سجل أنــا هنـــدي و رقم بطاقتي

الحق أبـــو عنـــاد.. دريت شو صار بين عمنا ســـام و المساكين الهنود....
عرفت يا أبـــو فهمي... عمنا ســـام حقق مع دبلوماسيه هنديه بنيويورك ... وقفها في النظاره و فتشها عارية ...و ما طلعوها الا بكفاله ربع مليون... و السبب اسائتها معاملة الخدامه و عدم دفع الراتب المتفق عليه...

بس يا أبـــو عنـــاد الهنود ما قصروا... سحبوا الحمايه عن السفاره ...و رفضوا استقبال وفد عالي المستوى من عند عمنا ســـام ...و استدعو السفيره بهدلوها و سحبو هويات الحصانه من جماعتها ... و ركظ وزير خارجة عمنا ســـام يعتذر ...

اسمع يا أبـــو فهمي
و الله ما انا عارف لويش هالزيطه ميشان حتة موظفه بسفارتهم ...و عليش الهنود شايفين حالهم...
ما بفهموا بالدبلوماسيه و التعامل مع الدول.. لازم يتعلموا منا احنا...
قلي عندهم عنتر بن شــداد....
عندهم الزير ســالم ....
عندهم الاهرام و بعلبك و تدمر و الحدائق المعلقه...
عندهم معلقات الشعر العظيمه...
في عندهم حدا قــــال...
ونشرب إن وردنا الماء صفوًا*** ويشرب غيرنا كدرًا وطين...
ولا قـــــــال ...
إِذَا بَلَـغَ الفِطَـامَ لَنَا صَبِـيٌّ *** تَخِـرُّ لَهُ الجَبَـابِرُ سَاجِديْنَـا...

ما تقلي لويش شايفين حالهم من ايام سنجام و شاشي كابور...
احنا عنا كل اللي حكيتلك اياه و شوف لما بينبزق بصباحنا كيف بنســـامح...
ولا لما بيسبوا علينا و بيقولولنا وجوهكم بارده ولا مسقعين... كيف بنزغرد و بنقول ربنا لا تؤاخذنا بما فعل السفهاء منا...

اي عليش عاملين هالزيطه...
بعدين الحق عالعم ســـام ...
جماعتنا عنده... يوخذلوه عشره بدل هالدبلوماسيه الهنديه. والله ما بنحكي ايشي ولا بنزعل و لا بنوجع راسهم...

مالك يا أبـــو عنـــاد شو هالحكي احنا مش هيك و الله جنناهم لما اساؤو لديننا ...
حنا نعادي اللي يعادي و نصاحب اللــــــــي يصاحب.... صح يا رجال... ايوه صح...
بس يا زلمه ...هاي لفهد بــلان الله يرحموه ...غناها و اكلنا هوا من وراها و من ورا تجوع يا سمك و اهدر يا بحر...
قوم سوينا كاسة شاي و حطلنا على زي افلام احسن من كل هالسولافه...