يلا نغير

زاد الاردن الاخباري -

وفاء خصاونة

الام: شو ما عندك دراسة قاعدة عالمسلسلات؟
هدى: مش آدر ادرس ولا افتح كتاب؟ راسي رح ينفجر من الوجع مش آدر احفظ اشي.
الام: بكره باخدك عالدكتور بعد الامتحان.
هدى: ماشي يا ماما
( عاد الاب من عمله وكان معصب)
الاب: كيفك يا مرة؟
الام: نحمده ونشكره.
الاب: ليش بنتك ما بتقرا؟مش عليها فحص بكره؟
الام: راسها بوجعها صارلو اسبوع وبدي اوخدها عالطبيب يا زلمة خايفة يكون عندها المرض اللي ما يتسماش.
الاب:كش برا وبعيد لا تخوفي البنت ما عليها شر اعطيها حبتين اسبرين وبتصير زي الحصان.
الام: يا زلمة اولتلك انها صارلها اسبوع بتجض من راسها ولا عارفة تدرس ولا تحفظ بلاش تسقط السنة .
الاب: كلمة ورد غطاها ما في دكتور يعني ما في دكتور انت غشيمة عن دلع البنات هاي بتضحك عليكي .
الام: لأ يا زلمة البنت مريضة وموجوعة ما بتنام من راسها وبدي حق اجرة الطبيب.
الاب: شو غردتي؟ كل يوم بدك مصاري منوين اجيبلك الك ولولادك؟ انا ملحق عليكو طول النهار سلع وبلع ومتطلبات واغراض رايحة واغراض جاي.
.الام: يا زلمة خاف الله هاي بنتك يعني اروح على دار اهلي عشان يوخدو البنت عالطبيب؟
الاب: ما معي مصاري يم مفلس عالحديدة.
الام: ول ول ,ما اليوم استلمت الراتب وين طار؟
البنت: انت جاي تحاسبيني على تعبي ؟ما انا صارفو عليكي وعالبيت.
الام: انا ما شفت اشي منك من يوم تجوزنا وانت بتصرف عولادك هدول جايبهم من الشارع؟ ليش تخلف وترمي اذا مش آدر تتحمل مسؤوليتهم؟
الاب : روحي انضبي احسنلك وجيبيلي لقمة اوكلها جاي تعبان من الشغل وبدون فطور.منين ولا منين الاقيها؟
الام: ما في اشي في البيت يتاكل انت ما جبت اغراض للدار صارلك شهر مصومنا وين راح الراتب؟
الاب: شو دخلك ان شاء اكبو بالزبالة هذا مالي وانا حر فيه.
الام:اعطيني 20 ليرة بدي اوخد بنتك عالطبيب
الاب: بحكي عربي ولا انجليزي والله لو بحكي مع الحمار صار فاهم.
الام: حسبي الله ونعم الوكيل.
( ترك الاب البيت وهج مهددا زوجته انه لن يعود للبيت وسيتزوج عليها وبعد ساعة اتصلت الام مع اختها وطلبت منها ان تعطيها نقود لاخذ ابنتها للطبيب وفي اليوم التالي اخذت ابنتها لطبيب الاعصاب)
الدكتور: من ايش بتشكي عمو؟
هدى: راسي يا دكتور بدو ينفجر.
الدكتور: ايمتا بدا معك الوجع؟
هدى: تأريبا من اسبوع وبلازمني الوجع ليل مع نهار.
الدكتور: اخذتي مسكنات او اي دواء؟
هدى: اسبرين.
الدكتور: هلأ رح اعملك فحوصات عامة وبعملك تخطيط لراسك.
( ظهلرت نتائج الفحوصات وكانت النتائج ايجابية)
الام: شو طلع بالفحص يا دكتور؟ في اشي بخوف ؟طمني ترى انا على اعصابي.
الدكتور: لا ابدا كل شي تمام واطمني يا مدام الوضع مستقر.
الام: شو سبب الوجع طيب؟
الدكتور: لهلأ مش قادر اعرف السبب بس ممكن تحكيلي شوي عن بنتك؟
الام: بنتي يا دكتور ذكية من هي و صغيرة وكل علاماتها ممتازة والاولى عصفها بس من قبل اسبوع لما بدا معها الوجع خفت دراستها وصارت تشوف الدنيا سودة وصارت تشكي انها مش آدرة تدرس ولا تركز وطول الوقت بتؤول انا مش آدرة احفظ وبنسى كل اللي درسته.
الدكتور: انتي زي اختي بدي اشور عليك توخديها لشيخ يقرا عليها.
الام: شيخ يا مصيبتي بدك جوزي يطلقني؟ جوزي بحكي انو الشيوخ نصابين.
الدكتور: لأ يا مدام انت ماخدة فكرة غلط في شيوخ بنحطو عالراس ومش كلهم نصابين .
الام: بالك يا دكتور بتشفى بنتي اذا اخذتها لشيخ؟
الدكتور: طبعا انتي ما بتآمني بالقرآن؟ رح يقرا عليها المعوذات واكم آية وتروح.
( عادت الام للبيت واخبرت ابنتها انها ستأخذها لشيخ)
هدى: شو اولتي يا ماما بدك تاخديني عند شيخ؟ بدك تاخديني عند مشعوذين لأ والف لأ ما بروح لشيخ انا سمعت يا ماما حياة اف ام بتؤول ديروا بالكم من المشعوذين اللي بنصبوا عالناس وقرات في مجلة انو وحدة ماتت تحت ايدين المشعوذين تصوري يا ماما بضربها المشعوذ بالسجادة عشان يطلع الجن منها.
الام: بسم الله الرحمن الرحيم شو اولتي جن؟؟ اذا فيها جن انا مش رايح ابدا.
هدى: احسن يا ماما ما نروح وانا بأرا عحالي قرآن في البيت.
الام: كويس بس مين هاي حياة؟ تعرفتي عصاحبة جديدة؟
هدى : لأ يا ماما حياة اف ام اذاعة رائعة بتوعي الناس وبتقدم برامج ثقافية واجتماعية ودينية وحتى في الك برنامج خصوصي لست البيت بتحدث عن مشاكل الاسرة وحلول لها وكمان يا ماما فيها برنامج بجنن للشباب اللي عندهم موهبة الكتابة والشعر والقصة وفيها برنامج للاطفال وبتصدقي يا ماما اني حسيت حالي تغيرت من لما تابعتها؟ حاس حالي انسانة تانية.
الام: شي حلو بس شو ترددها.
هدى: 104.7
الام : خلص رح اتابعها من بكره ان شاء الله.
( ذهبت هدى للنوم وقرأت المعوذات ونامت وفي الصباح اوقظتها امها لتصلي الفجر)
الام: كيف راسك؟
هدى: ان شاء الله احسن خف شوي.
الام: داومي عالمعوذات صباحا ومساء واذكار الصباح والمساء لطرد الحسد والعين والسحر.
هدى: حاضر يا ماما.
الام: ونصيحة الك يا بنتي العزيزة انك ما تحكي لحد انك متفوقة بدراستك احسن تنطرقي عين, والعين والحسد مذكورات في القرآن والسنة
هدى: شكرا يا ماما كتير عنصيحتك ورح اعمل فيها وهاي اول مرة بعرف هادي المعلومة.
الام: حبيبتي احنا في كتير اشياء بنجهلها ولازم نغير السلبيات اللي فينا.
هدى: اكيد يا ماما من بكره رح ابدا اغير حياتي.
الام وهدى بصوت مرتفع: يلا نغير