التجارة شطارة

زاد الاردن الاخباري -

وفاء خصاونة

( ابو احمد تاجر ملابس رجالي وستاتي )
محمد: السلام عليكم.
ابو احمد : وعليكم السلام والرحمة والاكرام بشو بقدر اخدمك يا ابو الشباب؟
محمد: بلاقي عندك بدلة عرس ؟
ابو احمد: شو بدك تتأهل يا ريتو الف مبروك يا زينة الشباب شو اللون؟
محمد: لون كحلي او اسود نقيلي اياها عزوقك يا معلم.
ابو احمد : عراسي بتمون وأحلى بدلة عرس لاحلى عريس بس ليش ما جبت العروس تنقي فستان العرس عنا تشكيلة بتعقد.
محمد: العروس راحت مع امها وخواتها قال ايش ما بحبو رفقة الزلم لانهم مش طويلين روح مثلهن وبدهن يتفتلن بالسوق انت غشيم عن بنات اليوم منتا عارف بنات اليوم ما بعجبهم العجب ولا صيام في رجب.
ابو احمد :ها لقيتلك بدلة عكيف كيفك وسعرها طري خش قيسها بغرفة القياس عايدك اليمين.
محمد: اشوف والله باينة كبارية بس شو مقاسها؟
ابو احمد: انت شو نمرتك؟
محمد: بلبس 39.
ابو احمد: هاي بتلبسك وزيادة يا عريس.
محمد: خليني اجربها يا معلم.
( دخل محمد لغرفة القياس وخرج بعد دقيقتين والعرق يتصبب منه من شدة الحر)
ابو احمد: ها بشر قمحة ولا شعيرة؟
محمد: بتجنن كأنها مفصلة علي بس بدك تراعينا يا معلم العين بصيرة واليد قصيرة وانا داخل عجوازة وانت سيد العارفين حفلات وتأثيث بيت واستئجار شقة وتجهيز العروس وراتبي كله 250 دينار بس.
ابو احمد: ثمن هاي البدلة 350 دينار بس وهاي بعد المراعاة.
محمد: شو بتقول؟ غير وبدل يا زلمة والله لو رحت عمرة احسنلي من كل هالجيزة المعثرة من اولها.
ابو احمد: بكل السوق ما بتلاقي اطرى من هالسعر وروح لف السوق كله اذا لقيت بدلة بنفس مواصفات هاي البدلة وارخص منها راجعني.
محمد: يا اخي هذا سعر طري!!!
ابو احمد: والقرآن والرسول والمصحف ما انا ربحان عليك في هذه القطعة غير 5 دنانير حلفتلك عالقرآن ليش مش مصدقني يا رجل؟
محمد: آ مش مصدق طول النهار انتو يا هالتجار تحلفوا وحلف اليمين حرام وبتحاسب الانسان عليه.
ابو احمد: ول, كل هاي المحاضرة عشان 350 دينار
محمد: والله ال 350 دينار بتفرق مع موظف بسيط مثلي،اي القرش بحسب حسابو لما اصرفو بتفكر زيكو التجار معهم كومة مصاري ما بتوكلها النيران.
ابو احمد: انا مش غاصبك تشتري هات البدلة وبدون مطرود اطلع من محلي وشوف محل ثاني.
( خرج محمد مش شايف الضو وهو يهدد التاجر ان يشتكي عليه, وبعد قليل دخلت المحل فتاة ممشوقة القوام وذات عيون زرقاء وشعر منسدل على كتفيها مثل ملمس الحرير)
الفتاة: هاي
التاجر: هايين وين هالغيبة ما عدنا شفناكي؟
الفتاة : زروف.
التاجر: شو طلبك؟
الفتاة : بدي فستان سواري .
التاجر: شو المناسبة؟
الفتاة: بدي اروح على خطبة صاحبتي.
التاجر: اجتني تشكيلة اخر موديل قماش تركي رح تعجبك ان شاء الله
الفتاة: اوكي فرجيني اكتر من موديل.
التاجر: شو اللون؟ والنمرة
الفتاة: اشوف الموديلات وبعدين بأااااارر اي لون.
التاجر: هادي كل الموديلات اللي عندي.
الفتاة: باردون وين غرفة الئياس؟بدي اغلبك
التاجر: لا ابدا شو غلبة تعالي كل يوم.
( دخلت الفتاة غرفة القياس ومكثت ربع ساعة وهي تجرب الفساتين)
التاجر: ان شاء الله عجبك اشي؟
الفتاة: عجبني الفستان التوتي كم حئو؟
التاجر: الك ببلاش.
الفتاة: بسلمو انا عنجد بحكي.
التاجر: 200 دينار حقو.
الفتاة: اف مش معقول بدي سعر طري انا مش عاملة حسابي ما بتأدر تراعيني؟
التاجر: عشانك بس وما تجيبي سيرة بنزلك اياه 5 نيرات.
الفتاة: انا زبونة محل وما راعيتني.
التاجر: شو عاملة حسابك يعني قديش بتقدري تدفعي؟
الفتاة: 75 دينار.
التاجر: والله ما بتوفي معي يختي رأسمال هاي القطعة بتطلع علي 155 نيرة.
الفتاة: اوكي لفو
( فجاة دخل المحل محمد والشرر يتطاير من عينيه)
التاجر: شو جابك انقلع بره.
محمد: يا نصاب كنت بدك تبيعني البدلة ب 350 دينار وجارك ابو خلدون ببيع نفس القطعة ونفس الماركة ب 150 دينار.
الفتاة: مين انت وشو ئصتك؟
محمد: انت زبونة عند هادا التاجر كان بدو ينصب علي واكيد انتي كمان نصب عليك؟
الفتاة: انا زبونة عند ابو احمد من 6 سنين .
محمد: يعني نصب عليك طول هالمدة؟
الفتاة: مش معئول ما بسدئ.عنجد اللي بحكي هاد الشب؟ انت بتنصب عالناس وانا واسقة فيك؟ ضحكت علي ويا ترى كم واحد ضحكت عليهم أبلي؟
التاجر: انا ما ضحكت عليكي هادا واحد كذاب انقلع قبل ما اطلب لك الشرطة؟
محمد: يا ريت عشان يكتشفوك على حقيقتك.
التاجر: خلص بدناش فضايح خلينا ننهي الموضوع بدون شوشرة.
محمد: انت خايف من كلام الناس لما يكتشفوك انك غشاش ونصاب ومش خايف من عقاب رب العالمين يوم الحساب؟
التاجر: انا اسف يا ابني كنت مغمض وربنا بعتك في طريقي عشان اتوب وارجع لله سبحانه وتعالى. خلص بكره رح اروح عجمعية ايتام واتبرع بنص اموالي.
محمد: الله يبارك فيك لانك رجعت عن خطأك ان الله غفور رحيم.