شكوى بحق وزير المياه و مدير مياه لواء القصر بمحافظة الكرك

زاد الاردن الاخباري -

شكوى بحق وزير المياه و مدير مياه لواء القصر و كافة المسؤلين في سلطة المياه....

السلام عليكم و رحمة الله و بركاته..

لقد هلكنا و تعبنا من كثرة الشكاوى و كثرة الوعود التى تلقيناها من المسؤلين بخصوص وصول المياه الى منازلنا في موعدها و على الأقل بكميات تكفي حاجاتنا اليومية..

بالأمس كان دور البلدة بالمياه..و اكاد اقسم اني بالأمس امضيت الليل ساهرا بانتظار ان تصلنا المياه لكن دون جدوى...فالمياه كانت ضعبفة جدا و لم تقوى حتى على الوصول الى الخزان الأرضي الذي تكبدت شراءه بالدين محاولة مني لتعبئته ثم اقوم بضخه الى الخزانات العلوية كون المياه لا تصل الى الخزانات التي على السطح....

بالعربي و بلغتنا العامية...

يا اخوان مبارح طول الليل ما قدرت اعبي نص الخزان الأرضي و المياه ضعبفة جدا و اليوم الصبح انقطعت يعني بدنا نستنى هيك لا الأسبوع الجاي حتى يجي دورنا مرة ثانية..الله وكيلكو صارلنا شهر و نص على هالحالة هاي قد ما راجعنا و اشتكينا عالفاضي ما بناخذ الا الحكي و الوعود التي ما بتشفي الغليل و بدون نتيجة....مع العلم انو في بداية الشتوية قمو بتجديد الخطوط الرئيسية في البلدة و قلنا معلش بنتحمل بهدلة التحفير و التخريب في مقابل انو الميه تصير توصل مثل العالم و الناس لكن للأسف ما في نتيجة...

الحي اللي انا اسكنه يغذيه خط 2 انش و يتفرع منو حوالي 13 خط لبيوت مختلفة و كل بيت ماخذ كمان خط 2 انش..!!!!!!!! يعني حتى التمديد و التخطيط مش مزبوط بالأضافة الى انو الخطوط مكشوفة مش مدفونة و عرضة للتخريب...

انا مش عارف ليش التهاون و المماطلة...اذا ما في عندهم مي يحكولنا...ولا لازم نفك الساعات و نحطها بشوالات و على باب الوزارة......!!!

انا شخصيا راح اعبي الغسيل اللي عتدي و على بيت الوزير لانو الوضع لا يحتمل...!!!يعني المسؤولين عنا ما بتجاوبوا الا بهاي الطريقة احتجاجات و اعتصامات....!!!كل هالضرايب اللي بندفعها حقنا على الأقل انو نلاقي خدمة كويسة بالمقابل...........!!!!!!!

من هذا المنبر اتقدم بشكوى بحق وزير المياه و مدير مياه لواء القصر اللي دايما تلفونو مسكر و اذا كان شغال بخلي حدا من الموظفين يرد بدالو...

بدنا حل لا هالمشكلة اللي كل صيف بنوقع فيها و بنقضييها مشاكل و طوش مع الجيران او الموظفين اللي حرام بحرام بياخذو رواتبهم اللي احنا بالأصل بندفعها الهم....!!!!

مشان الله يا ناس حلونا...................!!!!!!!


التوقيع...مجموعة من الأهالي في بلدة السماكية.