يا أغلى الحبايب .. وداعا للكرسي

الأمثال ما هي إلا أقوال محكية وشعبية توارثتها الأجيال ، ومن هنا فهي علم واسع يتضمن أمور حياتناولكن؟! قد تصلح وقد لا تصلح. يعتمد ذلك على الزمان والمكان، وخلونا اليوم نعيش قصة حقيقية في مؤسساتنا ودوائرنا الحكومية التي ينطبق عليها قول المثل  لو دامت لغيرك ما وصلت إلك
أبو رمزي آذن بلغتنا الأردنية وبالمصرية فراش ويالله نشوف المكشوف .

أبو نجيب مراسل ( خاص) لمكتب عطوفة البيك ومش بس هيك ؟؟؟ اسمعوا
أبو نجيب بغني سنقل : واه واه ودنن ودانا ..واه واه يا ما نفضتك أنا وااااه أموت بحبك أنا
أبو حمدان : شو لا يكون بعد الأربعين بتصير زي شب العشرين بتحب يا أبو نجيب ؟؟؟
أبو نجيب : ولو يا أبو حمدان أنا بعد أم نجيب بيه بقلبي نسوان ... شوه هاظا الحكي؟؟
أبو حمدان : منوه لعاد اللي بتوهوهلو وبتهويله ؟؟؟؟
أبو نجيب : هاظا كرسي الرئيس ... الهوى بهوهي بيه ... قظيت هالعمر بالبلدية وأنا بس ماسك النفاظة وبمسح بكرسي عطوفته ... وهسا الكرسي الهوى بلولح وبشولح وما ظل بيه لا رئيس ولا عطوفة ولاغيراته...

أبو حمدان : أفهم من هيك إنك زعلان ؟؟
أبو نجيب : لا بالله ما أنا زعلان أي بكفي إرتحت من يا أبو نجيب .... تعال ودي .. وتعال جيب ؟؟؟
أبو حمدان : كثير قلبت أشكال ونفوس قعدوا على هاظا الكرسي شو عندك ذكريات ؟
أبو نجيب : اشي بنقال واشي ما بنقال.. أبس رايح أقولك الطرائف للناس اللي قنبزواعلى هاظا الكرسي ... أبس أرجو إنك ما تحرجني بدون ذكر أسماء وذلك لغاية في نفسي
أبو حمدان : ما بتعني الأسماء ما هوه زي ما بقولوا (شهاب الدين أطقع من أخاه ))) عذرا للمثل

أبو نجيب : هاظا واحد منهم ما كان يقعد عالكرسي غير لما أمسحله إياه سبع مرات ( أسبعه )
ولا واحد كانت هوايته من المخصصات كل ست شهور يغير الكرسي ويشتري غيره لا وشوه كمان لما كنت أطلع مع السايق كان يفوت عالمحلات ويسوي عطوفته بروفه عالكرسي . برا فوا عليه
ولا بيه واحد من العطوفات السابقين ما كان يحب يقوم عن الكرسي بتعرف ليش ؟؟؟ بخاف مدبر مكتبه يجي ويقعد عالكرسي ويروح يخفت . وبيه واحد من اللي عاصرتهم تصور من كثر القعدة عالكرسي صار عنده (_كيس شعر بظهره ) وسوى عمليه لا وشوه كمان نصحه الدكتور إنه ما يظله قاعد عالكرسي كثير لأنه القعدة الطويلة سوتله كيس الشعر بظهره .

أبو حمدان : الله أكبر معقولة هاظا الكرسي كثير غالي على هالمسؤولين بهالبلد .... والله إشي عجيب فعلا .. بعدك ما سمعت إشي لو أقولك إنه هاظا الكرسي أهم إشي أي يا زلمه لما أنظفه وهووه فاضي إله هيبة كيف وهوه مليان .. القعدة عليه بتعبي الجيبه يله يا عمي كرسي مسؤول؟!
أبو حمدان : ترى يا أبو نجيب مره رحت (عالجورة ) واشتريتلك كرسي ما بتسدق لو أقولك إنه كرسي كان يقعد عليه أحد رؤساء الوزراء السابقين وبتسدق إنه الزلمه عرض عليه كراسي مشكله إشي مدراء دوائر ؛ واشي وزرا واشي كراسي معالي لنواب سابقين ,اشي وشويات أيووووه أبس وأنا أخوك قلت ما بشتري لابني حمدان غير هاظا الكرسي الكرسي اللي كان يقعد عليه أبصر منوه من رؤساء الوزراء اللي سبقوا دولته ... أما شوه كرسي ؟!
انته عارف إنه كرسي فاخر من الأخر... أما لما شافه حمدان نادى كل الجيران تعالوا شوفوا كرسي حمدان .. بلتشي على الله يطلع رئيس وزراء بيوم من الأيام ولما سولفت أمه صارت تزغرت وكل واحد من صحاب حمدان صار يشوط عالكرسي عشان فاله كويس.

أبو نجيب : ما بيه على الله إشي بعيد ، كلها أرزاق ولا تنسى العلم يرفع درجات يا أبو حمدان .
أبو حمدان : أجرم عنك طايح تغني للكرسي ... وداعا يا حبيبي.. يا أغلى الحبايب أبس لا تنسى هاظا الكرسي ما بدوم لحدا شفت إنته قلتها قديش قعد على هالكرسي مخاليق ؛ والكرسي أول عن أخر مسؤولية واللي بده يصون الكرسي لازم يحافظ على توازنه لأنه إذا إختل التوازن يمكن يشقلب على راسه ويجي غز وبعدها بصير يمشي دز وكز هاظا إذا ما انجلط وقعد على كرسي متحرك هيدروليك وفعلا صدق المثل اللي قالوه زمان : لو دامت لغيرك ما وصلت إلك ) الكرسي مش دايم لحدا أبو نجيب ظلك غني :. واه واه ودنن وآدانا واه واه أموت بالكرسي أنا ...وسامحنا يا (وليد توفيق ) حقوق أغنيتك محفوظة..... ويا ترى اللي جاي أحسن من اللي راح .. ؟؟؟؟ الله أعلم
وأنا بقول أحسن إذا أحسنا الانتقاء ... وإلى اللقاء مع موضوع آخر

والى اللقاء مع يوميات ........ ابو حمدان في موقع اخر
Hikmat_@yahoo.com
0777406706