يا مسكينه .. مهرها الذهب الروسي

بقلم : حكمت محمود البشير

مجدي طالب جامعي تخرج ولم يجد وظيفة مناسبة فالتحق بركب سائقوا التاكسي ماذا حصل معه دعونا نرى :
أم مجدي : هيه يا ولد بعدك نايم الظهر أذن ما تصحا تدورلك على شغل.
(ولا سائل ولا عباله غاظ بالنوم عالبلكون وشخيره واصل كل الحي ).
أبو مجدي : بكفي صياح من يوم ما سكنا بالحي ما بسمع غير صوتكوا دايما طالع ... هدي يا مستورة
أم مجدي : كله منك تراك إنته اللي خربت الولد قلتلك لما تخرج خليه يلتحق بالجيش وانته ما رديت وكأنه ولا عند قريش خبر .
أبو مجدي : منوه قلك إني رايح أرد عليك مهوه كله هالولد بدك إياني أسجله بالجيش هوه الحيلة والضو بالفتيلة.أيوووووووووووووووووووووه عاد خلص سويتيها سولافة.؟ زهقنا من هالموال
أم مجدي : آه مبين ظوه مغطي كل الدار مهوه طول نهاره نايم خليها يا زلمه على الله
أبو مجدي إله ست بنات غير مجدي والحمل ثقيل وبشتغل حارس بوزارة الأشغال .
( يرن جرس المنزل ) افتحي الباب يابه يا فرح.
فرح : هاظا عمي أبو حمدان ............ أهلا وسهلا أجيت بوقتك .
أبو حمدان يدخل الدار والحديث مع عيلة أبو مجدي .
أبو مجدي : أهلين يا خوي شو أخباركوا ... (هاتي يا بنت كاسة شاي ) .
أبو حمدان : شومالك عسى ما بيه إشي ، خير انشاء الله.
أبو مجدي : هاظا يا أبو حمدان مجدي طول النهار مثل الولية بالدار يا نايم ياعالأنترنت.
أبو حمدان : طيب ما يقدم لديوان الخدمة المدنية ... يضحك أبو مجدي ؛إذا أخته صارله طلبها10 سنين وبعده ما أجا دورها قول اشي غيره .تخصصها تربيه مهنية .
أم مجدي بتدخل عالخط : يا خوي يا أبو حمدان تشوفلي شغلة تسليكه لمجدي مشان يتسلى ويصرف على حاله وكمان يساعدنا بمصروف الدار ما انته عارف الأسعار مولعة نار.
أبو حمدان : شو رأيك إنه يشتغل عند أبو قاسم بياع القماش بصير معلم مقص .
( وبعد مية طوشه وهوشه وبدي وما بدي أخيرا بوافق مجدي) ؛لولوليش والله وابني وافق يشتغل .
مجدي بالوظيفة مع أبو قاسم يوم يومين وبرجع تراني بطلت. شوه هالشغله هاية الواحد بطل يشوف الناس هاية الشغلة مش عاجبيتني قال قص قماش وإيش مره واحدة معلم!
أبو مجدي : شو بدك لعاد : بدي يابه أشتغل بمول زي الشباب صحابي.
مجدي يشتغل بالمول والشغل شفتات وكيف بقضيها ( مجاملات ،يا عسل ؛ إيش يا حلو وآه وعلواه ... ويا تعليقات على الصبايا اللي بدخلن المول وبعديها تشبيكه .
مجدي : أنا يابه زهقت من الشغل بالمول صرت بنسى شهادتي وقرايتي صرت سايق عربايه بحمل شهادة بكالوريوس هاية أخريتهاوالله القعدة عالقهوه أشرف أقلها بتقعد مع خريجين .
فرح(اخت مجدي ) : شكله مش عاجبه سايق عربايه جيبله يابه لاموزين هاه هاه ها
ورده : أي هيه البطالة بس عليك نص الأردن بطالة وانته دخلك عل شو شايف حالك ؟؟؟ هاه
مجدي : يمه سكتي خواتي أحسن ما هسا..... بديش أوفي؟! ولا بقوم بكسر راسهن لانه سكرت معي .
أبو مجدي : شوه خلصت يا مجدي بيك؟!
مجدي أقولك يابه شو أحسن حل جوزوني واحدة موظفة.
أم مجدي : شو بنا نسوي ما دام الولد طلب الجيزة ... شوف اللي بدك إياها بس قبل هيك لازم تقظب بشغله لا يقولوا الناس عنك عواطلي.
مجدي : زي ما بدك يمه خلص بدي أداقش أنا وصاحبي بمحل من محلات المول اللي كنت بيها. وشو مال المول والله حلو شغله لانه بي ما هب ودب من عالم يعني بشغل ولا بدون بجنن المول . أم مجدي تراني يمه شفتلك عروس مزيونه (منى بنت أبو عطا )
مجدي: يمه حلوة ولا...... بلاش أقول ؟ أبس لا تكون زي بنات اليوم لينسيز وبوتكس وأظافر ووصلات شعر والواحد بطل يميز هوه هاظا طبيعي ولا صناعي ؟
