طخطخه وغناء .. ساخر

يا اخي الكريم . يا حبيبي انا بدي اوضح شغله او اعلق على هاي الامور .. انا اللي لاحظتو ان العرب بجيدو نوعان اثنان من الغرائز الفطريه او المتوارثه جينيا او ما بعرف السبب الا وهما ( الطخطخه والغناء ) .. كمقدمه للموضوع .. لما انقام الربيع العربي بعد سبات عميق ويا ريتو ظل نايم على البلاوي ال بنشوفها من الاثار المدمره والنواحي السلبيه للربيع العربي الذي .. فهم خطأ .. وفسر خطأ .. واستغل خطأ .. وعمل به خطأ . ووزع خطأ. وخطط له خطأ .. هو بمجمله ربيع حنون طيب مسكين وديع يا باي ما احلاه .. يوم ما بلش يأخذ منحى العنف خرج من عروة ونطاق واطار الربيع العربي واصبحت مطافشه معاكسه مفاعطه عند وخذني اجيتك .. بدأ العرب الربيع العربي جيدا اول خطوتين بس يعني بنسبة 2/100 بالمائه فقط بعدين اتخلوا عنو واتخلى عنهم .. مين قلكم انا احنا بالربيع العربي .. والله اكاد ان اجزم ان الربيع العربي لم يبدأ معنا المشوار الا اسبوع من تونس وبعدين الربيع العربي سحب حالو ونام .. من قال لكم بأن الربيع العربي موجود معنا وما يحصل الان هو ربيع عربي .. هذا الذي يحصل هو (اخو ) للربيع العربي واسمو ( الكسوف الحربي ) واختو اسمها ( الخسوف الدموي) بالظبط هذا اللي صاير بس حصل التباس واتهم الربيع العربي زورا ويبهتانا بما يحصل .

هسه نيجي لموضوع الفطائر الغريزيه عند العرب ..اولهما ( الطخطخه ) يا عمي اللي لاحظتو ان كل العرب اجمالا وبالاخص من اجتاحه الربيع العربي برمشه عين ما شفت الا والشعب مسلح وبعرف يطخ بدون ما يخضع لا لتدريب ولا ما يحزنون .. فورا وبدون تدريب مثلا بليبيا او اليمن او سوريا او بأي مكان يبلش العنف نتيجه الربيع العربي الا وببلش الشعب طخطخه على الجيش والجيش ببلش طخطخه على الشعب ... الجيش قول امر الله مدرب .. امر غير مستغرب .. بس الشعب العربي هيك ببلش طخطخه هو في شغلتين تفسير لهذه الظاهره يا اما الاسلحه الحديثه سهله الاستعمال .. يا اما العاب الاطفال تركت اثر نفسي جيد بسبب صناعتها القريبه من الاسلحه الحقيقيه مما سهل مهمة الناس باستخدام الاسلحه الحقيقيه فيما بعد . او ربما غريزيا وفطريا احنا بنحب الطخطخه.

نيجي على الموضوع الثاني والذي اثار فضولي ولفت انتباهي وجعلني بحيرة من امري الا وهو ان برامج ( الغناء ) من سنتين وجاي اللي انتشرت على الفضائيات ( اخبط ) الا وكومة المطربين والمغنيين متجمعه بهالبرامج وخذ على غناء وطرب .. يا عمي استنتجت انو ما يعادل 99 /100 بالمائه من الشعب العربي بعرف يغني ... الكل بغني .. بغض النظر بعرف يغني على الاصول او بدون سلم موسيقي المهم بشوف انو الجماعه بتمشي مع هالموسيقى وبتغني .. ما بعرف شو السر بهاي الشغله .. اي اميركا بطولها وعرضها طلع منها ممن بين 250 مليون مواطن وبني ادم مغني واحد ومغنيه واحده على مدار 20 سنه .. كل 20 سنه بطلع واحد جديد .. وكذلك بالنسبه للدول الاوروبيه وبقيه العالم .. الا احنا العرب غريب عجيب .. كل يوم بطلع من عنا مليون مغني ومطرب .. ودور يا صحن السكر .. وقع مني وانكسر .. ( هاي مطلع اغنيه للاطفال بغنوها لولاد الصغار وهم بلعبو بحوش الدار او بحوش (الكارادور) في الشقق المفروشه – انتهى الاقتباس .

فاجتمع لدينا نحن العرب مسألتين مهمهات ( الطخطخه والغناء ) .. يا بنغني يا بنطخ .. هيك ابصر كيف ما بعرف .. هذول مسلمات حتميات متفق عليهم بدون نقاش ولا حتى بقرار من مجلس الامن .. هذول مكتوبات بشهادة الميلاد تحت بند ( مهارات ) .. وكثير قد نجمع بين هاتين الغريزتين بواقعة واحده مثل ( الاعراس ) بنغني وبنطخ .. نحتفل وبنطخ . اللي عليك عليك خلص حالك.
انا شخصيا بكون حاطط على فضائيه اشوف فيها اخبار الاحداث القائمه بسوريا او بمصر او باليمن وعند ما ينتهي الخبر بقلب على اي قناة بتفاجأ بأن الفضائيات اتعبت وانتلت برامج مواهب الغناء .. بنتقل فورا من الاحداث الدمويه الى الاحداث الطربيه والغنائيه .. طبعا انا كشاب هيك بشتغل .. اما النسوان اغلبيتهم يتنقلون بين الفضائيات اللي فيها يا مسلسلات تركيه او برامج الغناء والطرب بحبوش يسمعوا اويشوفو اخبار.

شو المقصود من جك الحكي الطويل والعريض اللي صرلي ساعه بحكي فيه .. شو المقصود ؟.. المقصود انو احنا العرب فرحنا عجب .. وحزنا عجب .. والتعبير عن اراءنا عجب .. واخذ حقووقنا عجب .. واداء واجباتنا عجب ..

تم تصنيف نوع اخر من الغرائز الدفينه ضمت الى المجموعه الفلزيه ( الطخطخه والغناء ) الموجوده عنا احنا العرب الا وهي .. الجعجعه .. وهي عباره عن اداه وتريه يستخدم فيها الكلام كاسلوب للطخطخه على الغير بدون وجه حق .. تحقق اصابات جارحه معنويا للغير بتخلي الواحد يشك بحالوا ويقرف الارض اللي بمشي عليها... ويصير يحكي بينو وبين نفسوا ( معقول انا هيك ) ( معقول هذا الزلمه او هاي المره بتحكي صح ) ( معقول هيك نظرة الناس اللي ) وجر .. بتروح معاه 5 سنين وهو بحاكي حالو .. عطبو .. دمروا .. لو في عند الواحد ذرة معنويه وذره عطاء راحت شطب .. تقهقر وتراجع واندحر .. وانصهر وانلخم وببحط بمحلوا . لا من ثمو ولا كمو .. وبعدها يا بصير يطخ يا يغني.

الاختراعات .. نحن العرب نشتهر بالاختراعات ومنها .. الصوتيه الخارجه من الحلق او من فوهه البندقيه .. وللاسف لا تجد لها سوق عند الغرب .. لان اختراعاتهم تجاوت حدود الصوت وحتى الضوء .. ودور يا صحن السكر .. وقع مني وانكسر ... اي حتى اغانينا فيها تكسير وتطبيش . لعاد ..

ملاحظه : انا لا اجيد الغناء ولا الطخطخه ولا الجعجعه .. انا اجيد بصراحه بيني وبينكم ( النوم الشرقي .. على القعده وهص) .
والسلام عليكم