( زواج مثمر .. ساخر )

قام احد الاشخاص بالزواج من شجره .. هل يحق لي انا مثلا اتجوز من (ابريق الشاي ) ؟ ... هذه من ضمن سقف الحريات ...لماذا عند الغرب لا يوصف هذا الرجل بالمجنون مثلا ؟ .. وانا اذا عقدت قراني او احد غيري على ( بابور الكاز ) بتقام الدنيا وما بتنحط ؟ ... ليش يعني .. مش هذا من باب الحريات الشخصيه ... يا اخي فرضنا واحد اتجوز دلاية قهوه وخلف ( فناجين ) هل يعتبر الفناجين اولاد شرعيين لللأب الطاسه ؟ ...
بلاش .. هل غاية هذا الرجل الزواج من شجره كأنه يود ان يوصل رساله ضرورة الحفاظ على الشجر والزريعه ؟ .. لنفترض هيك كان بالوا .. طيب ما لاقيت تلفت النظر الى رسالتك الا بهذه الطريقه المجنونه ؟.. والادهى والامر ان هناك معازيم وكتب كتاب ومأذون وحفله وعناق .. الزلمه امصدق حالو .. طيب فرضنا دبت الخلافات بينك وبين الشجره .. هاي دنيا والازواج بتهاوشوا .. شو بتعتقد انت انو المدام الشجره تترك ( البستان او الغابه ) وتحرد عند ابوها شجرة الصنوبر مثلا ؟ ... ويقعد يقلها اقعد يا بنتي والله هذا الانسان ما بستاهلك ...والله لو اخذتي قرابتك شجرة التفاح احسلك ... وفرضنا بدها نفقه وين اتروح اتقدم قضيه اتروح على وزارة الزراعه مثلا ؟ ... يا اخي خذوني على قد عقلي .. مهو هذا الزلمه هبلني .... فرضنا حملت الشجره وين بدها تلد ؟ ..ولا يجبلها دايه ؟ ... يا اخي برضو بلاش ... فضنا اجو اهلها لعندها شجرة الكرز والانجاص والداليه والبطيخ شو بدك اتقدملهم .. سماد كماوي ... فرضنا بدها اتروح تحضر عرس اختها معقول تخلع الشجره وتحملها على ظهرك واتوديها على الغابة الثانيه تحضر العرس ... يا اخي انت مين عديلك ؟ .... الشمام ولا البندوره ؟ ...
طيب زمان كان الواحد مجازا ايقولك والله فلان ( متجوز القضيه ) ... وهسه انت حضرتك متجوز ( شجره ) شو قلة نسوان يعني ؟ ... شو اللي قاعد بصير بالعالم ؟ .. يعني كل هالحروب والدمار والناس قاعده بتموت ببلاش ومجاعات وفيضانات وحضرتك رايح تتجوز شجره .. والله في فيلسوف زمان قال ( ليس غريبا ان يكون العالم كلو مختل وانا السليم ) ... معقول يجي زمن تطلع سولافتك مظبوطه واحنا باقيين هبل ومش داريين ؟ ...
يا اخي والله العظيم مش ناقصنا ( هستره ) بالعالم .. يا زلمه اتقي الله فينا اشوي .. انا شخصيا كأنك ضربتني كف على صباحي .. هسه انا اقعد ادور اجيب رغيف الخبز ولا اقعد اطلع على اخبار زواجك ؟ ... يا اخي صلي على النبي ... اذا حابب اتسير انا ويان نسايب في عندي شجره ( تين ) الله يغزي العين عنها ... مرتبه ومزيون ومثمره .. وربيانه على نهر ( مجاري ) شو رأيك اتنزلها ضره على شجرتك حبيبتك .. اسمهم بتساعدوا مع بعض بشغل الغابه .. شو رأيك .. وانا ما راح ازيد عليك اشي .. زيها زي اختها شجرة ( الجميز ) بمية ليره حلال زلال عليك .. وين ما اتروحي شهر عسل روحو .. وانشا الله اتروحوا على ( مشتل ابو جمعه ) انتو حريين .. واش قولك ؟ .
يعني على سولافتك هاي ما راح نستغرب بكره اذا واحد اتجوز ( فطبل ) او (زرفيل الباب) او ( صحن الستلايت ) او ( فردة كندره ) او ( حاويه ) او ( عجل سياره ) او ( مطب ) او ( كنبايه ) او ( منشفة الحمام ) .....
هل تعلم يا اخي الكريم والله ما اني عارف شو اسمك انك انت ساهمت برفع نسبة العنوسه ببلدكم ؟ .. وهل تعلم ان التقليد الاعمى مجتاح العالم بدون احم ولا دستور ولا مجرد وقفه او تفكير ؟ .. وهل تعلم انك يا اخي ممكن انك فتحت علينا باب عمرو ما راح يتسكر ؟؟؟ .. وهل تعلم انو انا ابني بكره ممكن ايقولي ( يابا .. صلي على النبي نويت اتجوز واتعرفت على ( كيبل كهربا ) ونويت اتجوزو ) .. هذا الولد شو بدي اقولو .. عارف شو بدي اقولوا .. والله ما انت عارف .. انا بقولك .. راح اقولوا خلص انا موافق رتبت موعد مع ( العمود ) .. وشوف منظرنا جايب المعازبم وكلنا قاعدين تحت العمود بنسولف احنا وياه وبنطلب منو ايد بنتو الكريمه ( كيل الكهربا ) لأبني المجنون ... عجبك هيك ... والله راح اتخلينا نضوي ونطفي من ورا سولافتك .
مبروك يا اخي الكريم...الف مبروك ..... وبالرفاه والبنيين ... بس اوعك بكره تيجي تشكي واتقوللنا ( المدام الشجره) معها سرطان ثدي .. ما راح انصدقك ..لأنو مش لهالدرجه اتسوق فيها .. يلا روح عند عروستك وحل عنا .. والله ما اني فاضيلك ... فعلا الجنون فنون .
ملاحظه : انا بدور على عروس لأبني في حدا حوليه هيك شجره ما بدخن ؟ .
والسلام عليكم