ازرق اشعاعي وزرقاء نووية !!

زاد الاردن الاخباري -

بالامس اقبل علي صديقي المتشائم كثير الحكي .. . شفته من بعيد ... مشمر عن ثوبه للركبة ولما قرب علي شفت الزعل والهم بادي على عيونه ... اقترب اكثر ... فاكثر ... بادرته ... يا هلا ومسهلا .. خير يا رجال وش بلاك الله يهداك مبوزم ومعقد حواجبك وعيونط طايرات من راسك تقول انك اليوم دافن نص اهلك ؟!
جحرني بنظرة –عرفت معناها – وقال : هوو فك عني يارجل لا تتفسقن علي .. تراها واصلة للخشووم ..
قلت : للخشووم ؟ ... معناته الشغلة كبيرة وعويصة .. خير يا رجال ... يكفي شرك برا وبعيد ..
- لا برا ولا بعيد .. الشر حولنا وحوالينا ...( شخر ونخر وفتح خشومة وعقد حواجبة اكثر ..)
- يا رجال اقلقتني ... وخوفتني ... اي انطق هالجوهرة
- يا رجل ... يقولو ودهم يبنوا هاظ اللي يسموه مفاعل نووي تلانا
- آآ ه هاي هيي السالفة ... وين ودهم يبنوه دخلك ... اخيرا عينوله مكان ؟
- ايه والله ودهم يبنو هالخاير عندنا بالازرق عند قصر عمره
- وانت ويش اللي عاص على ... خناقك يخوي جايني ترغي وتزبد ؟
- تراك فسقآآن وترش عالموت سكر ... صيدك ما تدري شو السالفة ؟
- اييه ... ما ادري وش السالفة ... هات قول ... مد وافلح
- يا غشيم ... ما اتعرف انه هالخاير بيه ... خطر علينا وحوالينا ... حتى حلالنا وبهمنا وبعارينا ما رح تسلم من بلاويــــه ... دخلك احنا ويش وده يجينا من هالمهدووم ؟
- ولك ... انت الغشيم ... وراسك كبر رحاة المطحنة ... تراك ما تفهم ... واعند من التيس البلدي اللي ظايعه اجياله .. .. ولك يا هــبل .. هاظ المهدووم اللي تقول عنه .. بكره يولد لك كهربة ويسوي لك مية البحر احلى من الدبس ويزرعلنا الصحرا كرووم ومقاثيي ..
- احلى من الدبس ..هههاه ! ( وبعصبية ) .. كرروم ومقاثي ههاه والله منت داري وين الله حاطك ... بكره .. لو نفس هالخاير ؟ دخلك انت تفكره بريمس ولا بابور كاز ... ولك هاظ مفاعل نووي .... يعني خراب ديار لو نفس له تنفيسة علينا ليسوينا دمار وشتات احنا وعيالنا وحريمنا وبهمنا ودورنا ودكاكينا
- له يا حزيين انت تفكرها داشرة ... ولك في ناس تفهم ومتعلمة اكثر مني ومنك ودها تشرف عليه
- اقظب على هالحكي ... اي مواسير الميه تصب شلال بشوارعنا ومحنا لاقين نشرب ... والمجاري فايره وسايله بين دورنا وما حد قادر عليها ودك منا نقدر على هالبلية اللي بلانا بيها هالرجال الطويل هاظ .
- ولك يا جاهل ... هاظ انت تفكرها شلية حلال ... ولك بدهم يجيبوا خبرا اجانب ... راس الواحد كبر الدار من الفهم .. ومعهم كمبيوتر ... ويعلموا عيالنا عالنووي بعد ونصير فوق الرييح
- لا فوق الريح .. ولا تحت الرييح ... والله ما فيه غشيم غيرك ... ولك لسا بعدنا ودنا فت خبز كثيير .. ولك لما انبطل هوشات عالفاظي والمليان نجيب مفاعل نووي ... لما نخلص من بعظ النواب اللي ما يعرفوا يحلوا سالفة بسيطة غير من بوز الكلاشن نبني مفاعل
- اقوللك .. انت دووم متشائم وحاط الشر بين عيونك .. لويش انت مكبر السالفة ... الشغلة بسيطة مثل ما قولك ... راسمالها اكمن مليار من الجيبة الزغيرة واكمن خبير اجنبي وكان الله بالسر عليم .
- اكمن ملييار ؟ ! لمنك تشبع خبز وتروى ميه ... قول هالحكي ... يا رجال حل عني بلا مكابرة ومزاودة .. وشوف الوظع حولنا وحوالينا ... لو صارت هيزعية منا وشرق ولا هوشة منا وشمال وجانا صاروخ طايش ولا قدديفة مهبولة تزغرت من هناك وناخت فوق هالخاير ... قولي وش وده يصير بحالنا يا مهبوول ... انا وانت عندينا حساب بسويسرا ولا عمارة بباريس ولا كازية بنيويورك؟... ولك لو نفس وقامت القرعى على ام اقرون وين نروح ووين نلقي والله لانصير سالفة للبنت وامها ونقعد مثل معايد القريتين هاظ لو ظل بينا نفس نقعد احنا وعيالنا ومالنا وحلالنا وبعدين خلي الخبرا ينفعوك ... من اول طقة الخبير يكفت هدومه ويصر بقجته ويدير ظهره ويقولك باي ياي .. قللع شوكك بايدك
هالملعون المتشائم كثير الحكي ... قال هالكلمتين وطق شليله وقام وثوبه اله شخيير من الزعل وتركني اظرب اخماس باسداس .... ما اخبي عليكم ..... كلامه اثر علي .... جتني ام العيال تقول علامك مهموم بعد ما تركك ابو عقلين ؟ ! قلت : دغملييني ... دغملييني وزيدي علي بالغطا بلكي انام واصحى من هالكابووووس !!

صالح ابراهيم القلاب