رغاء ناقة بأذن وزيرة السياحة

غرغرررر غرررر غرررر

الله يسعد صباحك أعنيها معالي الوزيرة الرائعة والفائقة الأناقة.
عتب من ناقة فاقعة معاها من مدينة البتراء يا معالي الوزيرة على بلد العجائب السبعة وشكلهم بدهم يصيروا ثمانية بمزح معك معاليك بس والله من الحر والقهر هو من السياح ولا من المسئول عنا والله وإلا من جوزي الفحل النسونجي،،،،، مش عارفه يا ستي من وين بدي أبلش.
الموضوع يا معاليك كبير مثل ما بتعرفي إحنا بنشكل وزن بالبتراء وبدورنا بننقل هالعجايز الأجنبيات على ظهورنا لأنهم ما بقدروا يمشوا لأنه السيق مسافته طويلة مثل ما بتعرفي ومدللين زي ما تقولي وبصراحة أكثر بحبو يتصوروا معانا.
ما عندنا مشكلة مع الأجانب والله بتفهموا وضعنا أكثر من غيرهم ومرات بطعمونا هاذي شو اسمها (الشنقليطة) والله مني دارية (شنكرز ولا مارش و إلا باونتي يا أنتي ) ما أنتي عارفة أنا باللغة الانجليزية بعجبك بحكي أربع لغات غير الخربطة بثلاث لغات وحلوة وممشوقة القوام ووووووواااااااااا وبخت ما في.
والله مني عارفة يا معاليك بدي ألاقيها من جوزي الفحل الغيور واللي دائما مقهور من المسئول عني وأعطاني آخر مرة جوزي تعليمات بأنه إذا تأخرت على الأولاد وشغل البيت بنام بره البيت.
الأحوال بتقرف ويا ويلنا إذا اشتكينا وبصراحة أكثر جبت عنوان الوزارات بعمان من (الماعز الحبلى) اللي كتبت مشكلتها لوزير الزراعة الأكرم،،، ترملت الأسبوع اللي فات واللي هربت على هولندا بعثت لي رسالة اليوم وقالت لي بأنها خلفت توأم وأطلقت أسماء أجنبية هالمصدية وأعطت اسم للولد (هاني) والبنت (فاني) قال يعني،،، على أي حال الله يوفقها بس إحنا ما نقدر نروح هناك لأنه ما إلنا خبز عندهم لأنه إحنا بنحب الصحاري وهمن عندهم خضار وفية ومية وإحنا مش متعودين على الدلال زي ما تحكي.
وهذا البرنامج اليومي إلي طبعا ممل،،، وإحنا ستات زي ما تحكي،، ما إلنا حيلة على بعض الأمور والمطالبات،،،،،،،،،،، بقوم من النوم الله وكيلك بدهم يوكلوا هالقواريط الصغار وأبوهم الفحل بدوا يوكل وهو بالفراش ويشرب (الأمريكان كوفي) قال يعني متنكلز الأخ وشايف حاله علي ومصاحب اله كم من أجنبية وجايبتله معها الله وكيلك صنف أحسن من (الستار بوكس) اسمها(جفاليا) ولا(فولجرز) مش دارية،، وأخينا مدمن عليها المهم يا معاليك ما بدي أطول عليك وبعرف عندك شغل المهم بعد كل هالتعتير(صايرة لبنانية) بحكي مثلهم من سائحة لبنانية كانت معي قبل شوية،،،،
