يا طيب القلب .. (رجالات زمان )

أبو حمدان المرة هاي مع كل الرجال ، ونصيحة لكل رجل بأن يقرأ ما جرى من حوار مع أبو حمدان وأصدقائه وتعالوا نشوف شو صار بالديوان مع أبو حمدان !!!
أبو حمدان مع حمدان : يابه تراني خلصت امتحانات وبدي من هون ورايح أتابع بطولة كأس إفريقيا ،أبو حمدان:
والله إني يابه عارف إنه عقلك كان بالمباريات مش بالقرايه أبس الله الساتر من تواليها ، حمدان على الله.
أبو حمدان : معناته ما بيش عند حظرتك وقت تقعد مع ضيوفي بالديوان.
حمدان : شو يابه مش قلتلك إني مش فاظي أقعد بالديوان أنا إذا بدي أفوت بس بصب قهوة وبطلع وأبس أمي تغلي إبريق الشاي بفوتلكوا إياه ،بعدين يابه يا حبيبي بيه اختراع اسمه الخلوي وقت ما بدك إياني دق عليه؛
أبو حمدان : الله على هاظا الزمان ، وسبحان مغير الأحوال ، الله يرحم أيام أبويه...اللي ما كنت أقدر أرفع جبيني لما أطل على أبويه؛ فعلا جيل أخر زمن، لا من ثمه ولا من كمه الله يجيرنا !!
ديوان  أبو حمدان عامر دايما أبس اليوم بزيادة قرايب وحبايب ، ومرحبا يا حبايب من أبو جبر لأبو سالم وأبو موفق ، وسعيد ..الخ واليوم كان أبو حمدان بقمة الرجوله والشهامه الأردنيه اللي ما عمرها غادرت أي رجل، بدخل أبو سالم وبيقول : أنا مش عارف اليوم ليش زيفي طالع ومش قادر أسيطر على عصبيتي، يا أخوان صاير من كل إشي بعصب ومش داري شوهوه الحل، سعيد : يا عمي لا تعصب ولا عبالك ما انته عارف إنه أبويه من العصبية والزعل راح بشربة ميه ، وبعدين الدراسات بتقول إنه الرجال أكثر تعرض للجلطات من النسوان وبالأخر بقولوا يا حرام فلان الله يرحمه ترى ياعمي مابيه إشي بستاهل انك تعصب عليه .
أبو موفق : كل حكيك براسماله ترانا كثير منتهاون بصحتنا ومنحرق أعصابنا وعلىالفاظي تعال شوف شو سوى موفق بيه وبأمه مع أخر نهار بالمدرسة جمع صحابه وهجموا عالمدير وهات رمي حجار عالمعلميه حتى سال الدم منهم وهات لحق إشي شرطة واشي عطوات وأخر إشي بقولولك هاظا اسمه( عنف ) وشوه هالسواليف هايه كيف عنف عند هظول العقب ما إحنا مهيئين سبل الحياة إلهم أبس أجري على الله هاظا الولد التف عشوية همل والله الساتر من تواليها ،أبو حمدان : يا رجال هونوا عليكوا ، ما انتوا طلوا حواليكوا وشوفوا بعيونكوا يا ترى سألتوا حالكوا ليش هاظا الحكي كله بصير؟ أنا بقولكوا إنه إحنا لازم نرجع لحالنا ونسأل
نفسنا وين راح القلب الطيب  بداخلنا ولو إنه موجود فعلا كان حالنا مش هيك، يا رجال وين صحاب القلوب الطيبة وين النشامى اللي مش من السهل أي إشي يثيرهم تراك يا أبو موفق مش داري إنه ابنك بمرحلة المراهقة وهظولا بظلهم عقب بدهم مداراه ،مهوه انته كمان خليها الدقة مرة عالحافر ومرة عالوتد لأنه الحياة مش معابطه ما بنقدر نقظب الميه بأدينا لازم دايما نكون واسعين الصدر مثل ما عندك انته مشاكل غيرك ما بخلى .
أبو سالم : يا أخوي يا أبو حمدان كيف لعاد زمان هايه السواليف ما كانت موجودة .
أبو حمدان : لأنه الزلمه كان عارف كيف يعامل أهل داره وكيف يتعامل مع جاره أي إحنا هسا الواحد بينا مش عارف يتعامل مع حاله وين أحنا هسا مع اللي كانوا زمن أبويه وأبوك وجدي وجدك هظولا اللي كانت قلوبهم طيبه نفوسهم نقيه ويا ريت الزمن يرجع مع القلوب للورى شويه حتى نتعلم منهم العبرة والطيبة.
أبو جبر "له.... له يا أبو سالم عسلامة القلوب الطيبة اللي بينا أبس الدنيا يا أخوي بدها شوية صبر
حمدان بدخل عسيرة الصبر ، وبمداخله يابه منين الصبر ينجاب..
أبو حمدان : من التكنجي حجاب، مهوه يابه عقلك ببطنك  هه هه هاه
أبو سالم : فعلا زي ما قلت الحياة بدها شوية الواحد يوخذ زمام أموره بتكيف وبفكر وبتروي لأنه ما بنفع إلا الصبر ونطلب من الله إنه نكون من أصحاب القلوب الطيبة ورجال المواقف في الأوقات الصعبة
أبو حمدان : ترى يا إخوان كله بأجره بنادي حمدان : يابه يا حمدان هات سدر الهيطليية
وصحتين وعافية وعلى قلوبكوا هنيه.
أبو سالم : والله إني رايح أراجع نفسي من أول وجديد وأفلتر هالقلب من الشوائب بدال ما يودوني يقسطروني
أبو حمدان : سدقوني إنها قلوبكوا  بيضا زي الحليب لأنه هاظا هوه القلب الأردني  وهات يابه قطرميز السمنة  البلدية .وشرب.
وفعلا صحتين وعافية ويا طيب القلب وينك ؛ أخ ، أب ، جار ، صديق ، عم ، خال...إلخ وتحيه لكل الرجال الأردنيين من شتى الأصول والمنابت لأن فيهم القلب الأردني الطيب الذي تعودنا أن نلمس الطيب في كل رجل أردني ، ولان هايه هيه حقيقة قلوبنا الطيبة
انتظروا  الحلقة القادمة من يوميات ابو حمدان في مقالة رومانسيات أبو حمدان في المسلسل السلطي مقابل المسلسل التركي .