ذلي بعد عزي

زاد الاردن الاخباري -

قراء زاد الاعزاء،،

اتمنى ان اجد الحل بهذه الزاوية الرائعة وانا اكتب هنا بعد ان تعبت من كل شئ،،،،

في البداية انا امراة متزوجة منذ ما يقارب السنة حدث ان ترك زوجي وظيفته وله الان ستة اشهر انا اعمل طبعا

وراتبي جيد نوعا ما.ولكن زوجي كان ماخذ قرض قبل ارتباطه بي وانا الان من تقوم بسداد هذا القرض

وغير ذلك انا من يقوم بدفع ايجار البيت... إلي على هذا الحال ستة شهور غير مصاريف البيت من اكل وشرب

كله مني انا من باب انه انا لازم اوقف مع زوجي بهيك اوقات ..وفعلا ما همني المصاري ..صرفت مبلغ مالي كنت ادخره

في البنك وعم بصرف من الراتب الي باخذه كل اخر شهر...طبعا زوجي بيبحث عن عمل بس ما بلاقي وانا متاكدة

من انه جد مو ملاقي.. انا بحبه كتير وهو بيحبني بس المشكلة انه انا صرت احس اني كتير تعبت ومش قادرة اكمل هيك

ما بيضل معي من راتبي غير اجرة طريقي..ومع هيك ما شكيت بس اله اكم من يوم بيمد ايده علي وبيعصب لاتفه الاسباب

بستحمله من باب انه الرجل لما تضيق بوجهه بتفشش في مين ما كان بس اموره بمدة الايد والضرب عم بتزيد وانا ما

بقدر اروح عند اهلي لانه في مشكلة بيني وبينهم ( ابي متوفي) وامي مريضة جدا يعني ازا بدي اروح راح اكون تحت رحمة اخوي ومرته

الي هم اصلا ما بحكي معهم ( امي ساكنة مع اخي) ويمكن هاد الشي الي مخليه يتمادى علي عارف انه ما الي حد الجا اله ..راح تحكولي شوفي عمامك

انا ما الي عمام...والي خال واحد ما بنحكي معه ومش شغل شدة ايد... شو اعمل محتارة مشان الله نفسيتي تعبت كتير ..طبعا خلافاتي مع اهلي صارت

بعد الزواج...وانا بنت كنت كتير مدللة وكل الي بدي اياه بجيبه من راتبي ما كان عندي التزامات ..هلا مش عارفة اشتري الي اي شي..ولا عارفة احوش

شي...حاسة حياتي مش بأمان مع زوجي شو اعمل ازا بروح لاهلي اخوي راح يتمقطع في...ما الي ظهر بهالدنيا الا الله...حاسة بالذل والاهانة بعد ما

كنت معزوزة عند اهلي ...شو اعمل ؟؟؟؟؟؟؟؟؟