والمهم بعد ما بخلص شغل البيت بيجي دور هال مسئول عني الله لا يوفقه قال شو إذا ما بكون في سياح ما بطعمنا ولا بشربنا أي شو كاينه أنا وزيرة سياحة وإلا مديرة برنامج تسويق السياحة اللي بس بلاش شو هالحكي يا معاليك فالرجل بأغلب الأحيان مقصر بكل شيء معنا لا بنوكل كويس ولا بنشرب غير مياه ملوثة يعني صايرين زي ما تحكي زينا زي البشر والله وكيلك ما أخذت شور أو حمام غير من العيد اللي فات لا تأخذيني مرات اللغة الأجنبية بتطلع قبل العربية بدون وعي لأنه زي ما تقولي إحنا بنتعامل كثير مع الأجانب وما بنسمع اللغة العربية الا بالمسبات والاهانات والضرب والنغز بكل الأماكن الحساسة بجسدنا،،، وإحنا ستات والله الوحدة منا بتوكل(،،،،،)وراضية وساكته لأنه عنا أولاد وبدنا نربيهم المهم يا ستي الأجانب زي ما قلت لك بيحكوا معنا وبنفهم عليهم والأخ صاحبنا والله ما أنا فاهمه عليه وكل ما بشوفه بجفل من شكله وبظله يصرخ ومكشر بوجوه الأجانب حتى لما يكون فيه مصاري وفيه شغل وهذا الكلام بخرب سمعة البلد معاليك وأنت عارفة السياحة بهذه الأيام على كف عفريت من الغلاء الفاحش واستغلال الأجانب والعرب يعني زي ما تقولي الأجنبي اللي بيجي مرة في بعض الأحيان ببطل يعيدها بالمرة،،، بسمعهم ما همن بكوني راكبين على ظهري زي ما تحكي وبقولوا،،،، بضحكوا علينا وبياخذوا منا مقدما المصاري وبيهربوا من الرجعة وأنا عبده مأمورة شو بدي أعمل بهمني ارضي المسئول عني ليقطع الأكل والشرب عني وعن أولادي معاليك.
وبصراحة بسمع الأجانب بيحكوا أنه مستوى الخدمات عنا يا ستي بينخفض يوم بعد يوم لأنه زي ما تحكي بالبتراء كل مين ايده اله،،، وكلها واسطات،،،يعني الناقة اللي بتيجي بالآخر بتحمل بالأول وهذا حالنا من زمن القوي بياكل الضعيف وعداك عن الكلام اللي سمعته من الأجانب الأسبوع الماضي،،،قال شو بقولوا إحنا الجمال والخيول ريحتنا طالعه ولازمنا تنظيف دائم لأنه الأجانب زي ما تقولي (حساسين) مو مثلنا (بنعيش بنص القرف وبنقول في ريحة ترف)،،، والله معاهم حق أي أنا قرفانه من حالي من قلة النظافة والاستحمام وكمان شو بدهم الأجانب هل زعران عليهم عمايل قال بدهم يلبسونا(فوط أطفال) عشان البلاوي السودة اللي بنعملها بداخل السيق وبحكوا عنها إنها بتسبب الأمراض والحساسية المفرطة يا ستي (المقطقطة) والله يا ستي ما تزعلي مني بخاف على البلد مثل كل الناس وبشوفك على التلفزيون وبسمعك على الراديو ما أنا معي زي ما تحكي راديو و (أي بود) نسيته أجنبية معي المرة الماضية. وبصراحة غيرانه من أناقتك المفرطة وثيابك اللي جننتني وجننتي ال ،،،،،،، اللي عندي هل النسونجي جوزي،،،الله يقصف عمره بيوكل وما بيشبع وبتسكع برة البيت وما بيرجع وأنا متحملة المسؤولية لحالي لبالي.
وبسمعك وبشوفك وبقدر مدى حبك وحرصك على سمعة البلد بس الناس يا معاليك صعبين ومتحجرين.
