يا الله .. ما احلى شمة الهوى

قال رسولنا الكريم (ص) (إن الله جميل يحب الجمال...) والأردن بلد تكثر فيه الأماكن الجميلة التي لا تتكرر صورتها في أي بلد ولكن العتب كبير على كل منتمي لهايه اللوحة الفنية الجميلة من وطننا ونتمنى أن يتغير ما بنفوس الناس حتى يتغير الحال لما هو أفضل . ومن هون بلش أبو حمدان .
أبو حمدان : أكيد بيوم العطله كل واحد بينا بحب يروح يغير جو وبالبلد من الشمال للجنوب ومن الشرق للغرب طبيعة حلوه كثير واليوم عيلة أبو صقر وأبو عقاب بالرحله مع عيلة أبو حمدان .
التجهيزات على أعلى المستويات . اللحمة والتسالي والميه والفواكه والأراجيل وكل إشي بتشتهيه موجود وكله حاضر للهش والنش ويا سلام مع الشباب الحلوين والدربكة وأحلى قعدات وناسه بالطبيعة الخلابة أبس بظل الواحد عنده الفضول ؛ عقاب جايب شده وحمدان جايب طبله وصقر جايب عود .. أما الحلوات
حميدة جابيه (اللاب توب ،) وشروه بنت أبو صقر جايبه الشطرنج ، وحليمة بنت أبو عقاب جابيه مضارب وريشه أما الصغار أخذوا (القلول ) بتعرفوا ليش لأنه مليان جور بالتراب الله موسعها ..ما ضل أغنيه وما سمعنها بالطريق وعلى مد النظر بنشوف شجر وحجر ومن السلط طلعنا لجرش مدينة الألف عمود وصلنا وحطت ركابنا وأفطرنا وبعدين وصلنا لعجلون بين الأحراش والأشجار الحرجيه قعدنا وكانت السيارة عالسيارة أبو عقاب: يا أبو حمدان هون ما بدناش ناس حوالينا ، لانه معانا صبايا ونسوان
أبو صقر : معك حق أبس مش شايف إنه هاية حساسية زيادة ؛ أي ما هيه كل العيلات معاها صبايا ونسوان شو بيها ما إحنا قاعدين هون القعدة مليحة وبراد وخضار وميه وغير شكل وهينا طالين عالسد شو بدك أحلى من هيك منظر(بهونولولو ) ما بتشوفه. ما غير خلينا قاعدين . أبو حمدان : خلينا نقعد هون لأنه بعد شويه ما بنللاقي مكان
بدأت فعاليات الرحلة ؛حمدان وعقاب وصقر يحضروا المناقل وأم حمدان والشلة بجهزن بالسلطة أما أبو حمدان وبقية الشباب عالمنا قل والنار عالمراجل حكي العربان . أبو حمدان : الله يستر ما يكونن هالنسوان نسن إشي
أبو عقاب : كل إشي تمام ما شاء الله بتعرف يا أبو حمدان الخضار السنة كثير ما شا الله أحسن من العام اللي فات
أبو صقر : هايه الرحلات ولا بلاش . وبظلهم قاعدين بالهويات الطريات وعلى أنغام العود بتجمعوا الناس وخاصة إنه صوت صقر حلو كثير. أم حمدان وصاحباتها الهش والنش شغال وهنه مش قادرات يقاومن ريحة المشاوي إشي شقف ؛ وإشي ريش ؛ وإشي كباب وصلاة النبي الخير حاضر.
أبو صقر يعلن تعليمات الرحلة لتكون على النحو التالي
1- بعد الهش والنش الشباب بلمو الزبالة وبحطوها بالكيس الأسود .
2- ممنوع حدى يكب أي إشي عالأرض
3- ممنوع الشط والنط عالشجر (هاظا الحكي للصغار ) ما بتفكروا الشجرة جبل ما بصير التسلق عالشجر
4- العقب الصغير لا تبعدوا كثير ولا تقربوا من المية
5- بأخر النهار بتحطوا كيس الزبالة بالبكم مع عمكوا أبو حمدان مشان ينكب بأقرب حاويه . مفهوم .
