يا بعد قلبي .. شيف أرضيش ؟؟؟

رومنسيات ابو حمدان
بقلم : حكمت محمود البشير
على ما يبدو أن المسلسلات التركية قد أغرقت مجتمعاتنا في الأردن بحيث أنها دخلت كضيف قلب مقاييس الأمور ومن هون رايحين نحضر الدراما السلطية المحلية اللي حدثت مع عائلة أبو حمدان ...تابعوا معنا
أبو حمدان يقرر إجراء زيارة عائلية لدار صديقه أبو سالم والرد أهلا وسهلا ،
أبو سالم حال وصول أبو حمدان يا مرحبا ما دام إنه الشباب معك ( حميدة وحمدان ) خلينا نقعد كلنا بنفس المكان ، يابه يا سالم .. يا سلمى تعالوا سلموا على دار عمكوا أبو حمدان وهاي الفرصة أجت لعنا،
أم سالم : أهلا وسهلا، شوبتشربوا سلامة خيركوا ؟ وأختنا أم سالم بتكون محضرة كل إشي عالطاولة مسبقا أبو سالم : هاتي شاي بالميرميه، أبو حمدان : شو يا أبو سالم ما انته عارف أنا بحب الشاي بنعنع مش بالمرميه، أبو سالم : هاظا يا أخويه المره بهايه الساعة أبتحبش حدا يقوللها جيبي وحطي قال ليش ؟ مشان المسلسل التركي بدا، أبو حمدان : والله يا أخويه تقول اللي عندك عندي ؛ طول نهارها من مسلسل لمسلسل قال شوه الساعة 10 صباحا مسلسل سنوات الضياع والساعة 2 ظهرا إعادة مسلسل نور والساعة 3 ظهرا مسلسل عاصي والساعة8 مساء مسلسل عليا والساعة 9 مساء مسلسل الغريب والساعة 12 مساء مسلسل جواهر كل هايه مسلسلات تركية، المره صار عندها إدمان وقال إيش بتقول شورأيك يا أبو حمدان توخذني على تركيا والله إني حبيتها من كثر ما بحظر حلقات تركية .على المحطات الفضائية.
أبو سالم : هظولا النسوان فاظيات أشغال أنا اللي عندي بدها تروح عتركيا واليونان عيمنهم جيران بدها عصفورين بحجر تقول إني قاعد عرجم مال ، وهسا بلتمن الثنتين عبعض وتعال اسمع.
أم سالم : أنا مش عارف يا خيتي يا أم حمدان كيف إنه يحيى بحب لميس ومهند بحب نور وأمير بحب عاصي وعمر بحب علياء...إلخ وكيف يعبروا عن حبهم انت شفتي .. أبو سالم بتدخل بالحكي : وكيف يا ست الحسن والجمال بكونوا رومانسيين اللي بتحكي عنهم ؟ سلمى : يابه إذا واحد بيهم بتزعل منه حبيبته بروح بشتر يلها ورد وبقدملها مش زينا اللي بتزعل بقوللها جوزها: الباب يفوت جمل !!
أبو حمدان : له يا أبو سالم عالحساب هايه الكلمة ما بتنقال لنسواننا أي انته ناسي كمن صندل قطعت وانته تحفى ورا أم سالم ؛ بتذكر يومنك كنت توقف بالحارة وتسبل بعيونك وتزبط شعراتك اللي كنت قبل بيوم تنقعن بالزيت مشان تزبط شعراتك وما تنسى كمان كيف إنه الأيام الحلوة كانت ، أي هوه الواحد بسرعة بنسى وفوق ريحة الزيت زعوط كنا زمان نحط زعوط كأنه عطر هايه أصول الرومانسيات زمان،
أم سالم : شوبيها لو إنه جبتلي بكيت ورد ...هيهيه عاد رجعنا الظاهر إنه الليله مش رايحة تعدي على خير مش مبارح أنا جبتلك ظمتين خبيزه وكمن ظمة نعنع بذمتك يأم حمدان مين أحسن أم حمدان ضاحكة : أنا بالنسبةالي ضمة الخبيزة أبو سالم : هاظا هوه الصحيح ولا عراي المثل احترنا يا قرعة من وين نبوسك ؟
حمدان : يابه شوبيها لو جبت لأمي بوكيت ورد زي مهند ونور أبو حمدان : ما بيهاش إشي يابه أبس بوكيت الورد بحقه بجيب جاجه بتغديكوا يوم وبعدين الحاكورة معبيه ورد أبس تطل من الشباك ولا الورد كله قدامها وبعدين هيه أمك أحلى من الورد كله .
