محرج من نفسي

زاد الاردن الاخباري -

بصراحة صدفة بقرأ بهاي الزاوية وقررت أبعث مشكلتي ، لأنه فعلا انا محتاج إلى حد يسمعني

أنا شاب عمري 28 سنة، وضعي المادي ممتاز جدا، مهندس كمبيوتر، وبشتغل بالخليج من حوالي 3 سنوات، مشكلتي انه متردد بالزواج لأنه عانيت من مشكلة نتيجة لحادث سيارة، بس الحمد لله تعالجت وكل التحليلات اكدت قدرتي على الأنجاب، المشكلة انه صار عندي بعض الاثار من

الحادث في مناطق حساسة لي كرجل، وهاد الشي مسببلي حرج من اللي رح اتقدملها ، سألت شيخ، وقال بما أنه ما بأثر على قدرتك كرجل وأنت قادر على الأنجاب وما في اي إنتقاص لحقوقها كزوجة ما في داعي تخبرها.

 

انا بكتب وأنا محرج من نفسي ، أو يمكن أنا بحاسب نفسي على شي ما لي ذنب فيه، بس هيك الله راد ،وأنا جد محتار وبحاجة لحل ، أخبرها أم لا ، وخايف اذا أخبرتها إنها تنفر مني وتصير تفكر  انه ما رح نخلف وتردد، مش عارف يعني احيانا بحكي بجوز من ربنا هاد الشي رغم شكلي الأنيق وكل المصاري اللي معي ما عملو شي ، وصابني هاد الحادث ،  احيانا بحكي يا ريت ربنا يبعثلي وحدة أثق فيها وأحكيلها وتتفهم، بس متردد ، صار عندي حالة لما شوف أي بنت وتعجبني أول شغلة بفكر فيها أنه يا ترى رح تتفهم وضعي ، مش عارف شو اكتب ، أو شو كمل ، حتى أهلي ما عرفوا بالحادث، وظل السر معي طوال هالفترة، جاي عبالي أبكي ، بكل الأحوال الحمد لله على كل شي و إن شاء الله ربنا يفرجها بس حبيت احكي وأبوح السر اللي بداخلي حتى لشخص ما بعرفه ممكن يكون أفضل.

وشكرا لكم جميعاً