ادمان !

زاد الاردن الاخباري -

مرحبا
اعزائي قراء موقع زاد بداية اعذروني على الكتابه باللهجة العامية فلست من محترفي الكتابة باللغة الفصحى
انا واحد من المعلقين معاكم وحبيت اشاركم بهواجس او افكار معينه مسببتلي قلق ممكن تعتبروها فضفضه او

مجرد الحكي للشعور بالراحه النفسيه واعرف شو ارائكم
قصتي بدت من اخر سنه بالجامعه انا تخصصي اله علاقه بالكمبيوتر ووقتها تعلمت بطريقتي الخاصه اختراق

الايميلات والحسابات الشخصيه طبعا بالبدايه كنت متشجع انه اجرب وادخل عالم الاختراق من كتر ما سمعت

قصص عنه بعد هيك بديت اهكر حسابات الناس المقربين الي عالفيس بوك والمواقع التانيه ! وكانت كل القصه من

باب الفضول والتسليه بعد هيك اتطور الموضوع مع الوقت والخبره ووصلت لحسابات ناس ما بعرفهم واطلعت

على بياناتهم الشخصيه وملفاتهم الخاصه على اجهزتهم وصارت الشغله كأنها ادمان عندي خلال هاي الفتره

كلها ما كنت حاس بأي شعور من الذنب لأنه مفكر انه هاي ميزه بتميزني عن كل الي بعرفهم وبتعامل معهم

واكتشفت فيها العلاقات بين الشباب والبنات الي بعرفهم وغيرها كتير ومن الرسائل الخاصه كيف بيكونوا قدامي

بوجه برسائلهم بكونوا ينتقدوني او بذموا في شخص تاني وقدامه بيمدحوه بالمختصر تعبت نفسيا من النفاق ومن

موضوع انه انا اكون مطلع على اشياء المفروض ما اعرفها وبعد هيك لما صاحبها يحكيلي عنها ما اتفاجأ لاني

فعليا عارفها
استمريت على هالوضع ومع الوقت صرت احس انه ضميري مش مرتاح واني بعمل اشي غلط لحد ما فقدت

شخص عزيز جدا علي وحسيت وقتها انه الفقد عباره عن عقاب ووعدت ربي انه يسامحني ويساعدني أترك

هالشغله هاي كلها وفعلا التزمت لمدة 6 شهور تقريبا بعد هيك للأسف بالتدريج رجعت لنفس الوضع بس انا مش

مرتاح لاني متخيل انه متل ما اترسخت مبادئ وافكار براسي عن مواضيع معينه بالحياه كمان الهاكينج رح

يكون متلها وما رح اقدر اتخلص منه او انساه يمكن رح تشوفوا انه شغله سهله بس صدقوني انه هو ادمان

مستحيل اعرف اي معلومه عن حد وما اروح اجرب اوصل لكل معلوماته !
كيف ممكن اتعالج من هالادمان لاني عن جد مش مرتاح نفسيا ومتل ما بتعرفوا التعب النفسي اصعب بكتير من

الجسدي .
لجأت لهاي الزاويه عشان اقرأ ردودكم لانه مستحيل اعرض هاي المشكله على أي شخص بعرفه ما في حدا

بيعرف عن الي بعمله الا بس واحد من اخواني والي طبعا مبسوط علي !
بستنى ارائكم بكافة انواعها وشكرا للجميع ..