اللجوء السياسي .. ساخر

قرأت خبر مفاده ان جماعة ( الاثار ) بمصر لاقوا بني ادم صغير شكلو غريب .. ويعتقد انه أتي من عالم اخر .. كوكب اخر .. ولوحظ ان هناك رسومات على جدران الاهرامات لاشخاص غريبي المنظر اشبه بمخلوقات فضائيه .. وهذا دليل على وجودهم.

قيل ان هذه المخلوقات الغريبه اتت من كوكب اخر لمساعدة الفراعنه من ناحيه الاستشاره ومن الناحيه العمرانيه ومن الناحيه الاستفاده من علومهم التي يقال انها متقدمه عن علوم الارض .. وفي تفسيرات اخرى منهم من قال انه عباره عن ( طفل خداج ) تم اجهاضه قبل ولادته . اي طفل غير مكتمل فظهر بالشكل الغريب والغير مكتمل . وخاصة انا شخصيا شفت الصوره .. ما ألو ذنين .. وعيونو وساع .. ومما اثار الاستغراب ان هذا المخلوق ( محنط ) بمواد مخلوطه من الاشياء الغاليه ومن ( الذهب ) ومكفن ومظبط بطريقه مظبطه وفيها هيبه وفخامه .. يعني ان دل على شيء دل على انو هذا الزلمه باقي زلمه محترم والو وزن وقيمه وشعبيه ..

أنا ألي وجهه نظر اخرى قد تكون مستغربه وبعيده كل البعد عن التوقعات .. انا بقول هذا الزلمه ( الله يذكروا بالخير ) بلا شك انو من كوكب اخر .. هاي متفقين عليها .. بس شو جابو لعند الفراعنه وعلى كوكب الارض هون السؤال الكبير ؟ .. انا بقول هذا ( لاجئ سياسي ) .. ما حدا يراجعني .. مهي مبينه .. يعني بدو واحد يقنعني انو بالكواكب الاخرى ما فيها اضطرابات سياسيه مثلا .. مستحيل .. اكيد صاير عندهم ثورات وانقلابات او يوجد لديهم احزاب معارضه او كوكبهم تعرض لغزو خارجي او احتلال .. ممكن عندهم اشي اسمو ( اسرائيل ) مثلا بس بأسم ثاني .. وهذا الزلمه متحملش ... يمكن عملو فيلم على كوكبو فقاموا جماعه مناهضه الو يا اما ( نفو ) او هو هرب الى كوكب الارض وطلب اللجوء السياسي .. ولحسن حظو نزل عند جماعه اكرموا واستفادوا من خبرتو ومن علموا ..

اذا صح قولي فأن ( الانتربول الكوكبي ) بلا شك أجتو (مذكرة جلب ) لهذا المخلوق .. وانتشر الانتربول الكوكبي في كل المجرات بحثا عن هذا الزلمه .. والله اعلم انو في زيو كثير انتشروا بين الكواكب المختلفه .. والدليل في ناس بتشوف ( اطباق طائره ) بين الفتره واختها اطباق غريبه تجتاح الارض .. مش ممكن هذول هم جماعة الانتربول الكوكبي او ممكن من الجماعه الحاقده عليه من كوكبو وبدهم اياه مستعجل وجايين يدورا على هذا الزلمه ويجلبوا معهم ... او ممكن مطلوب على جرائم فساد او قتل او تحرش جنسي ما بنعرف .. لعاد شو جابو لعنا .. شمة هوا .. مستحيل ..

سياحه .. مستحيل .. جاي يتبضع عنا مستفيد من فرق الاسعار مستحيل .. جاي يشتغل بسبب وجود بطاله عندهم .. والله هاي ممكن .. ليكون والاحتمال الاقوى ممكن جاي يهرب دخان ( مارلبور ) ما بتعرف ... بس انا برجح خاصية ( اللجوء السياسي ) هذي اقوى لأنو الزلمه من شكلوا باين عليه سياسي .. لعاد ليش ( فرعون ) اهتم بهذا الزلمه وحطو مستشار عندو هيك الكتابات الليغرموافيه ما بعرف شو اسمها بتقول عن هذا الزلمه .. والادهى والامر ومما يعزز نظريتي انو لهذا الزلمه اسم .. واسمو (أوسيرونت ) بعرفش هو هذا اسمو الحقيقي كما سما ابوه بكوكبو ولا فرعون سماه هذا الاسم .. بس اكيد هذا اسمو الحقيقي لأنو الزلمه اكيد خبرهم بأسمو ويمكن حكالهم قصص كثيره عن كوكبو ..

الفراعنه فورا لما نزل عندهم ما ( سوو / فرجه ) ..على السريع شغلو .... لو نزل عنا بزمانا هذا كان يا حفيظ السلامه لمو عليه مصاري .. وحطو بقفص .. وتعال شوف .. وعلى ارفع ايدك .. نزل رجلك .. كاكي .. اغمز ... وهات يا لم مصاري .. لا يا حبيبي .. الفراعنه جماعه بتفهم وحضارتهم متقدمه واساسها مبني على العلوم والاختراعات والاكتشافات عالم متقدم .. واكيد هذا ( اوسيرونت ) كان يوكل ويمش بالشارع والناس اتعاملوا عادي ..

- كيفك اوسيرونت .
- بخير .. ماشي الحال .
- اشتقت لأهلك ؟
- والله ليش الحكي الواحد بحن لكوكبو وبشتاق لأهلوا ... بس ولاد الحرام ما خلو لمخلوق زيي محل بكوكبي .

