البورصة حرام ولا حلال .. فهموني يا ناس

زاد الاردن الاخباري -

( الزوج يستعد للخروج الى السوق المالي)

الزوج: حبيبتي بدك اجيبلك اشي وانا جاي من ااسوق المالي.

الزوجة : سلامتك حبيبي مش عاوزة اشي خير الله كتير هو انت مقصر معي باشي الله يطولي بعمرك ؟ شو قلت سوق مالي يا غبرة يا عدوتي بدك تدخل مال حرام لبيتنا.

الزوج: بلا كلام فاضي مش حرام البورصة روحي واسألي مين ما بدك بقلك مش حرام .يعني اذا دخل علينا شوية قرشين بتسميه حرام منتي شايفة وضعنا ما في غير راتبي وبدنا نصرف وبدنا مصاري عشان نطعمي الولاد مش مكفي الراتب وانتي شايفة غلاء الاسعار.

الزوجة: يعني بدك تطعمينا من مال حرام؟ لا يا سيدي انا مستعد اوكل خبزة وبصلة انا وولادي بس ما يدخل مال حرام على بيتنا كيف ربنا بدو يوفقلك ولادك وانت بتجيب مال حرام.

الزوج: ليش مش قادرة تفهمي يا مرة انو البورصة حلال حتى روحي اسألي الافتاء كل الشيوخ حللوا البورصة.

الزوجة: انتو بتحللوا الدين وبتفسروه عكيفكو عالحساب انت بتصلي كل فرض بالجامع وحجيت 3 مرات ولا ناسي؟

الزوج: لأ ما نسيت انتي بتحسسيني اني خارج عن دين الاسلام شو يعني اذا تحسن وضعنا شوي؟ انتي معاي ولا ضدي؟

الزوجة: اذا رحت يا زلمة عالسوق المالي ما بضل في هالدار اعمل ما بدا لك.

الزوج: انقلعي درب يسد ما يرد هاي حياتي وانا حر فيها وربنا بحاسبني انا مش انتي من ايش خايفة؟

الزوجة: طيب زي ما بدك بس رح تكون الفاصلة بيني وبينك؟
( خرج الزوج من البيت والشر طالع من عيونه ومش شايف الضو واتجه للسوق المالي وهو يقود سيارته بسرعة جنونية)

ابو علي: شو مالك يا زلمة ليش معصب عالهصبح.خير اللهم اجعله خير.

الزوج: لا تسألني ولا أسألك تراها مقبعة معي وواصلة لمناخيري.

ابو علي: ول ول شو صاير؟ استهدي بالله يا صاحبي وروق عبين ما اطلبلك عصير ليمون عكيف كيفك يروق دمك وبعدين بنفهم شو مالك.

الزوج: لا بعدين ولا قبلين انا مش طايق احكي مع حد اتركني بحالي الله يخليك.

ابو علي: طيب مثل ما بدك هسا رح اتركك عبين ما تهدا اعصابك قوم توضأ وصلي ركعتين عشان تروق هيك رسولنا عليه افضل الصلاة والسلام امرنا نعمل عند الغضب.

الزوج: يلا هيني قايم اصلي.
( صلى ابو انس ركعتين وجلس لمتابعة اخبار السوق المالي وجلس بجانبه صديقه الروح بالروح ابو علي)

