شئ محير فعلا

زاد الاردن الاخباري -

السلام عليكم ياقراء زاد الاردن عامة والمحرر خاصة .

انا بدي احكي شغله هي غريبة شوي ويمكن ماتتصدق ويمكن في ناس كتير ياخدو الامور بمسخره بس بتمنى انه الامور تنفهم بطريقة صحيحه .

القصه هي انه والدتي عمرها 50 سنه تقريبا عندها مايسمى الحاسة السادسه من وهي صغيره. بس بطريقة بتخوف شوي يعني بتحكي اشياء بتصير فعلا وبتعرف شغلات صايره مع الواحد طبعا مستحيل يكون وصللهاالحكي او الموضوع بس بتعرف .انا مابحكي بتنجم او بتفتح بس بتحس و99% من كلامها بطلع صح . ومره من المرات حكتلي انه ماافوت اتحمم هلا لانه حاسة انه الكيزر رح يصير في اشي .وفعلا اول مافتت مااخدت بالحكي والكيزر فعلا ولع . وشغلات من هالقبيل بس بطريقة فعلا فعلا مخيفة حتى احنا وازواجنا منعرف هالشي .

هلا اللي صاير ومن شهرين تقريبا بتضل تحلم او تحس حدا بيحكي معها بس بدون ماتشوف اشي وبحكيلها ايات قران وبوصللها بطريقة بس بدون ماتشوف اشي انه هاي الايات لفلانه واقرئيها عليها بتتحسن ومن السوره هاي .بتقوم بتفتح القران بتلاقي الحكي مزبوط ميه بالمية وبتكون زي ماحست انه انحكالها .تعبت كتير وصارت نفسيتها تتعب من هالاشي والموضوع كبر كتير وصار شبه يومي وهي ماحكت لحدا غيري عن اللي قاعد بصير باخر فتره لانه ماحدا رح يصدقها بس فعلا امي بلشت تتعب وتخاف من هالاشي .لدرجه هداك اليوم سالتني عن مرة صاحب لزوجي كانت شافتها قبل اكتر من سنتين وحكتالي اسال زوجها يستفسر عن وضع هاي المره ويتاكد انه مالها اشي او رجلها مالها اشي .والصدمة كانت انه فعلا هاي المره حامل وصابتها جلطه على رجلها .وقتها نصدمنا كلنا لانه مستحيل امي بتقدر تعرف لو بالصدفة اي اشي عن هاي المره ولا باي طريقة هاي في حال انه حدا قلي بجوز سمعت من حدا . دايما بييجيها هاي الاحلام وانها لازم تصير تقرا قران على الناس التعبانين وهي مش عارفة شو تعمل وبطلت تقدر تنام او تطلع من البيت .وهي كانت تقرا زمان على الصغار عنا وفعلا كانوا يتحسنوا بقدره الله