أبو عقاب : يا زلمه اترك هالولاد شو شايفنا على متن الملكية الأردنية تعليمات وبالدار وبشمة الهوى كمان ؟
أم عقاب : ولويش نحط كيس الزبالة بالبكم؟ ليش ما نحرقها مش أحسن؟
أبو حمدان : هلا هلا كان إنت ولا جوزك طنجرة ولقت غطاتها بدك إيانا نولع حريقه تقش الأخضر واليابس إحنا مش بالصحرا. الله يثبت العقل والدين لو كل واحد فكر إنه يحرق مخلفات الرحلة تحت كل شجرة بتقعد عندها العيلة كان ما بظل ولا شجرة بالأردن هاظا لو ما كنا معك بتسويها ويمكن مش بس الشجرة اللي تنحرق يمكن النار تسحب ميات الشجرات إذا ما آذت ناس كمان؟
أبو عقاب : معك حق بتحكي ذهب هايه هيه التوعية البيئية بصراحة لا تنسى إنه أم عقاب (رابع ابتدائي )هاظا الله ما أعطاها من علامه أبس انته عارف لو إنك موظف بوزارة السياحة مش أحسن!.
أبو حمدان : يا ريت ... تفرج وشوف كيف الناس لما بتقعد بتنظف حواليها ولما بتترك الشجر بتركوا تحتيه النفايات وكأنه ما استظلوا بظلها ما هوه المرة هايه أنا قعدت وغيري بده يقعد كل واحد لازم يحافظ وفعلا مثل ما بقعد بالمكان يتركه نظيف وبعد الهش والنش يطفوا الفحم وما يتركوه مولع وغير هيك مش كل واحد جايبلي معاه (فاروعة ) ولا (قطاعة ) مشان ينجر الشجر عشان يوفر عحاله بليرة فحم ؛ انته ما شفت كيف العيلة اللي كانت بجنبنا الزلمه قاظب الشجرة من جهة وابنه من الجال الثاني قال شوه : ناسيين الفحم هاظا مش سلوك المفروض ممنوع قطع الشجر بهايه الحجة وكمان لازم كل عيلة تجيب معاها كيس زباله مشان تجمع النفايات بيها وتحطها على طرف الشارع وهيه ماره سيارة البلدية بتزم هالكيس هاظا إذا ما حط الكيس معاه ولرماه بأقرب حاويه زي ما إحنا بنسوي ولازم بالأماكن السياحية يكون بيه حاويات كبيرة حتى بين الأحراش مشان الزوار وغير هيك يكون بيه رقابه من السياحة بأيام العطله يكون دوامهم جمعة وسبت بالأماكن اللي بيها تنزه مشا يوعوا الناس لأنه مش كلها بتعرف كيف تتعامل مع البيئة وهاية بلدنا وحقها علينا أقل إشي ممكن نسويه إنه نظل محافظين على شوية الهوى اللي بنشمها .
أبو عقاب وأبو صقر : بتعرف يا أبو حمدان لولا انته معنا أبصر شو صار ، هاظا كلامك خلى عنا شوية وعي ما كانت موجودة وفعلا لو كنت بموقع مسؤولية بوزارة السياحة غير الوضع مش هيك سدقوني
وفعلا كانت من أجمل الرحلات الجماعية . وإنشاء الله تتعاد دايما .
بلدنا جميل ومواطننا أجمل وما نريده هو تغيير المفاهيم البيئية الإنتمائية للأماكن السياحية حتى يستمتع بها الجميع ونسأل الله التغيير إلا أننا نستذكر قول رسولنا الكريم عليه الصلاة و السلام ( لا يغير الله ما بقوم حتى يغيروا ما بأنفسهم )
وإلى اللقاء القريب المتجدد دوما ومع موضوع آآآآآآآآآآآآآخر وأبو حمدان في أي مكان ؟؟؟؟؟

Hikmat_b@yahoo.com