حلم العودة

زاد الاردن الاخباري -

أنا شاب عمري 28 سنة، حاصل على درجة الماجستير في علم الحاسوب، طبعاً بعد ما انهيت البكالوريوس، ما لقيت شغل ، و كنتً كل ما أنجح بامتحانات الشركات والجامعات، ينادوني ، يعملوا مقابلة شكلية، وبعدين بتنقطع أخبار الوظيفة، الحمد لله ربنا فرجها بعدين، واشتغلت بأحد جامعات البحرين، و وضعي كثير ممتاز، المشكلة إنه محتار جداً، صراحة انا مليت من غربتي ، أوكي وضعي كويس، بس أغلب وقتي لحالي،عندي أصدقاء ، بس شعور غريب بالغربة والوحدة ملازمني من  حوالي ثلاثة شهور، مع العلم انه هاي السنة الثالثة لي بالغربة، ولازم اختار وأتخذ قرار وحاب اسمع اراء القراء بخصوص هاذ الموضوع،

هل اترك شغلي وأكمل دكتوراة، هاد أول خيار متاح، بس مع العلم إنه لحد الآن ما حصلت على منحة من جامعة، يعني لازم ادرس على حسابي، معي صراحة المبلغ، وهو اللي جمعته في فترة الغربة، بس انا مش حاب ادفع كل اللي معي على الدكتوراة ، لأنه صراحة لما ارجع رح اتغلب مرة ثانية وبدي وقت حتى اجمع نفس المبلغ ، وتكاليف الحياة غالية وحاب اشتري بيت، وتكاليف زواج وغيره، عشان هيك أنا بحاجة للمبلغ اللي معي،

احتمال ثاني: أظل بشغلي واتزوج واجيب زوجتي معي، بس المشكلة انه مع مرور الوقت ما رح اقدر أكمل دكتوراة، ورح أظل محاضر عادي، وبتصير فرصة الرجعة على الوطن مستحيلة، لأنه أعداد حملة الدراسات العليا مش قليل وصعب احصل على فرصة ،

وصراحة انا جداً محتار ، خايف أترك شغلي، وأكمل دكتوراة، وما لاقي فرصة كويسة، يعني أرجع صفر اليدين، لأنه حتى بشهادة الدكتوراة الشغل مش مضمون، وفي صحاب الي كملوا وما لقوا شغل، حالياً أمي جننتني ، لأنه أنا اكبر واحد وبدها ياني اتزوج، مش عارف شو أعمل، إذا ارتبطت ببنت ، صعب أكمل دراستي، وإذا ظليت ، رح ظل مثل ما أنا محاضر وصعب أرجع على بلدي،

ايش أعمل ؟ أكمل دراسة وأجازف، أم ارتبط وأستقر بالبحرين؟ بس كمان حاب أكمل دراستي ، جد محتار، ويا ريت أسمع رأي مقنع و واقعي بهاد الموضوع لأنه قرار رح يغير مسار حياتي. وشكرا للجميع.