مسيرة حركة شباب سحاب لا لارتفاع الأسعار 2

زاد الاردن الاخباري -

• نظمت حركة شباب سحاب للاصلاح مسيرة لا لغلاء الأسعار انطلقت من أمام مسجد سحاب الكبير
• وشارك بها المئات من أبناء سحاب وتميزت المسيرة برفع سقف الهتاف مشاركة وجوه جديدة من غير الحراك الشعبي حيث خرجوا مرددين لهتافات منددة برفع الأسعار ومنددة بالفساد وبيع مقدرات الوطن وسؤ إدارة الدولة التي أوصلتنا لهذا الحال وردد المشاركون الهتافات التالية :
•
o يا نظام جد الجد ...... طفح الكيل وزاد الحد
هان واربط بالشارع..... وكهربا ماني دافع
هان واللي يسير يسير .... ما رح ندفع فواتير
ولا بنكّل ولا بنمّل ...... حتى هالفاسد يرحل
اهتف اهتف لا تحتار .... وهذا شعبي كل احرار
فايز إجا وعون راح ..... سلملي على الإصلاح
ارفع ارفع بالأسعار ..... ع المواطن يا سمسار
ارفع وغلي لإسطوانات ..... بلكي تشبعوا يا حشرات
ارفع خبز مع بنزين ..... وسلم ع مجدي الياسين
ما بدنا تغيير حكومات ..... جيبولي سرق الفوسفات
سلملي على البوتاس .... سرقوها وقالو إفلاس

* ويا نظام طفح الكيل ..... قلب الشعب شايل شيل
غاز الريشة طار وين .... قلهم يا طهراوي وين على جيوب الفاسدين
ياللي قاعد بالبيوت ..... سرقو زادك نهبوت القوت
يا سحابي علي الصوت .... ع الفاسد ما ظل سكوت
شعب الاردن اصحى وقوم واطلب حقك المهظوم
وشعب الأردن يا مسكين .... ذبحوا جيبك ع السكين
واحنا والأمن والجيش ......تجمعنا لقمة العيش
ويلي بتكتب بالتقرير ..... ثبت ثبت بالتقرير .... ما رح نسكت مهما يصير
يلي ترفع الأسعار ..... شعب الأردن ولع نار
مطالبنا شرعية ... خبز وعدالة وحرية .... وتعديلات دستورية

* الشعب مل من السكوت ..... يحيا كريما او يموت
ما رح نهدى ولا نرتاح .... ومطلبنا هو الإصلاح
بدنا نحاسب كل خوان .... والفاسد ما لو مكان
وقولوا الله قولوا الله ..... شعب الاردن سيدو الله
وما سويتو اصلاحات .... سقطت كل القناعات
وابن الأردن حرق حالو ..... والنظام ولا على بالو
حرامية بالأساس ..... نظام تجويع الناس
ويلي ترفع الأسعار .... جيبو اللي سرق الدار
ما رح نسكت لو بنموت .... الا تا نفضح هالحوت
النظام بيد مين .......... تجار ومطبعين

* بالروح بالدم نفديك يا اردن
من حوران للجفر ... كلنا ضد الفقر
يا لصوص الأراضي .... اجا وقت التقاضي

يا ديوان اسمعها زين .....شعب واحد مش شعبين
مانسيناكي فلسطين ..... ورح نجيكي محررين


نعاهد شعبنا الأبي على الاستمرار في حراكنا حتى نحرر وطننا من أيدي اللصوص والفاسدين ونعاهدهم على عدم السكوت أو الخنوع حتى نسترجع كل أموال الشعب المنهوبة مهما كانت مكانة اللصوص أو مرتبتهم أو ألقابهم .