أم مجدي : دار أبو عطا ناس بسيطين ما بيش عندهم هاية السوالف .
مجدي : ترى يمه عيني هاية شايفه بالمول الابيض والاسود حتى قالت كافي .. أبس إذا زي ما بتقولي على بركة الله .
أم مجدي : وبعدين البنت بتشتغل ومستورة وعالبركة لا عندها هف ولا لف معلمة بمدرسه خاصة ..... مجدي : شو هاظا يعني مش حكومة أبس يله نص العمى ولا العمى كله؟
أبو مجدي يتصل مع أبو حمدان : ألوه تشيف حالك اليوم بنا نروح نطلب لمجدي بدي تيجي معايه عالجماعة مشان نفند المهر(تحديد المهر).
(يتوجه العريس وعيلته ويرافقهم أبو حمدان ) أبو عطا : أهلا وسهلا ... أبو مجدي ترانا جايين طلابيين بنتكوا منى على سنة الله ورسوله لمجدي. بعد التشاور .... تراني أنطيتكوا وعلى بركة الله ((الفاتحة )) وبعديها أم مجدي تعج الزغاريت .
أبو مجدي وخلونا هسا نتفق على المهر ..... أم مجدي : ترى منى ست البنات وزينة الزينات
أم عطا : أهم إشي إنه بنتي تسكن من حالها والذهب أهم إشي ...والأثاث. أثاث فاخر غير شكل
أبو حمدان : شو ما بيه مكان للزلام بينكن طايحات بتفندن بالمهر
مجدي : ولا عنده ولا عند باله سرحان بالعروس وعقله بودي وبجيب
أبو مجدي : ما بيه خلاف كل طلباتكوا مجابه ... الأثاث بالشيء الفلاني والمقدم مبلغ خيالي والمؤخر محسوب بفرق العملة والصالون بعبدون والذهب بست ألاف وسهرة العروس مع بوفيه بفندق والبروفات شغالة والفرق الطربية إشي عود واشي (هولو بولو) عرس مطنطن وقروض من بنوك وصندوق المرآة .. واتحاد المرآة... ووين ما بيه مكان لقرض كان أبو مجدي يروح والبنات وأمهن على القروض الصغيرة والأرض اللي بباب الدار انباعت .. وإلخ
أهم إشي كان الذهب وصاروا بدهم يروحوا يشتروا الذهب وهون وقف الحال وعلى النسوان وحيلهن ما بنخاف عليهن مهوه ربنا قال إن كيدهن عظيم.
التوجه لمحل الذهب والعروس تنقي والسايغ يوزن واحسب احسب حتى وحصل ست ألاف عدا ونقدا.... ومنين بدك يا أبو عطا تدفع... دبرها عاد .... أبو حمدان دينك والصحاب ما قصروا
أبس شوفوا عاد....أم عطا : خلص حبيبتي ((مع نفسها الحديث ) خلص ما هوه وقع الفاس بالراس ) على كل حال هسا روحي إنتي ومجدي مشان تنقي الفسطان وإحنا المسا بنجيب الذهب معانا .....وكيف أم عطا بدها تدبر حالها ؟؟؟؟ جارتها أم فوزي بالصدفة بتحكي معها
آه يا خيتي شو سويتي ؟ وشو ناقصك ؟ التمام على خير ؟ أم مجدي : والله يا خيتي إني حايسه ولايصه وشوفي هالورطه الذهب ما ظل بيه سيوله إله وكيف بدي أدبر حالي.
أم فوزي : هاية بسيطة يا صبحا وما له الذهب الروسي ؟؟؟؟ ذهب روسي !ّ!!؟
أم مجدي : والله جبتيها هسا بصور الذهب اللي نقته العروس وبجيبلها زيه روسي أبس بتقدري تيجي معاييه .. من عيوني هريني جاي خمس دقايق بس.
يوم العرس .... بيقولوا لبسها لولو ولبسها خاتم الماس ... إيه يا ناس صلوا عالنبي..... ؛
وطعة وقايمه والناس عيونها بدها تطلع من جفونها من كثر الذهب والتعليقات رش
خالته : لو إنها بنت السلطان ما لبسها هيك .
عمته : هاظا وهوه موظف بالمول .
بنت خاله : يا سلام هاية الأعراس ولا بلاش نيالها قد ما لبسها ذهب.
مرت عمه : ما تخاف غير من الساكت طول نهارها أم مجدي تولول من وين إلنا يا حصره
وتعليقات كثييييييرة ............. وبالأخر بذوب الثلج وببان المرج .
وفعلا ذاب الثلج و اصبحت المشاكل باكتشاف بان الذهب روسي وليس حقيقي . والله يكون بعون الطرفين . كل الحق على الذهب الروسي ...

والى اللقاء مع يوميات ابو حمدان .... في موقع اخر
Hikmat_b@yahoo.com
0777406706