طلع أبو عقيل كشكول

ابو فهمي بيقرا الجريده و خبر تعيين ابو عقيل امين لبلدية بصيرا (بصيرا جنب الطفيله).
اتذكر شو حكالو أبو يوسف رحمة الله عليه، انه من أول ما وعي عالدنيا و هو بيسمع باسم أبو عقيل.
و هو في الابتدائيه سمع بأنو تعين أبو عقيل كبير الجباة. يعني الظريبه. حلو يمكن الزلمه خبير مالي.
لما قدم المترك الو يوسف سمع انو أبو عقيل صار وزير الاثار. كمان حلو، طلع الزلمه خبير اثار.
و قبل ما يقدم توجيهي سمع انو وزير صحه. تمام طلع كمان خبير صحة و طبيب.
و بعد التوجيهي حبيبنا أبو عقيل صار وزير للسياحه . ما شاء الله طلع كمان خبير سياحه.
وراها الزلمه سلموه مدير منطقه اللبويضه الاستثماريه (اللبويضه تقع في سهول حوران في هاظا البلد). العب كمان خبير استثمار و اقتصاد حر.
و بعدها حطوه وزبر نقل. كمان خبير نقل.
و هسه سلموه امين بصيرا (بصيرا جنب الطفيله). يعني الزلمه كمان خبير تخطيط و ادارة مدن.
اي لازم يسلموه امين العاصمه على هيك خبرات.
و بكره - يعني في الايام الجايه - رح يسلمو محل أبو لطفي. كل شي ممكن.
يعني أبو عقيل طلع كشكول. خبير مالي و اثار و سياحه و صحه و نقل و استثمار و تخطيط و ادارة مدن و اقتصاد حر و كل شي.
هاي ببلعها بدون سفن أب و ما بيصير معي حموظه.
بس أبو يوسف لما كان في الابتدائي كان عمره عشر سنين و الاخ أبو عقيل مدير يعني بالثلاثين. يعتي اكبر بعشرين سنه.
طيب أبو يوسف لو عايش لهسه كان عمره خمسه و ستين. يعني أبو عقيل هسه عمره خمسه و ثمانين. طولة العمر الو حتى يخدم المواطن.
طز في الشباب و اتاحه الفرصه للصايعين الضايعين الشباب الهمل, اللي دايرين عالفساخه و قلة الحيا.
ايوه, ارفعو سن التقاعد للميت سنه، ميشان يصير في سبب النا نحافظ على صحتنا و نطول عمرنا, اذا أبو عقيل لساتو شغال. قصدي وظيفيا.
أبوفهمي نفخ سيجارتو بوجه أبو يوسف, و استغفر ربو, و قال لأبو يوسف:
حرام عليك قابظ شلوه لأبو عقيل، يا زلمه في مثلو كثييييييير. المهم نلاقليهم و ظايف.