ست ساعات كويسات يا خوي يا سومافيا*

بقلم: شفيق الدويك - ميلواكي

و الله يا خوي عقلاتي مش متخلفات، بالعكس أنا باخذ و بعطي في الأمور، يعني عقلي طري، و مش متحيزه مع بنات جنسي، بس الشغله بدها شوية رحمه و عدل يا تبعون حقوق المرأة ! 

طب يا خوي البنت لما بتروح عالشغل طول النهار و بترجع عالدار مهدود حيلها كيف بدها تنظف بيتها وتطبخ لجوزها، و تجامل الناس، و تربي خلفتها و تعطي للبلد جيل قد حالّه كيف ؟ 

ست ساعات للبنت وين مكان عندنا أو في أميركا عدل للبنت و لبيتها و أولادها و البلد و بصير في مجال لغيرها يشتغل. 

أي و الله يا خوي في بنات بتشتغل بمستشفيات أميركا 12 ساعه سحبه وحده يم. أي هاظا مش إنتحار و موت للبنات. الله يلعن ابو المصاري يا خالتي مهي بالأخير وسخ إيادي، و الله لا يسامح إللي بيتعب بنات الناس مين ما كان يكون. 

يعني عشان هالراتب، لا الزلمه ماكل لُقمه مثل الخلق و الناس، و لا الأولاد فالحين بمدارسهم، و ما بشوفوا أمهم تقول أيتام، و لا إللي بتشتغل مرتاحه، يعني صايرات مثل الماكينات، و وجهن بينشحد عليها ! 

بتعرف يا خوي لو بيطلع بإيدي لأعمل قانون دولي يحرّم شغل البنات أكثر من ست ساعات علشان أرحمهن ، مهو جسمهن مبيتحملش كل هاظا التعب و المسؤوليات. 

الله يجازي إللي كان السبب، و الله يستر يا خوي! 

*خوان سومافيا مدير عام منظمة العمل الدولية