والمهم يا معالي الوزيرة ما عندنا حدا يهتم فينا ولا بصحتنا صار لي شهر مفلوزة ومش لاقيه دواء ورجلي الله وكيلك منظرهم بقرف من الجفاف ومن كثر ما بنوقف وبنقعد أي والله كل رجل شكل وهذا مش كويس عشان السياح احم احم احم صبية مثلي ورجليها يعني ناشفين أي علبة فازلين مش لاقيين وبصراحة بدي أطلب شغله منك ومستحية بس يعني إحنا ستات وبنفهم على بعض بدي تبعثيلي من عمان أكم من شغله بلكي بنصير مثل الخلق والبشر (بدي منك كولانات ستاتي) عشان موسم البرد هون شوي قاسي وبصراحة بشوف صايرة موضة هل أيام وأنت شايفة صورتي بيحكوا عني الأجانب إني (كووووول) وبدي رقم وطني عشان يحفظلي حقي وحق أولادي لأنه الفحل اللي عندي ببيعني مثل ما بده وكل يوم سعرنا شكل مرة بألف ومرة بألفين وحسب الموسم (وبدي ومستحية منك حجر أسود عشان كعاب رجلي ناشفين)بدي يا ستي كمان موبايل نوكيا أو بلاك بري عشان أقدر أحكي مع البث الغير مباشر واللي بسكروا الخط بوجوهنا. وكمان يا ستي ما في نظام ولا مواقف منتظمة وحقوق الناقة مهضومة مثل حقوق المرأة بكل مكان يعني لما ييجي الفحل كلنا بنخليه يوكل قبلنا وإحنا بنموت من الجوع عبال ما يخلص بحجة الرجال أولا والنساء ثانيا حتى عندنا مثل ما عندكم (الولايا مهضوم حقهم) وفيه تمييز بين ناقة من عيلة وبين ناقة ثانية من عيلة ثانية وهذا هو التمييز(الحيواني) اللي مش لاقييتله حل ولا قانون بعالم الحيوان،،،،وأنا كنت بفكر بأنه التمييز والنعرات الطائفية بس عندنا وما كنت عارفه إنوا انتم البشر مثلكم مثلنا. وبيعطونا أسماء غريبة عجيبة مثل (العنود) (أم العيون السود) (الخضراء) وغيرها من الأسماء وبصراحة حابه أسماء أجنبية وتتوافق مع زمن العجايب اللي عايشين فيه حابه أغير اسمي من (العنود) (ل كارول أو جيسي أو اليسا بلكي جوزي النسونجي صار يحبني شوية وأغنيله مصدومة فيك) بس خايفة من شرطة السير ليفكروا بدنا (كروكة) أي شيء بس بلاش العنود الله وكيلك كل الصبايا والنوق هون اسمهم (العنود)وكل ما بيندهوا (العنود) كلنا بنرد بصوت عالي(غرغررررر) مثل النشيد الوطني بصوت واحد.
وبدنا يا معالي الوزيرة بأن يخافوا الله ويرخصوا هال تذاكر لابن البلد على الجمال وعلى الخيول لأنه في ناس عمرهم ما شافوا البتراء إلا بالتلفزيون ولا عمرهم ركبوا على ظهورنا إلا الأجانب والغرباء يعني ابن البلد شعاره (شم ولا تذوق) ودايما مركوب وعمره شكله ما يصير راكب.
وبهذه اللحظة المجنونة لحظة جوزي والمسئول عني غضبانين مني والأولاد مش عاجبهم الحال وحابين يهاجروا على السعودية أو عُمان لأنهم بسمعوا وبشوفوا هاالقواريط اللي عندي بالتلفزيون انه فيه سباقات وجوائز لأجمل وأسرع جمال وخيول وأولادي بعدهم شباب وحابه يكون الهم شأن لأنه بالبتراء ما ظنيت الهم مستقبل بعد اليوم اذا ما بتغيروا هل القوانين وبتعدلوا شوية شغلات وبتثقفوا هل الناس وتعملوا على إيجاد الحلول والسبل لرفاهيتنا وبدنا كافيهات مثل ما في بعمان بعد الظهر وحابين يكون عنا انترنت ارخص من اللي بعمان لأنه إحنا بنجيب رواتبنا من عرق (تحت أباطنا ورجلينا) مش مثل اللي وإلا خلاص بلاش.
وخايفة لييجي يوم وأقتنع بالهجرة الغير شرعية لأحدى الدول الخليجية اللي يحبوا الجمال أكثر من أولادهم ويحبوا أكثر لبن (النوق) من أجسادنا و (،،،،،،) بس أنا مش مقتنعة لغاية الآن وخايفة لنصفي على الحدود ونفقد الهوية الوطنية ونصفي بلا جنسية،،، وهذه أحوالنا ويا ريت معاليك تشرفينا ليوم على البتراء بزيارة فجائية وتشوفي أحوالنا كيف صايرة .
والله يعطيك العافية معاليك وشكرا لحسن الاستماع
واعتذر شديد الاعتذار إذا كان هناك أي كلمة أو زلة مع فائق احترامي لشخصك الكريم وإعجابي وتقديري لمعاليك والله من وراء القصد والله المستعان.
الناطق الرسمي باسم الناقة(الكووووول)
الداعي بالخير
هاشم برجاق
28-9-2010