بدها صبر

تململت في فراشي ، هناك شيء يؤرق نومي ، وصوت مزعج يقاوم نعاس جفوني ليحرمها لذة النوم ، نظرت الى الساعة فوجدتها تشير الى السادسة والنصف ، وقلت في نفسي \" يا صباح يا كريم \" ، أخبأت رأسي تحت المخدة وغطيت رأسي باللحاف ، فباتت هذه المحاولات فاشلة للهروب من هذا الصوت المزعج والمؤرق .
الصوت صوت محراث \" تراكتور \" ، والوقت ليس وقت الحراثة لا الشتوية ولا الصيفية ، والنعاس يجعلني في حالة \" هذيان \" ، فيما يغريني دفء السرير للبقاء ، ولكن ... مع هذا الصوت \" هنيال النعسان \" .
قمت من فراشي ، اتجهت الى النافذة وتبعت مصدر الصوت ، لأجده قادما من منزل \" ابو صابر \" ، تعوذت من الشيطان الرجيم ، وقلت أمسح وجهك بالرحمن وانزل شوف \" علام البين صابحه على هالصبح \" وفعلا نزلت متثاقل .
انا : صباح الخير يا ابو صابر شو هالنشاط وشو بتسوي ؟!! .
قال لي دون ان يلتقت الي : زي ما انت شايف ، بحرث الارض عشان ازرعها.
انا : تزرعها ؟!! وشو بدك تزرعها بلا صغرة ؟!! .
أبو صابر : وشو في غير الصبر .
انا : صبر ؟!!
أبو صابر : وليش مستغرب ؟؟ .. يا زلمة كل ما بحكي اشي بقولولي بدها صبر ، كل ما نشكي من مسؤول بقولوا بدها صبر ، كل ما برفعوا هالاسعار وبنشكي بقولوا بدها صبر ، كل ما نوكل هوا بقولوا بدها صبر .
أي بدي ازرع هالصبر واخلص بلكي يتغير هالحال والوضع .

المحامي خلدون محمد الرواشدة
Khaldon00f@yahoo.com