هل انا قاتل !!!!!!!

زاد الاردن الاخباري -

الى الاخوه قراء زاد الاعزاء

اسمحولي اكتبلكم بالعاميه لضعفي الشديدفي العربيه الفصحى

انا بحب اطرح مشكلتي بلكي الاقي الحل
انا شب عمري 27 املك و الحمدلله كل ما يرغب اي شاب في حياته من مصاري و شغل و ترف الخ...... بس مشكلتي مش سعيد ابدا في حياتي و بلخصها كالاتي

انا نولدت في دوله اوروبيه و عندي اربع خوان منهم اخ توام متطابق و الله قادر على كل اشي ماتت امي و انا عمري اربع سنين و ابوي رفض تحمل مسؤوليتنا فرجعنا انا و اخواني الاربعه للاردن و عشنا هون مع قرايبنا احسنو معاملتنا و ربونا بعد ما خلصنا توجيهي في تفوق انا و اخوي التوام ابوي اهدانا سياره للجامعه و في اول شهر من الجامعه نزلت انا و اخوي و اصدقاء في رحله وشاء القدر اعمل حادث و نتيجه هادالحادث مات اخوي و اصدقائي و انا و الحمدلله سلمت من الحادث و طلعت في شويت كسور متفرقه و بعدين قرروا اخواني ارسالي على اروبا للعلاج و الدراسه و ابوي من هديك اللحظه لحد هلا بيوصفني بالقاتل و لهلء بحملني مسؤوليه موت اخوي يا جماعه اقسم بالله اني تعذبت نفسيا بعد الحادث و خضعت لعلاج نفسي اكتر من سنتين و بعد ما خلصت جامعه رجعت لبلدي و اشغلت دليل سياحي و مترجم و الحمدلله رزقت من ما اعطاني اياه الله كتيييييير في خلال سنتين و بعد هيك و حسب مسؤوليات شغلي في شركه طيران اوروبيه كنت مفوض في توقيع وبسبب واحد الله لا يسامحه فاسد جدا اختلس مبلغ من المال و مش قليل و انا المسؤول الوحيد عنه و هددوني ازا ما بسدد رح انحبس و دفعت المبلغ غصب والله انو تجاوز الاثنا عشره الف دينار و خسرت شغلي و تعبت بزياده و زادت مشاكلي مع خطيبتي و قررت الانفصال مع دفع كافه التكاليف من متاخر و مهر لاني كنت كاتب كتابي بعد كل هل الاحداث اللطيفه اللي صارت معي في اقل من خمسه شهور كرهت حالي و الناس و قررت اني اطلع من بلدي و ما ارجع اللا و انا ميت هلا انا في احدى دول الخليج و شغلي الحمدلله ممتاز جدا و راتبي خيالي جدا و بفضل الله مش ناقصني اي شي لا مال و غيرو بس ابوي ما بدو يحكي معي و رافض اي شي مني ولا بدو يسمع صوتي انا قربت انجن اقسم بالله اني حاسس حالي افشل شخص في العالم مع انو منصبي و الحمدلله مرموق جدا و اعشق شغلي بس والله نفسي انبصت والله مرات بحس اني فعلا قاتل لدرجه اني قررت ادفع ديه القتل غير العمد لاهالي اصدقاتئي يلي ماتو بالحادث .شو اعمل نزلت على الحج و الحمدلله مرتين وحده الي و حده لاخوي و عملت عدد لاباس فيه من العمره عنه و عن والدتي رحم الله اموات المسلمين اجمعين واللي بقدرني عليه رب العالمين من كل سنه اتبرع فيه اقسم بذو العزه و الجلال اني مش مبسوط ابدا في حياتي و الله اني تمنيت الموت في حياتي الاف المرات مش قادر اعيش ابدا مهما عملت هل انا قاتل هل انا عاق لوالدي الذي لن يرضى عني ابدا اقسم بالله لن اتفانا عن عمل اي شئ مهما كلفني لو حتى كل ما رزقني به ربي لسبب واحد يخليني سعيد او يرجع حياتي لطبيعتها

اخوتي بالله ارجو منكم النصيحه و الارشاد مع العلم اني بعيش لحالي من اكتر من ثمان سنوات بس لاني بخاف اني اعمل شي يضر اي شخص بقربي.

اسف جدا على الاطاله و مشكوره اداره زاد على النشر.