سالم : العب العب يابه شايف كيف عمي أبو حمدان زبطها مش زيك أجيت تكحلها عورتها .
سلمى : يا الله يا عمو أبو حمدان قديش كلامك رقيق وحلو أبس شو بدنا نقول أمي من النوع اللي بتغار من المسلسلات بتفكر إنه الورد عنا رخيص ما أنا شايف كيف الورد غالي إذا الوردة الواحدة حقها ليرة وبعدين انتو ما بتعرفوا إنه الورد بتركيا بالشوارع مش زينا، همه الورد كثير رخيص عندهم زي الخبيزة عنا
سالم : يمه بشوفك ساكتة، أم سالم : هوه انتو خليتو للواحد مطرح .
أبو حمدان : يا خيتي يا أم سالم مش كل إشي بتشوفيه بالمسلسلات صحيح ما يغرك القشور هايه اللي بتشوفيها، شوفي كيف أبو سالم بحبك بطريقة الرجل الشرقي اللي بغار عليك واللي ما ببخل على بيته ولا على ضيفه طلي من حواليك وشوفي قديش احنا العرب عنا حب فاق العالم كله مثلا( المجنون ليلى ) وقيس ولبنى (ابن ميادة ) ووضحه و بن عجلان ، وكل هظولا طرزوا المعنى الشريف والطاهر للحب أي أنا ما بنس أيام الشبوبيه لما كنا نيجي عنده ونغني ( فلفل ماحره فلفل ما حره ... فراق الحبايب ويلي ما مره .
أبو سالم : والغناوه هايه ؛ طلعت عالجبل طخه عطخه ... وطيت بقلبي ما قلت الأخه .
أبو حمدان : أيييوه و على طريق السلط لزرعلك تينه كل ما مريتي تذكريني .
يا ربي ينام الولد وأهز أنا تخته ما هوه كرمال الولد كرمال عيون أخته ، سلمى : يا سلام شو هالكلام الحلو ولا وضحى وابن عجلان هاظا الكلام الحلو اللي بسمعه بطلع منكوا كاين فعلا إنك يا عمي مش قليل ،
سالم :يا ريت الحب اللي كان زمان يرجع هوه بلتام اللي بقول الله أكبر يومنها طلت 16 عقده من ظهري حلت ؛ يا عيني شو يمه بعدك بدك أبويه يقلد المسلسلات التركيه أي والله إنه يجيبلك من شارع الحمام ضمة نعنع تروقي وبعدين يمه شوفي النعنع بتشميه ورخيص الثمن وبتسوي لأبويه كاسة شاي وبتروقي انت واياه بذمتكوا ماهوه أحسن ولا بتنسى عطول بعدين يابه ماهوه نمر ابن عدوان رسم الرومانسيات الأردنية الجميلة ..... ووضحى وابن عجلان اللي رسموا أحلى قصص الحب والهيام اللي كانت أكثر من روميو وجولييت بالروايات .
أبو حمدان : خلونا من هالسواليف وخلي اللي بالقلب بالقلب اااااااااااه يا بعد قلبي شيف بدي ارضيش ؟
أبو سالم: والله إنك جبتها فعلا يا بعد قلبي شيف بدي أرضيش ؟؟؟ والله يا ابو حمدان ما بعرف انك رومنسي لهالدرجه ، عليم الله لو يكون مسلسل رومنسيات (ابو حمدان و ام حمدان ) بدل من ( نور و مهند ) ليتابعوا الكل .
المرأة نصف المجتمع بل فاقت النصف في أيامنا هذه فلا أعتقد أن قشور المسلسلات التركية قد ترضي المرأة الأردنية، وخاصة أنها تنال كل الاحترام والتقدير حتى في الدستور الأردني فهي التي شغلت جميع المناصب في شتى المجالات؛ ولا تزعلن ضمة الخبيزة ولا النعنع بتظلها أفيد وأحسن والورد بظل للشم وكل وردة مزروعة ببستان أو مكلله بجلال أوطالعة بين الطيران هي بمثابة هدية شخصية لكل امرأة أردنية .
وإلى اللقاء --------------------------------------------------------مع يوميات ابو حمدان
!!!!!

Hikmat_b@yahoo.com