ابو علي: ان شاء الله اعصابك هديت؟

ابو انس: الحمد لله بعد ما صليت وشربت العصير صرت احسن.
ابو علي: وهلأ بدك تقول لصاحبك وحبيبك شو قصتك اليوم وليش معصب وفاير دمك؟
ابو انس: انا والمرة تهاوشنا وحردت عند دار اهلها هي والولاد.
ابو علي: ليش طيب؟ احكيلي بركي بقدر اساعدك.
ابو انس: مشكلة عويصة هدول النسوان قليلات عقل قال شو يا حبيبي بدها اطلع من السوق المالي لانه مال حرام وربا.
ابو علي: ايش؟ منين جابت هالسواليف شكلها طول النهار تقرأ كتب دينية او جاراتها عبو راسها عليك.
ابو انس : والله مش مستبعد اللي بتقوله يا ابو علي ترى الجارات بخربن اخلاق بعضهن البعض.
ابو انس: اول مرة بسمع ناس بزعلوا اذا اجاهم مصاري بدون تعب عالبارد المستريح.
ابو علي: شايف يا خوي يا ريت تسمع كلامك بركي تعقل وتحط عقلها براسها.
ابو انس: هسا شو الحل يا خوي دبرني انا بصراحة ما بقدر اترك السوق المالي لانو صار في دمي يعني زي السوسة اللي بتنخر بالاسنان وبنفس الوقت بحب مرتي وما بدي اطلقها شو الحل؟
ابو علي: بدك تختار يا السوق المالي يا زوجتك واقلك صلي استخارة وربنا بيسرلك الافضل.
ابو انس وهو يتابع الاسهم صرخ فجاة: شوف شوف يا خوي ارتفعت الاسهم يا ويلي فكرك ممكن ترتفع اكثر من هيك؟
ابو علي: والله بعتمد على قوة الشراء هاظا انتا عن جد صرت مدمن بورصة شلون بدك تتركها وتتخلص منها يا زلمة؟
ابو انس: ومين قالك بدي اتركها بضحك على مرتي بكلمتين حلوين وبرجعها عالبيت ويا دار ما دخلك شر النسوان بنضحك عليهن بسرعة كلمة بتجيبهن وكلمة بتوديهن.
ابو علي: فرجينا شطارتك لكان يا فلتة زمانك انا والله مرتي بتشجعني على الاسهم.
ابو انس: اخ شوف شوف صارت الاسهم تنزل بسرعة يلا نبيع قبل ما نوكل هوا.
ابو علي: لأ يا زلمة ما بنبيع بخسارة استنا شوي.
ابو انس: شوف كلمالها بتنزل لشو نستنى ؟
ابو علي : انت حر بس انا ما ببيع.
ابو انس: بنستنى لبكره بركي تحسن وضع الاسهم.
( في اليوم التالي اتصل احد العملاء في السوق المالي مع ابو انس واخبره ان الاسهم في انخفاض متدهور فطلب منه ابو انس ان يبيع له كل اسهمه حتى لو كانت بخسارة)
ابو علي: شو الاخبار يا ابو انس؟
ابو انس : خسرت كل اموالي آخ بس يا ريت رديت عمرتي الاسهم خربت بيتي وام علي كان معها حق ان المال الحرام لا يثمر وتوبة والله شهيد علي ارجع لهالكار مرة ثانية وما في زي اللقمة الحلال.
( ذهب ابو انس لارجاع زوجته للبيت)
ابو علي: اسف حبيبتي كنت قاسي جدا معك وبوعدك ما ارجع للاسهم لو بموت من الجوع سامحيني.
ام علي: مش مشكلة حبيبي المهم انو الانسان يعترف بخطأه ويتوب وما يضل مصر عالغلط ويرجع لكتاب الله عز وجل والسنة ولا يرد على كلام الناس.اقرأ في محكم كتابه العزيز قال تعالى ( الذين يأكلون الربا لا يقومون الا كما يقوم الذي يتخبطه الشيطان من المس ذلك بانهم قالوا انما البيع مثل الربا وأحل الله البيع وحرم الربا فمن جاءه موعظة من ربه فانتهى فله ما سلف وأمره الى الله ومن عاد فاولئك اصحاب النار هم فيها خالدون)274 البقرة. واسمع ايضا قول الله تعالى ( يا ايها الذين آمنوا اتقوا الله وذروا ما بقي من الربا ان كنتم مؤمنين,فان لم تفعلوا فأذنوا بحرب من الله ورسوله وان تبتم فلكم رؤوس اموالكم لا تظلمون ولا تظلمون) 278+279 البقرة. صدق الله العظيم.

وفاء خصاونة