مقال بعنوان .. ( الطبيخ العربي )

الجوع عاطل .. وكافر ... انا شخصيا كنت انتبه انو الاكل مالح ولا حامض ولا مخبص في اخر لقمة او لقمتين قبل الشبع .. وابلش بعدها اعلق وانظر واعصب على طباخ الاكل ... مهو بالاول لما كنت جوعان ومش شايف الفضا من الجوع كان همي اكل اي اشي لاسد جوعي دون النظر شو محطوط قدامي ...

في واحد معرفة عن بعد صدف وجلست معاه .. وحديث يجر حديث حتى اخبرني انو ( اخو ) المقيم باستراليا ارسل له ابنه وقد بلغ من العمر 14 سنه تقريبا .. وكونو الولد مولود باستراليا لا يفقه شيء من اللغه العربيه او عن دينه الا الاشياء البسيطه والسطحيه .. ففضل الاب ان يرسل ابنه الى بيت عمه لمده شهرين ثلاث اشهر او سته اشهر لكي يتعلم اللغه العربيه ويتعمق بدينه والجو العربي سيساعد على هذا كثيرا ... أيدت الفكره انا كثيرا وقلت له ..

- انشا الله استفاد واتعلم ..

- يا رجل هذا من حد ما اجا على الاردن وهو بوكل وبنام والله ما اني عارف شو السبب ..

انا ادركت السبب فورا ومباشره وبدون تفكير ولا مقدمات ..

- السبب يا ابو الحبان يكمن ( بالطبيخ العربي ) ما دام حضرتك بلشت ( اطسو طس ) من هالمحاشي كوسا على بيت انجان على دوالي على محشي فليفله على منسف على مقلوبه على كرشات على مية راس ( سخسخ ) الزلمه وقفلت معاه ... اكيد سطل ودروخ وانعمى قمارو وضوو .. وانو بدو يصحيه لهالزلمه .. هاي الاكلات الدسمه والثقيله اي بتطرح جمل يا رجل .. هذول مش متعودين على على هالسواليف هاي .. خف عن الزلمه اشوي خلي يتنفس ويصحصح ..

- وشو ببالك اني اطعمي .. ضمة بقدونس ولا نعنع .. اي والله فضيحه .. .. هيك ( طبيخنا ) احنا العرب .. شو اعملوا يعني ..

- هاي الشغله سهله اختارلو اكل صحي خفيف شبيه بالاكل الاسترالي .. بطاطا مقليه .. هامبرغر ... اشويه سلطه .. صحن شوربة ( كناغر ).. بطاطا وجزره مسلوقه .. كاسه عصير .. بمشي حالو وبصحصح الزلمه وبتعلم ..

انتهى اللقاء على هيك .. وبعد سنه التقينا بهالزلمه هاذ وسألناه عن ابن اخو شو صار معاه .. قلي الولد مش نافع ... ظل يوكل وينام من اول الاجازه لاخرها روح على دار اهلو زايد وزنو يمكن 15 كيلوا وبحلم بكوابيس ليش ما بعرف .

(الطبيخ العربي) .. حقيقة بدخل بمكوناتو اشياء كثيره ... واذا لم يتقن بالشكل الصحيح وخلط المواد بالتسلسل ودرايه وهدوء ومعرفه .. بطلع الطبيخ ( شايط – محروق – مخبص – مالح – حامض – مش زاكي .. مستوي .. مش مستوي .. ني .. عكس عكاس) ..

وهنا حقيقة يظهر وجه الشبه الكبير بين ( الطبيخ العربي ) و ( الربيع العربي ) ...

الربيع العربي نتج عن جوع الناس للديمقراطيه والحريه والعداله والكرامه والمساواه .. وما ان سنحت الفرصه حتى بدأت الناس تنهم نهما من الربيع العربي لتسد جوعها للاشياء المذكوره سابقا .. وما ان وصلت حد الشبع انتبهوا الى ان الرييع العربي طلع ( مالح .. حامض .. مخبص .. محروق .. شايط ) .. مهو في مثل بقول ( كثرة الطباخين بتخرب الطبخه ) .. والربيع العربي بلش على نار هادئه بطنجره محليه ... وسرعان ما زادت حرارته وكثروا طباخينو ... فانشعط وانحرق وصار خبايص ... كل واحد من برا ومن جوا صار يجيب معاه اشوية شعارات وملح انجليزي وجاجه ممعوطه ومكعبات ماجي وكمن معلقه (وحوس يلي بتحوس ) بهالطبيخ او الربيع العربي ... ريحتو عبت المكان والحاره حتى وصلت ريحة الطبخ للامم المتحده .. والكل فتحت نفسو .. الجوعان والغير جوعان ... وعند السكب والذوق اختلفت درجات الشهيه ..

انتهى الربيع العربي بكثير من الدول .. واللي خلص منهم ... منهم من قعد ينكش اسنانو .. ومنهم من اصابوا عصر هضم .. ومنهم من راجع ... ومنهم من تسمم.. ومنهم .. بقولك ولا ازكى من هيك ... ومنهم بقولك والله الجوع ارحم ... ومنهم بقولك لو ظلينا على الساندويشات مش احسن ..

اختلفت الامزجه بالربيع العربي .. طاسه وضايعه .. ربيعنا مثل طبيخنا .. مية البندوره ( منا ) محليه ... وهي ماده اساسيه للطبخ .. وقرن الفلفل والمخللات مستورده من الخارج لدعم ( الربيع العربي) لفتح الشهيه ..

كل طبخه بتختلف عن الثانيه .. والذويقه والاكيله همهم ان يصلوا الى حد الاشباع .. وبعدها سيأتي الجوع من جديد .. لنعيد الكره بسلسله لا تنتهي... طاولة السفره والكراسي والمعالق والشوك والصحون وكاسة المي مستلزمات تناول الوجبه ( همشت ) .. اللهم همنا الوحيد شمر عن ذراعك ومد ايدك وافلح .

ملاحظه : ( البطيخ العربي ) هذا سولافه ثانيه بنحكي فيه بعدين .. بس بجميع الظروف بتقاطع مع ( الربيع العربي ) انو الاثنين يقعوا ضمن اطار ( احمر على السكين ) .

والسلام عليكم