- الله يفرجها عليك يا اوسيرونت .
- تسلمولي يا رب.. الله يخليكم .
- وكيف فرعون معاك .. متريح بالشغل عندو ؟ ..

- لا والله والحق يقال .. فرعون على سلامتو .. مكرمني وانا بصراحه مش مقصر معاه .
- بدك اشي يا اوسيرونت .

- لا سلامتكم . بدي انزل على ( الترعه اشوي ) اغير جو وارجع على شغلي.
هذي المحادثه بالعصر الفرعوني ... اما لو اجا عنا وبعصرنا كانت دارت المحادثه التاليه مع حبيبنا اوسيرونت.
- يقطع شيطانك يا اوسيرونت .. بلاقي معك سيجاره .
- لا والله بدخنش .
- ولا قطعه حشيش .

- يا زلمه احنا ما عنا هاي السواليف .. انا زلمه عندي قدرات كبيره بأمكانكم تستفيدو منها بدل من هالحكي الفاضي .

- سيبنا منك يا اوسيرونت .. اسمع بتعرف تحرق كاوتشوك .
- يا ساتر استر .. وليش الكاوتشوك .

- يا زلمه عنا مظاهره يوم الجمعه وبدنا اياك تطلع معانا وجاهه .. يعني حتى انقدم رساله واضحه للجميع انو حتى المخلوقات الثانيه من الكواكب الاخرى مش عاجبها الوضع .

- يا زلمه انا هربت من كوكبي من ورا هاي السواليف .. انا جاي لعندكم لاجئ سياسي .. وعتقت السياسه . لو بدي هاي السواليف كان ظليت احرق عجال كاوسوك بكوكبي ... وهي ( العجال وراي وراي ) سيبوني منكم .

- طيب شو رأيك نعزمك على اكلة محاشي .
- محاشي ؟
- انا بس لو اعرف ارجع على كوكبي بس .. ولو بنعدم مش مشكله .. بس لو بدكم تساعدوني اتسلموني للانتربول الكوكبي . سايق الله عليكم يا جماعه .
- له .. له .. يا اوسيرونت .. ليش زعلان .. مين زعلك .. هينا بنوخذ وبنعطي بالحكي .. خذلك نفس من هاي السيجاره بتنسيك همومك .. اسحب .. قوي قلبك .
- اللهم طولك يا روح ..
- اوسيرونت .. بلاقي معك خمس ليرات لاخر الشهر .
- معي اشوية دولارات .. بس اعمل ( exchange ) بعطيك.
- شو رقم تلفونك اوسيرونت .. بدي اياك بشغله .. بدي اوديك عند ناس تنكشلهم الزريعه .. بتطلعلك بعشر ليرات امناح .
- انكش زريعه ؟ .. بدكوش واحد ايخيطلكو ملاحف ووجوه مخدات .. حسبي الله ونعم الوكيل بس.

وفرضنا عاش معانا بالطول والعرض واتحمل هاي السواليف والقصص وبعد عمر طويل ومات .. بظل بالثلاجه اسبوع وبعدين بدفنوا ( اتكرفت ) بأقرب جوره .. بلا تحنيط ولا هيبه ولا ما يحزنون .. طبعا بكون ادمن ارجيله ودخان وشبع بطاله وعاف القرد تبعوا .. وبعد ما يكون ندم اشد ندم انو اجا لعنا ..

لحسن حظ اوسيرونت انو اجا بزمن غير زمانا .. ولا كان يا دبوا على الجبهه السوريه .. او لبسوا حزام ناسف وفجر عرباية بطاطا بلندن . او سرحو بطنجرة ضغط ملغومه .. او قعدوا على بسطه دخان .. او استغلوا يبيع ضمم فجل ومخللات وعصير تمر هندي وخروب برمضان .. او حرثوا عليه على الطالع والنازله .. وفرضنا انو اوسيرونت رجع بعد فتره على كوكبو بوسيله دبر حالو فيها وما مات بزمن الفراعنه شو كان راح يحكي عن الفراعنه .. اكيد راح يذكرهم بالخير ويحكيلهم عن التقدم العلمي واختراعاتهم وحضاراتهم وانو بفتخر انو شارك بحضارتهم .. ولو فرضنا نزل بوقتنا وبزمانا ورجع عند جماعتو شو كان بدو يحكيلهم .. راح يقولهم انتو يا جماعه بألف نعمه .. هذول جماعه عندهم مليون نوع من الدخان ومقضينها اتصالات بالخلوي وبشكو اكثر ما بشتغلوا وبتخوثوا علي وعلى غيري وطاسه وضايعه عندهم واكثر اشي عندهم ماشي ( العلكه ) بحبو العلكه كثير والشيبس ومش متفقين على اشي على سولافة خذني اجيتك .. اي والله ما صدقت اروح لعندكم ولو بدي انشنق .. يمكن جماعتو يتعاطفوا معاه ويعفوا عنو وعن البلوه اللي سواها .. ويعتبروا نزولو على الارض بزمانا اشد عقاب الو وانو اخذ جزاءو .

احمد ربك يا اوسيرونت انك طلبت اللجوء السياسي بزمن غير زمانا .. نام قرير العين وقول الحمد لله .. الله يرحمك .

ملاحظه : انا شخصيا لو اتعرفت عليك يا اوسيرونت كان اكرمتك وضيفتك واحترمتك واعطيتك انطباع جيد عن عصرنا وعن حضارتنا وكان ما خليتك تعتاز حدا وكان نزلتك معي على الشغل .. بتعرف تطرش ؟ .

والسلام عليكم