الحاج أبو لطفي في خدمتكم

الحاج أبو لطفي في خدمتكم. بقلم د. فاضل ألزعبي

ابو فتحي و هو بحكي هالقصه بيعتذر من كل الحجاج اللي مشرفينا و اللي بيرفعو الراس...... و قال لابو نعيم بدو اسولفلك عن مختارنا ابو لطفي شو عمل بام يوسف ..... و كيف ابو لطفي خمط الدنيا كلها و ما خلا ايشي لحدا... وهو لا بدفع ضريبه و لا زكاه ..... و راح حج و ترك القريه اللي ماكله هوا و مش لاقيه كندره تعييد فيها.

صحتلو حجه مرتبه و ببلاش من احد الميسورين جيران القريه , و دولو تذاكر لاربع اشخاص.
حمل حاله هو ثلاث اولاد من اولاده الاربعه, و اضطر يترك الرابع اصغر واحد فيهم , و راح للحج.

بعد ما سافر ابو لطفي و الثلاث اولاد للحج , "جارتو من اربعين سنه" ام يوسف , بدها تسافر لعند بنتها المتزوجه في قريه بعيده , ميشان تقضي العيد الكبير عندها و بالمره تحضر ولادتها اللي رح تكون بعد العيد مباشره.

ام يوسف ما لقت احسن من دار جيرانها ابو لطفي ميشان تخبي صرة الذهب عندهم, و اعطت صرة الذهب امانه لابن ابو لطفي الصغير شاكر لبين ما ترجع.

رجعو الحجاج , و بعديها بشهر رجعت ام يوسف.... و على طول راحت لدار ابو لطفي ميشان توخذ الامانه تبعتها.
دقت على الباب , فطلعلها الحــــــــــــــــــاج ابو لطفي ,
تفضلي اختي شو بدك.
يا ابو لطفي انا ام يوسف جارتكو .. كنك ما عرفتني.
و الله يا اختي انا ما بعرفك و لا شايفك قبل هيك.
قول و غير يا ابو لطفي... انا ام يوسف مرت جارك الله يرحمه ابو يوسف.

اذا مش مصدقتيني يا اخت هسه بسأل اولادي ميشان تتأكدي....
يابا يا حاج لطفي.. يا حاج لطيف ... يا حاج لطوف.. بتعرفو مين هاي:
لطفي و لطيف و لطوف طرقو يمين و حلفو لا ما بنعرفها و لا عمرنا شفناها:
وحد الله يا لطفي انا أم يوسف و لك أنا رظعتك و انت صغير لهه لهه لهه!!!!!!
و لك يا لطيف يا ما شطفتلك و انت صغير و بتعملها على حالك لما كانت امك مريضه!!!!!!
و انت يا لطوف دايما بتلعب مع يوسف ابني!!!!!!!!!

خارت قوى ام يوسف و قعدت على المصطبه قدام بيت الحاج ابو لطفي.

الحاج ابو لطفي قلها ما ظل حدا في البيت اسالوه الا ابني الرابع و الصغير: نادى ابنه رقم 4 اللي ما راح على الحج.... و سالوه يابا يا شاكر بتعرف مين هاي:
شاكر جاوب على طول : يابا هاي ام يوسف , جارتنا من زمان: يابا هاي اللي تركت صره الذهب أمانه عندنا زي ما حكيتلكو.!!!!

الحاج ابو لطفي بنرفزه قال لابنه شاكر: الحق علي انا , اللي ما أخذتك عالحج يا ابن الكلب.

ابو فتحي سأل ابو نعيم:
- هل كانت حجة ابو لطفي زي خلق الله و لا كانت مرتبه و حراسات و تسهيلات و منافع. و هذا اسمه استغلال منصب و تضارب مصالح و اهدار للمال العام . احسب كم واحد سافر معه.
- هل برأ ذمته مما اخذ من اهل القريه بغير حق. انا ما سمعت انو حدا سامحوه. يعني راح شرط اساسي ميشان تكمل الحجه.
طيب هو بدون حجه ما قصر في اهل القريه, اجت الحجه ميشان ما يظل حدا في القريه عنده صرة ذهب و لا نحاس.
و هون انا يا ابو نعيم باعتذر مره ثانيه من كل الحجاج الصادقين اللي على راسي من فوق و باقول لابو لطفي:
خرج الثعلب يوما في ثياب الواعظين ..........الا ليت شعري هل للثعلب دين؟