يا دينار الخلوي .. وين رحت ؟؟؟؟

للعلم فقط ........ هل تعلم أخي الأردني بأن الأردن من الدول التي سبقت كثيرا من الدول المتقدمة في مبالغة اقتنائها للأجهزة الخلوية حيث أن الأجهزة الخلوية فيها تفوق عدد السكان أربعة أضعاف أو أكثر حيث قيل لو أن هذه الأجهزة تم صفها على الحدود الأردنية من الشمال إلى الجنوب ومن الشرق إلى الغرب فإنها ستزيد ليتم صفها مرة أخرى لا أعرف هل هذا ضمن الظواهر الطبيعية أم لا؟ خليكوا مع السؤال الأهم وهو أين يذهب دينار الخلوي الذي يتم استيفائه من كل المواطنين والذي قدر هذا العام بمئات الملايين ........ أبو حمدان : خير يابه يا حمدان مال صوتك طالع ما تستحي على حالك شايفنا عايشين ببطين ما بيش عنا جيران استحي وزوق على حالك شويه لويش معصب ؟
حمدان : أي ما هوه يابه إشي بعصب عن جد والله أنا وصحابي صرنا مش عارفين بنحط الرصيد من هون بتلاقيهم قاطشين الليرة من هون قال رسوم للجامعة والله عال!!!!!!!
حميدة بتدخل بالنقاش : بتعرف إني أنا ما بسدق هاظا الحكي كله لأنه لو إنه صحيح بروح للجامعات ما بتلاقي الجامعات بالأردن بتعلن إنه بيه بموازنتها عجز وعليها ديون .. ما تقنعني وين بروح دينار الجامعة؟ أبو حمدان : أي هيه أجت عالليرة يابه وكل هاية العصبية مشان ليرة عفا عليك ولا يهمك هاك خذ واشحن شو صار يابه يا حبيبي ما انته الحيلة والفتيلة .
أم حمدان : يا ربي دخيلك أي هوه حمدان صار بالجامعة مشان يخصموا عليه نيرة ؟؟
حميدة : هاظا يمه إنتي بواد وإحنا بواد أنا بدي أفهمك السولافة بطريقة أوضح من هيك مشان تقولي والله معكوا حق يا عالم. طلي عليه إنتي وأبويه وركزي معايه كويس هسا بدي أحكي أرقام .
1- إحنا أكمن خلوي عنا بالدار ومع التلفون الأرضي أم حمدان : 4 خلويات وتلفون أرضي
2- حميدة : حلو يمه هظولا خمس نيرات من عيلتنا بس بروحن للجامعة ولا تنسي إنه التلفون الأرضي كل شهر بدك تدفعي عالفاتوره نيرة الجامعة خلينا هسا بالخلوي إذا على مستوى عيلتنا الصغيرة هيك المبلغ هاظا وإحنا كل واحد معاه خلوي روحي شوفي صاحباتي بالجامعة اللي معها خلويات اثنين واللي ثلاث وبيه ناس والله أكثر وهظولا على كل خط ليرة يعني من الشخص الواحد وشوفي الأردن كلها كمن تلفون خلوي بيها بتسدقوا إنه الخلويات بالأردن عددها أكثر من عدد الشعب الأردني معنى هاظا الحكي إنه بالملايين هايه الشركات بتحصد كل سنه من الناس .
3- أم حمدان : تراني هسا فهمت شوهوه اللي بصير والله معاكوا حق يا ولاد هاية النيرة بتجر ملايين الليرات وبتخزق الجيبات ؟؟؟؟
4- أبو حمدان : ولا تنسي يا أم حمدان إنه اللي فهمته بوخذوها من كل الخلويات بغض النظر طالب جامعة أو غيره أبس همه بقولوا إنها بتروح لخدمة الطالب الجامعي !! إذا الطالب الجامعي كاسة مية بالجامعة ما بلاقي لا بالخاصة ولا بالحكومية بشتري المية مشترى شو هالحكي هاظا اللي ما إله طعم الظاهر إنهم بضحكوا على الناس لازم مثل ما بوخذوها غصبن عنا نعرف وين بتروح إحنا مش معترضين إذا إنها فعلا بتروح للطالب الجامعي لكن والله ما إحنا لامسين إشي لا عالطالب ولا عالجامعات اللي عنا لازم يكون بيه جهة رقابيه عنا تتابع أمور اقتطاع الدينار الإجباري اللي ما منعرف وين بروح ؟ حميدة : ما هيه يابه مبينه هاظا الدينار بروح تحسين أحوال لموظفين الشركات وتزبيط الروس الكبيرة بيها ولا من شاف ولا من دري وبعدين مشان يسكتوا الناس بطلعوا واحد مدير نص حكيه انجليزي على التلفزيون وبقول دعم الطالب الجامعي واللي بنجح بالتوجيهي إله خلوي ويا حرام زي ما صار مع صاحبتي (جود ) جابت 96 ولما فتحت الخلوي اللي أهدوها إياه طلع ما بوصل حقه 10 دنانير والله هايه المصخره ولا بلاش ؟؟؟ !!! حمدان : لحد هسا بقول وين بروح الدينار ؟؟
وأنا من هذا المنبر أسأل أين تذهب ملايين الدنانير التي تسلب بحجة الجامعات أليس من حق أبسط مواطن في هذا الوطن أن يعرف وييييين بتروح ليرة الخلوي تبعة الجامعات ؟؟؟
يتجدد اللقاء دائما على أمل أن يجد المواطن الأردني إجابه على هذا السؤال وعلى غيره من الأسئلة ................والله من وراء القصد .
الى اللقاء مع يوميات ........ ابو حمدان في موقع اخر
Hikmat_b@yahoo.com