مشكلتي هي أمي
زاد الاردن الاخباري -
انا فتاة جامعية عمري 22 سنه مشكلتي هي امي للاسف.
امي وابوي انفصلوا عن بعض وانا بعدني كنت في بطن امي ولما ولدتني امي ارسلتني مع محامي لابوي,طبعا والحمدلله رب العالمين ربنا بعتلي جدتي احسن من مية ام تعبت علي اكتر من كل ولادها سهرة علي الليالي وربتني احسن تربية وعلمتني احسن تعليم.وما حدا من اهلي( ابوي ومرته وعمامي وجدتي) قصر معي,والله لو اطلب لبن العصفور كان بجيبولي اياه
الحمدلله رب العالمين ...
لما خلصت توجيهي ظهرت امي الحقيقية بحياتي ف اضطروا اهلي يخبروني بوضعي وخبروني شو اللي صار بين ابوي وامي وخبروني انه امي حابه تشوفني ..طبعا انا وقتها كنت طالعة من التوجيهي وكنت محصلة على معدل 91 بفضل ربنا ثم فضل جدتي واهلي اللي رعوني رعاية لا مثيل الها
ف حكت معي امي تلفون وكان اول تلفون بيني وبينها وكان اول حديث الها انه اهلي اللي ربوني واللي انا اعرف الناس بطيبتهم انهم كانوا يسيئو التعامل معها وانها كانت مظلومة !!!!!
طبعا انا كانت ردة فعلي ما صدقتها نهائي لانه هدول اهلي وانا عايشة معهم وشايفة كيف عم يتعاملو مع مرت بابا ومع نسوان عمامي تعامل كله احترام وتقدير واكيد مهما حكت ما رح اصدقها ف كانت ردة فعلي اني رفضت التواصل معها نهائي وقمت بتغير رقم تلفوني !!!!
بعد سنتين الحمدلله رب العالمين انا فتاة ملتزمة او بحاول اكون ملتزمة وارضي ربنا واسمع دروس دين ..لفت نظري درس عن حقوق الوالدين..ف قمت ببعت سؤال لاحد المشايخ على الراديو اساله عن امي وهل انا واجب علي برها مع انها هي تركتي وذهبت الى حال سبيلها وتزوجت ولم القى منها اي رعايه او اهتمام طول 23 سنه؟؟؟فاجاب الشيخ انه امك الها عليكي حق حتى لو قصرت معك ربنا بحاسبها عليه اماانت واجب عليكي برها ..بالفعل رديت على كلام الشيخ ورحت جبت تلفونها طبعا اهلي ما مانعو الفكرة ابدا مدام الهدف بس ارضاء الله تعالى
المشكلة انه لما حكيت معي امي ردة فعلي وتفاعلي معها كانها غريبه وما في عندي اي مشاعر اتجاهها بالرغم انها عم تحاول معي بس انا حتى كلمة ماما ما عم اقدر احكيلها اياها !!! وعم تحاول تتدخل بتفاصيل حياتي بطريقة غير مباشرة عم تسيئ لاهلي شوي شوي على اساس انها هدي هي الحقيقة وانا ابدا ما عم اتقبل منها هالحكي وما بدي ازعلها لانه مش هدفي اني ازعلها !!وهي ما عم تستوعب انها غريبة عني محبة الابن للاب والام محبة غير فطرية محبة بتيجي بعد الحنان وانا ما شفت منها حنان ف كيف بدي احبها وكيف بدي اامن الها ..عقلية مختلفه عني افكار مختلفة عني شخصية مختلفة عني !!!دخولها بحياتي عم يحسسني باضطراب وعدم استقرار ..انا كان هدفي اكون على تواصل معها من فترة لفترة بس هي عم تلح بدها تحكي معي كل يوم وفعليا ما في شي مشترك لحتى نحكي فيه !!!!!
انا بحيرة من امري ارجع اقطع علاقتي معها ؟؟!!!!؟؟ ولا اصبر شوي عليها اواخفف اتصالاتي معها ؟؟؟!!! لانه لا ضرر ولا ضرار انا فعليا عم احس انها عم اضرني كركبتلي حياتي وخصوصا انها بدت تحكي عن اهلي وانا اهلي عندي اياهم بالدنيا كلها هم اللي ربوني وتعبو علي والام اللي بتربي مو اللي بتخلف وبترمي !!؟؟
انا طولت عليكم انا اسفة كتييير بجد بجد حابة اعرف رائكم واقتراحاتكم ولكم جزل الشكر
الموافقة على مذكرتي تفاهم بين السياحة الأردنية وأثيوبيَّا وأذربيجان
