يا أمهات .. ديروا بالكوا على ولادكوا

بالعطله الصيفيه....
بقلم : حكمت محمود البشير
عندما ينتهي العام الدراسي تبدأ العطلة الصيفية وتبدأ معها هموم أخرى تعرقل سير الأسرة وبعدما كان الطالب يسير على برنامج يومي طيلة النهار يصبح الآن بدون برمجة، ويكون لديه الفراغ الكبير لذا لا بد من تعويد أبناءنا على إعادة هيكلة هذا البرنامج ليتسنى لهم اكتساب مهارات جديدة في حياتهم وأمورهم. من هنا دعونا نرى كيف سيقوم أبو حمدان بتوجيه أبناءنا من خلال بعض الإرشادات والنصائح التي سيقدمها لنا. أبو حمدان والعطلة الصيفية وخلينا نشوف.رسالة لكل ولي أمر يهمه أولاده
الساعة12 ظهرا... الموقع ... الحارات والأحياء والزقاق العتيقة ... الموضوع :الشارع ...الطقس :حار جدا
أبو حمدان : شو يا أم حمدان مش عارف اليوم شوبيه العقب كله بالشوارع هوه اليوم ما بيه مدارس ؟
أم حمدان : آه عشان ولادك بالجامعة مش متابع ... اليوم بداية العطلة الصيفية ولا تنسى إنها مددوها والدوام رايح يكون بعد العيد هيك الوزارة قررت .
أبو حمدان : اشي كويس مشان السنة على خير راح يكون الجو حامي وفعلا ما بقدروا يقروا ويصوموا هاظا قرار حكيم من وزارة التربية والتعليم وانشاء الله الجامعات كمان .
أم حمدان : القرار بخص المدارس بس والجامعات مش خاضعين للقرار أي هوه يا أبو حمدان طالب الجامعة زي طالب المدرسة بس يا خسارة إنه شايف كيف الولاد اشي بالشارع واشي عالحيطان بطير طيارات واشي بلعب قلول بين العشب وهاظا كله خطر حتى الشارع تحول لملعب كرة قدم وأنا مش عارفه وين الأمهات عنهم ... أبو حمدان : هاظا الحكي مسؤولية المجتمع كله مش بس الأب والأم والتربية كمان لازم تسوي أنشطة لا منهجية بالمدارس وتكون مجانية وتفتح ملاعب المدارس بطريقة قانونية للمجتمع المحلي مشان الطلاب بدال ما يحولوا الشوارع لملعب كرة قدم يصير عندهم مكان يلعبوا بيه والله إني بتضايق لما بشوف هايه الشوفات طلي عالمدرسة اللي قبالنا الساحات و الملاعب مسكرة بالبواب والجنازير للهوى والولاد بلعبوا بالشوارع ولو إنه بيه مسؤولية كان انفتحت هاية الملاعب للطلاب وكل حاراتنا ضيقة والشوارع شو بدها تصير هيه للسيارات ولا للمشاة ولا للعب هاية لازم إعادة نظر بيها حتى على مستوى البلديات أنا بعرف إنه بيه بلديات ما بتقصر بتسوي ملاعب أبس بتكون بعيدة عن الحارات وشو استفدنا عاد(انشالله بلدية السلط تنتبه لهالمسأله ) وبعدين إذا بتشوفي العالم برى بتلاقي إنه الطيارة الورقية إلها أماكن خاصة بطيروا بيها مع أهاليهم وإلها وقت محدد ما شاءا لله عالفكر عنا بتلاقي الولاد متشعبطين عالحيطان بعز الظهر الحمرى مشان يطير طيارة ما هذيك السنة فادي ابن جيرانا وقع عن الحيط وهوه يلحق ورى جناح الطيارة بعز الظهر وشو استفدنا ومثله مثايل ضحايا من أطفال أبرياء بحاجه لتوجيه .
أم حمدان : بتعرف إنه ابن أبو رأفت صابته ضربة شمس وفات المستشفى ولازم كل الأمهات يديرن بالهن على ولادهن حتى لو إنها بتشتغل لازم تكون مبرمجه لولادها طريقة حياة كل يوم ويكون بيه مراقبه أكثر بجميع الأوقات لأنه الجو كثير حر والصيف السنة حامي كثير ، وأنا من عندي بقول إنه كل أم مسؤوله قبل الأب والمجتمع ومشان ما نقول يا ريت لازم نهتم بشؤون أهل البيت من الصغير للكبير وبعدين نطل برى البيت ..... أبو حمدان : ما تتخيلي يا أم حمدان هظول مليون وربع طالب مدرسة بكونوا إجازة بالصيف وشوفي عاد هظولا كلهم لو طاحوا عالشارع شو بصير ؟؟؟؟؟ من هون لازم أصحاب القرار والمسؤولين يعيدوا النظر بطريقة أكثر شموليه بخصوص كيف رايح ولادنا يقضو الإجازة الصيفية .
أم حمدان : بصراحة الجوامع ما بتقصر بتسوي دورات حفظ قرآن وهاظا إشي مشكورين عليه وكمان يا أبو حمدان بيه مدارس خاصه بتسوي نوادي صيفيه للطلاب و لكن مش الكل بقدر يسجل بيها لانها غاليه ،وبيه إشي صار عنا اسمه مقاهي انترنت أبو حمدان :أأأأأأأأاايوه وفكرك هايه المقاهي بيها مراقبه هالولد بدفع نص نيرة وبقعد ينتت مع مين ما بتعرفي وعلى شوه قاعد بتفرج ما بتعرفي ووين بفوت كمان ما بتعرفي ...جاية تقولي نت إذا ما بيه مراقبة تعالي شوفي شو رايح يصير وبقولوا
أخر إشي هاظا الجيل مش مربى وناسيين نلوم حالنا قبل ما نلومهم أكثر الآباء بشغلهم والأمهات بالمثل والشغالات ما إلهن دخل قال شوه ألوه : هاي هندا (الشغالة ) وين لندا ؟ وت شي وركس ؟ هندا :شي إز درايف بسكليت. الأم : وير ؟ هندا : إن ذا ستريت ..... ما شا الله!! شو هالمراقبه كمان لعب البسكليتات بالشارع وصار البسكليت يقف عالإشارة الضوئية .... رسالة من كل اب و ام لكل المسؤولين : بنا مشروع وطني كبير يحوي مليون وربع طالب بالإجازة الصيفية وبدنا أندية مجانية ترفيهية وملاعب عامه اللي نلعب بيها كرة ونطير طيارات ونلعب البسكليتات ونلعب قلول كمان وبدنا مكاتب حتى نظل على صلة بالكتاب وما بنا نظل بالشوارع عالحيطان وبالحارات ويا ريت نلاقي صدى لكل طلباتنا .........
المرسل : كل اب و كل ام في بلد ابا الحسين
أتمنى أن نجد صدى من المسؤولين أملين تجدد اللقاء معكم ......في موضوع آخر كان معكم أبو حمدان

الى اللقاء مع يوميات .... ابو حمدان في موقع اخر
Hikmat_b@yahoo.com