ما الحل في رأيكم ؟؟

زاد الاردن الاخباري -

مرحبا

انا أرملة من 7 سنوات وعندي 3 اطفال وبنت جامعية

زوجي توفي وما تركلي شي بإسمي الا بيت في عمان

مع العلم انه عنده اولاد من زوجة اخرى ... 8 اولاد وبنتين ....طبعا كلهم متزوجين وعايشين برا الاردن ووضعهم كتير مرتاح

انا هلا ساكنة في قرية في بيت بإسم أم زوجي المتوفية
وفي ارض كمان (زراعية) بإسم أم زوجي

وزوجي اله اخ واحد ... وهو شريك معنى بكل شي

هلأ انا اصلا مو من الاردن
جيت عالاردن بس تزوجت وكان عمري 20
بالاول كنت ساكنة في عمان وبعد وفاة زوجي صارت حياة القرية كتير صعبة علي ... كتير ناس نصحوني ارجع بلدي بس انا قررت اضل واتحدى واربي ولادي ....

بس هلا مو قاردة اتحمل معيشة القرية .... حتى اغراض البيت ما بقدر اطلع اشتريها ...علمكم بالقرى الناس بس فاضية تحكي عبعض ...ومستنيين الواحد على غلطة

 

 

والجيران متل العمى....حتى انا ما بتدخل بحدا  بالمرة....

مع اني مو متعودة على هيك ...ببلدي ما كتن هيك عايشة وحتى بعمان ما كنت هيك ...
كان هدف زوجي الاساسي لما جينا عالقرية انه يكون عند قرايبه ... بس هلأ انا حاسة حالي عايشة وحيدة ...حتى قرايب زوجي ما بيسالو عنا ... ولاد عمه جمبنا ما بيحكولنا مرحبا .....كتييير حابة اخد ولادي ونرجع نسكن بعمان..... حتى ابني الصغير ما بطلعه بخاف حدا يعمل فيه اشي ....ابني الكبير كمان بخاف عليه (عمره17) ... حتى بنتي اللي فالجامعة لما يكون عندها محاضرات متأخرة بكون مرعوبة خايفة يصير فيها شي .....

كتير ناس بيقولولي ارجعي عمان أحسلك ....

بس انا لو رجعت عمان رح أخسر البيت اللي انا فيه في القرية لانه ولاد زوجي الاكابر اللي مو محتاجين شي ما حدا فيهم راضي يتنازل عن حقة ....مع انهم لما كان ابوهم عايش ما كانو يسألو عنه بالمرة ...

حتى الارض اللي الي فيها انا وولادي وكان زوجي يدير باله عليها بحياته ، ماسكها واحد من قرايبه وحتى مو عارفة اضمن حصتي عشان اربي فيها ولادي ...لانه عم الاولاد واقف معه ....طيب حتى حقي مو عارفة اخده ؟؟!!!!

 

وحكيت مع اخو زوجي كتييير عشان يقسمو الميراث وكل واحد ياخد حصته .... بس لا حياة لمن تنادي !!!
كإنهم بيتعمدو يعملو هيك عشان يطفشوني ؟؟!!

انا والله مو فارقة معي بس على شان ولادي اللي ضيعت عمري عليهم ومستعدة اضيع عمري الباقي كله عليهم ....

بيتي اللي في عمان مأجر وهيني بصرف عولادي من أجاره وعم الاولاد بيساعدني كمان بس ...
شو أعمل ؟؟
اضل متحملة عيشة القرية اللي عنجد نفسيتي تعبت منها !!

ولا أرحل واخد ولادي ونعيش في بيتي اللي في عمان اللي انا هلا بصرف من أجاره عولادي ؟؟!!

بيحكولي انه ازا رحلت ممكن يطلعلي راتب من المعونة الوطنية !!!

شو اعمل والله تعبت ؟؟؟؟