالتفاهات وبننسى التقدم العالمي بالفكر والسياسه والمشاريع والافكار ... ليش نبتعد عن مواضيعنا الكبيره والحساسه ونلتهي ويشغلنا عنها مواضيع ليست ذات قيمه وبنداولها زي سواليف جارات .. ليش توخذ من مساحاتنا الفكريه والجدليه الشيء الكثير .. وخاصة المنطقه تشهد تحولات وتحديات كبيره .. مش عارف .. الله جعلني ما اعرف .. يا باي شو مقهور وبنقهر لما اشوف ناس بواد والمواطن وهمومه بواد ..
3- شو بدو المواطن من فلان اكل فستق ولا انشا الله يوكل بليله .. وانا مالي .. شو بهمني هذا الموضوع .. شو هذا الموضوع راح يأثر( باسرائيل ) ومشاريعها الكبرى ومخططاتها الجهنميه .. واحنا لسه بنقول فستق وما فستق .. وفي تعديل وفش تعديل .. في حل ومفش حل .. في تغيرات بالحكومه ولا ما فش تغييرات .. يا عمي خلينا انركز على جوهر الاشياء .. يا عمي ليش الناس بتتقدم واحنا مصرين انظل نطلع بين رجلينا .. يا عمي ما خلص يكبر الواحد عن صغائر الامور والتفاهات .. قال فستق وكاشو ونواب .. وانا مالي يا اخي .. اسرائيل جهزت نفسها للاستيطان والحرب والعمل والعلم والتقدم وهيمنت على العالم واحنا لسه بندور بسواليف فارغه ومحتله الجزء الاكبر من اخبارنا وحياتنا.
4- الثورات العربيه بدأت وانتهت وراحت انظمه واجت انظمه واتغيرت سياسات كثيره بالعالم واحنا لسه بنقول .. شو قال فلان .. وشو عمل فلان .. ومين جاب الفستف لفلان .. والله يا عمي بكفي ( قهر للمواطن ).
5- انا بقول وما اكثر قولي وما اقل فعلي .. بقول خلي الناس اللي بدها تصلح والاصلاحات تسير بسرعه بدون عائق وعراقيل سببها تفاهات .. اربكتو العالم يا ناس .. شو اللي بدكو اياه من الاخر .. في ناس بدها تصلح وفي ناس ما بدها تصلح وفي ناس ولا على بالها ... مهو ما بصير انظل على سولافه ( يا خريب يا لعيب ) .. كل واحد بعتقد بأ،و بحكي بأسم المجموعه الاكبر .. الف رأي والف فكر والف جدال والكل يعتقد انو هو على صح .. وين ( الجماعه) بالموضوع .. لماذا العمل الفردي .. لم يعد للمواطن ( حيل ) على المهاترات والتشرذم .. هو من الاخر .. في جماعه واقفه بكفه وجماعه واقفه بكفة هذا بميل الكفة على جهته والثاني برد يميل الكفه على جهته .. متناسين او بتناسو او غير مكترثين انو في ناس في شعب ( بالنص ) بالوسط يا جماعه .. بتمرجحوا فينا .. ارسولكم على بر ..
6- ما بصدر قانون الا وبتبلش سواليف ( الطخ ) والانتقاد .. ما في قانون .. برضو الناس بتنتقد .. شو الحل .. والله ما حدا عاجبو اشي ..
7 – يا جماعة الخير خلي هالمركبه ماشيه .. خليها داحله .. حليها سايره ... احنا كل ما زدنا حكي وانتقادات وجدال كل ما زدنا على حالنا قوانيين وقيود ... ختى الواحد بطل يعرف شو هي القوانيين من كثرها جاءت من كثر ما بنق وبنحكي وبنجادل وبنطالب .. كل حركة بحياتنا قاعدين بنطالب فيها بقانون .. حتى اصبحت حياتنا صعبه ومعقدة وشاقه .. خلي الحياه ماشيه بيسر والسلام ختام .
8- انا مش عارف قديما كان كل الامبروطوريات والحضارات ما كان عندها الا ( 10) قوانيين او 20 او 100 قانون ان ضربها القرد .. احنا لا غير شكل .. لازم انعقد الامور وانعقد حياتنا... لازم نعمل مليون قانون .. لازم احنا غير شكل.
يا جماعة الخير صارت حياة المواطن صعبه ... احنا جماعة ( انا بحكي عن حالي ) بدنا نوكل خبز بجو طبيعي وعادي ويسير وكريم وحريه منظمه وهدوء .. ما بدنا ( عجقه ) اي والله المواطن انعجق.
9- امنيتي افتح على قناه فضائيه ما اشوف فيها صراع .. او فريقين .. ابدا ضد وضاد .. اتقول بينهم دم ... امنيتي احضر ندوة او اجتماع فيه تخطيط هادئ ومتزن واتفاق ووفاق حتى على نقاط الاختلاف .. لا .. اعوذ بالله هذا يصير الحكي .. لا ما عاذ الله .. لا .. لازم نتذبح وننشر غسيل بعض وللاسف شو بالنهايه .. بطلعو الطرفين بدون اشي بتتجمد الامور بينهم كلها .. وعلى حساب مين .. على حساب الوطن والمواطن.

ملاحظه :انا بقول .. لقد أملأنا ساحتنا بمواضيع كثيره اربكت الجميع وهذه المواضيع لا تخرج منها سوى اربع او خمس مواضيع ذات اهميه قصوى .. والباقي كلو جدال بيزنطي ذات مواضيع لا تستحق هذا الضجيج.

ملاحظه : انا ما قلت هذا الكلام الا والله لأني مقهور من اهدار الوقت والطاقات بمواضيع مكرره ومواضيع تشهدها كل دول العالم لكنها لا تعيرها اهتماما وتعدها من الصف الثالث او الرابع وتتركها لجماعه وفئه معينه تداولها ولا تشكل ثقل بالبلد .. اما نحن نعطيها اكبر من حجمها ونعدها وندفعها دفعا الى الصف الاول وهي لا تستحق .. دعونا نركز اهتمامنا على قضايانا الكبيره والمصيريه والتنميه والتحديات ووحده المجتمع والكلمه .
مع كامل احترامي وتقديري للجميع .. ولا اقصدالاساءه لاحد لا سمح الله وانما همي والله الوطن والمواطن .. ووفق الله سيد البلاد الى كل خير اطال الله بعمره واعانه على مسؤولياته الجمه.

والسلام عليكم
burhan_jazi@yahoo.com