الرصيع الاردني

زاد الاردن الاخباري -

اللي يمسك رزنامة سنة 2012 وقاعد على مكتبه , يقدر على ما اظن انه يقلّب باقي الرزنامة , وهو عارف ما رح يتغير شي , ويمكن كمان يتنبأ بألاحداث الجايه ( اذا كان واسع الخيال) .

مثل مصير حبة الزيتون تعرف اخرتها يمر عليها الربيع والخريف والصيف والشتا وبعدين ( تنّجد )بعصايه او حجر ....تنغسل بعد البهدله والضرب وتنرصع بالمرطبان وينحط عيها حار + حامض وتتقدم كمقبلات قبل وبعد الاكل .

وسنة الرصيع الاردني , راحت بعد مرور اربع حكومات وسفرها من فوق ظهر الشعب , فالحكومات اتبخرت او اتناثرت قبل ما تكمل فصل واحد من فصول الدراسة السياسية , لكنها قدرت تكمل كل فصول المسرحية على خشبة مسرح الدوار الرابع , وهيك لا امطرت ولا ازهرت لكنها سقطت من رياح الخريف او من حرارة الصيف ,
وعمك حراك باشا الشوارعه مر عليه كل الفصول وما خلى ( مكثور الخير ) مطلب من مطالب الناس الا غطى مساحته , الا ان مرطبان الشعب لما تفتحه ما رح تلقى حبه وحده تغير فيها ريقك الصبح , لسبب بسيط ان اللي يزيدوا ميه بالمرطبان كثروا فهذا يحط ميه وهذا يحط حار او حامض , عشان هيك طلع بدون طعم , لا حامض ولا حلو , وكمان (مهمط) , يعني ذايب مثل الخبيصه , لا طعم ولا لون ولا شكل ,,
ومرطبان حاجات الشعب شفّاف ويلالي ملالاه , وما بده حدا يوقف عنده وينادي شوفوا حاجات الناس (يخلف عليك ما قصرت , كل شي بالمرطبان مبين ) انت بس خذ راحتك ,
والشعب الاردني ولله الحمد مرت عليه سنة الرصيع العربي , بنتائج ما تخفى على اي واحد يفهم بالمخللات ,وكمان رح يطلع بنتيجه هذا المخللاتي , ان الاردني ممكن تمر عليه سنوات رصيع عديده دون ان يتغير لونه او طعمه اوحتى شكل يافطته , شعب رويان ميه وسماد بلدي وصل للجذور وطلع على الجذوع .

وهسا الاردن على كيف كيفك من الشمال للجنوب والصحن اللي حطه الحراك , ما حدا ذاقه حتى الان , بأنتظار الاذان تبع رمضان , اللي مش وقته ورمضان اللي ما وراه عيد .
يكفيكوا ويكفينا , ضغطوتنا بهالمرطبان وريحة الحار والحامض قتلتنا ........


فيصل البقور