و الله يا خالتي بحبلِه

بقلم: شفيق الدويك - هيوستن

 

 بتفكر الناس يا خالتي الأمور عند غيرنا مش متكتكه  ؟ لا و الله.

 

هاظا يا طويل العمر و السلامه إبن جارنا راح عأميركا زيارة يشوف أخته و رجع من يومين، و سمعته بيحكي كلام غريب و عجيب و صعب الواحد يصدقه.

 

ماسكين واحد هناك، يعني بأميركا، من عشر أيام عمره 22 سنه بنطلونه ساحل ببلد أسمها ممفيس لأنه دخل محل و كان بنطلونه ساحل و ما رظي يرفعه، و إتهموا تصرفه إنه أعوج،  يعني مش محتشم، و أجبر الناس تشوف حاجه مش لازم تشوفها، يعني ملابسه الداخليه عدم المؤاخذه.

 

يومها كان واحد من إللي في المحل يصرخ عليه و يقول: هاظا إشي بقرّف، إرفع بنطلونك. ليش عملوا لحزام يا رجل ليش ؟ مش عشان ترفع بنطلونك ؟

 

والشرطة يا خالتي دخلت المحل و مسكوه لأنه شوية حريم إتصلوا معاها عشان يسحبوه لأنه شكله بقزّز.

 و الله و الشرطة دفّعتُـــــهْ غرامه 500 دولار على عملته السودا. قديش بطلعوا يا خالتي بعملتنا ؟  يعني كثير ؟

 

خذلك هالقصه الثانيه.

 

مديرة مدرسة إبن أخته للشب في هيوستن عندها بمكتبها كذاحبله يا خالتي، و كل طالب مش حاطط حزام ببنطلونه  بتربط المديرة بنطلونه بالحبله بدل لحزام، و يا ويل الطالب إللي بنطلونه ساحل.

 

بصراحه يا خالتي إستغربت من هالقصتين. طب ولادنا كيف إقتنعوا بموظة هالمخسوف البنطلون الساحل و غيرها و غيراتها من الموظات إللي بتقشعر البدن و إللي بيقرف منها الغرب ؟

 

بتعرف يا خالتي: الحق على كل أم و كل أب بيترك إبنه يصير مســـخرة و مش على الأولاد، لأنه الولد أو البنت خطيتهم برقبة لكبار، و إللي بــرُد على ولد و بطاوعُه أنا بعتبره ولد !

 

الله يهدي الجميع، و الله يستر يا خالتي .