جدكو طعيس يكتب : ول عليكو خلولي قطمة

زاد الاردن الاخباري -

اني خيوه ختيار اردني ما عندي غير تاريخ نظيف بالعسكرية ودمي على سور القدس يشهد اني عربي مسلم ظحيت وجاهدت يوم ما انهزمت العربان كلها وظليت والنشامى اندافع عن القدس وعن شرف جداتكو وعن الشعار .

عندي طلب منيش عارف كيف بدي اقوله ويا خوفي ما حد يسمع لهالختيار ولا يروح مخكو لبعيد ما بدي قطمة خبز لانه الله من فوق كافيها وانا اردني عزة نفسي وكرامتي عندي اياها بالدنيا .

( اللي بدي اقوله ولكو يا ملعون شيطانكو خلولي قطمة ادافع بيها عن سيدنا ) .

كل شي مليح بهالبلد بتخربوه وكل سولافة بيها عزة وكرامة للاردني بتجقموا ثمها وكل قرش بيجينا اذا ما لهطتوه بتبعزقوه عالحكي الفاظي وكل هامل فاسد انفخ كرشه بالمال الحرام بتطبطبو عليه واكثر مسؤولينا موش قايمين بواجبهم بدهم سيدنا يركظ وراهم ويقوم بالواجب عنهم وكل سرسري اجينا بدنا انحاكمه فزعتله جماعته .

والمعارظة مهيش مقصرة عالفاظي والمليان واقفة على اجر ونص بتطرق بالعرش وكل غلط بهالبلد من يوم ما الله خلق الدنيا بدهم يديرو على ظهر الملك ويا حسرتي على هالشب وشو بده يتحمل تا يتحمل من قرف المسؤولين والمعارظة .


اللي بدي اقوله بدنا راص فساد كبير تفغشه المحكمة بدنا تنمية اتلحلح الوظع بمناطق الفقر مثل الطفيلة وعجلون والبادية وتشغل شبابنا الداير ورا مراقع فقس بدنا هبة وفزعة النشامى الاردنية ونقول للمسؤول اللي ما بقوم بواجبه انه هامل ويا بتصير زلمة او بنكحشك من محلك .

ها تشيف لعاد بدي قطمة ادافع بيها عن سيدنا وقبل ما اختم بقول للاردني اني بعرف ابوك مثل جدك الله يرحمه زلمة مليح وقد حاله وابن بلد ياما حرث بتراب الاردن فلا تظيع تعب ابوك وبقول لكل ناقص بفكر انه سيدنا ما عنده فزعة والله لو ما ظل غيري بالبلد ما بترك ابو حسين .