بحاجة إلى قرار

زاد الاردن الاخباري -

بحاجة إلى قرار

أنا شاب عمري 30 سنة، أن شاء الله قريب من التخرج والحصول على درجة الدكتوراة في أمريكا، انا بحاجة لحل ورأي مقنع، تعرفت على طالبة بكالوريوس، امريكية الجنسية، هاي الفتاة بادلتني مشاعر رقيقة عمري ما عشتها ، طبعا اثناء دراستي بالاردن ما تجرأت وصادقت أي بنت، السبب أنني شخص لا ينجب وكان هالشي وما زال محرجني كثير، المهم أهلي متحمسين لعودتي عشان يفرحوا فيي، وانا مش عارف كيف رح أفاتحهم بالموضوع، أولاً انا متردد بالزواج في بلدي لانه رح احرج نفسي واحرج أهلي، أهلي ما بعرفوا بموضوعي انه لا أنجب، ولو حكيت لبنت ما رح توافق، وهاي البنت الامريكية غاية في الجمال والأناقة والرقي، وحتى لما حكيتلها عن موضوعي أصرت أنه نرتبط وانه ما رح تحاسبني على شي ما لي ذنب فيه، لو رفضت كان ارتحت أكثر صدقوني، قلت بحالي ، هاي الاجنبية الغير مسلمة وافقت، لو انا في بلدي كان تبهدلت حتى الاقي وحدة ترضى!! وقتها زادت حيرتي، وحاليا انا في دوامة، مش عارف انا حبيتها لانه وافقت ورضيت فيي، مع انه هاد الشي جارحني ، وانه نفسي اكون أب، طبعا العلاج صعب او مستحيل، المهم، انا امام خيارين، ارتبط فيها أم ارجع ادور في بلدي، مشكلة انه ابحث في بلدي مش مرتاح الها لانه ما بدي الموضوع ينتشر، يعني لو رحت تقدمت لبنت، وحكيتلها، ورفضت، رح تفضح الدنيا، وكل بيت بدخله رح يكونوا عارفين بموضوعي، وانا ما بدي هيك، بدي زوجتي بس تعرف، طبعا حقها ترفض وانا مقدر ومحترم لهشي بس ما في ضمان انه ما تحكي سبب الرفض انه هذا الرجل عقيم، وبالتالي احراج لي ولرجولتي وكل رجل بعرف مدى صعوبة انه كل الدنيا تعرف انه انتا ما بتخلف، كيف ممكن الاقي زوجة توافق وما تشوف هالشي مشكلة، طبعا ممكن حد يقول لا انتا اول واحد ولا اخر واحد ما بخلف، نعم بس ما بحب حدا يعرف هالشي وما الك حق تعرف، فبالتالي انا مجبر اكون تحت رحمة كلام الناس اللي انا في غنى عنه، وانه اجرب واغامر وتطلع بنت مش كويسية وتفضحني شي مزعج بالنسبة لي، وصرت أفكر بانه فعلا ارتبط بالفتاة الامريكية، لو كشخص كنت مكاني شو رح يكون تصرفك ولو كنتي بنت وصادفك شاب مثلي شو رح يكون تصرفك، فعلا انا بحاجة لقرار.