هل طلبي للطلاق منطقي ومبرر ؟

زاد الاردن الاخباري -

الى قراء زاد الاعزاء ارجو منكم مساعدتي لاتخاذ قرار بخصوص حياتي

انا امرأه متزوجة من سنتين وشهرين يعني داخلة على سنة ثالثة زواج زوجي طبيب  وانا مهندسة عمري 26 سنة ، لما تقدم زوجي لخطبتي دخل من باب الدين والالتزام فوافقنا وتم الزواج وكان بطريقة تقليدية ما كنت بعرفه قبل الزواج صارت مشاكل بفترة الخطبة واللي استمرت 3 شهور ، كان يفتعل مشاكل على اقل سبب ،بعد الزواج تلخصت مشاكلي معه بالآتي :

1-بدات مشاكلنا عالمصاري من اول يوم ، طلب مني نقوطي ، المشكلة انه اهلي بدهم يشترولي فيه دهب وما كنت قادره احكي لاهلي انه طلب النقوط عشان صورته بنظرهم ، طبعا بعت الدهب اللي اشتروه اهلي من مبلغ النقوط اله لما انزنق ماديا طبعا هي مش زنقة لانه طبيب وراتبه ممتاز ومع ذلك كان مصروف البيت من اكل وشرب وفواتير علي انا ادفعه من راتبي اللي كان عبارة عن 250 دينار  ، بحجة انه عليه ديون ولديون مش كتير كبيره  .

2- كان بده ناجل الخلفة سنة بعد الزواج بحجة الديون وعلشان ننبسط بالحياة على رأيه ، طبعا كان عامل فحوصات قبل الزواج وعارف انه عنده مشكلة بتاخر الخلفة وحكالي عنها قبل الزواج ب 5 ايام وحكالي انها مشكلة بسيطة وعلاجها سهل  ، بعد الزواج اجلنا الخلفة سنة ، وبعد ماخلصت السنة صار بده ياجل كمان سنة ، واخر شي عمل فحوصات ولقي انه وضعه من ناحية الخلفة سيئ جدا وهلا العلاج صعب وما بيزبط الا طفل انابيب ، وعلشان نساوي طفل انابيب لازم انا ابيع دهبي يعني ماعنده استعداد انه يجمع جزء من ثمن عملية الزراعة وانا الباقي انا اتحمل المبلغ كامل ، مش اول مرة يطلب انه ابيع الذهب اللي من مهري طلبه بعد 3 اشهر من زواجنا بحجة انه بده يسد ديونه ، وانا رفضت ابيعه لاني ما شفت في داعي وحسيته بيضحك علي وبيستغفلني وطبعا وقتها اخد مني موقف ولليوم ما بينساه

3-بيكره اهلي ، دائما بينتقدهم وبيغلط على امي والدي بيسبهم ، ما بيحب يجوا يزوروني ، عمره ماعزمهم او اكرمهم مع انهم ياما عزموه ، دائما بيجيب سيرتهم بالعاطل امامي

4-مافي شي بيصير بيني وبينه الا بينتقل لامه وخواته ، كل شي بيصير معي او مع اهلي بتفاجا انهم بيعرفوه ، وانا بنخنق مش عارفه كيف يضل سري ببيتي ، عدا عن انه لما يجوا اهله عنا بيكره اني ارتب البيت ،حتى مابيحكيله اي ساعة بدهم يوصلوا علشان اجهز حالي واجهز بيتي واذا كنا عازمينهم يكون الاكل جاهز عالوقت واذا بسأله اي ساعة بدهم يوصلوا بيعصب علي مع اني والله بيشهد مابكره يجوا على البيت بس لاني موظفة وقتي ضيق فبحب اذا بده يعزمهم يخبرني قبل بوقت علشان ارتب بيتي واجهز الاكل ، طبعا اذا عزم اهله هو بيختار شو بدنا نطبخ ودائما كبسة صرت عازمتهم 20 مرة كل مرة كبسة مع اني بعرف اطبخ جميع الاكلات وطبخي طيب بشهادة الناس اللي بيذوقوا اكلي بس مش عارفة ليش هيك بيعمل، طبعا هو فوضوي جدا بيكون البيت مرتب ونظيف ما بعرف كيف بيقلبه.

5-مابيحب يطلع من البيت نتفسح او نشم هوا 24 ساعة قاعد بالبيت بيحضر تلفزيون ، 

بيصير يتخوت علي ويقارن بيني وبين الممثلات والمذيعات،وبيمدح فيهم قدامي انا الحمدلله شكلي مقبول ، حاليا قررت اشتري تلفزيون لحالي في غرفة منفصلة لاني تعبت منه بدي شي اتسلى فيه ، للعلم هو مابيخليني اختلط بحدا من اهله الا مع امه وخواته مابيخليني اكون موجوده لما يكونوا زوجات عمامه او قريباته من بعيد موجودين او حتى نسايبه مابيزورهم ولما حماتي تروح تزورهم ما بيخليني اروح معها مش عارفة ليش مابده اياني اختلط فيهم

بفكر بالطلاق بس بيخطر ببالي انه لسه الي 5 خوات ما تزوجوا خايفة طلاقي ياثر على نصيبهم بالزواج ، كمان خايفة من اهلي بعرف انهم رافضين فكرة الطلاق ، وامي من النوع القاسي جدا(بتكره البنات) يعني مارح تحس فيني اني انظلمت بزواجي بالعكس رح تحملني مسؤولية فشل الزواج مع انها بتعرف طباعه وبتعرف اني انظلمت معه ، كمان هو دائما بيلمح انه مابيطلق لانه مؤخري كبير 10000 دينار وبيلمحلي بالمزح والجد انه اخلعه احسن لانه مارح يطلقني

من جانب ثاني بسمع عن سيدات تحملوا اكثر مني ظلم واهانة وضرب فبحكي انه انا لسه احسن منهم وخايفة اخد قرار بعدين اندم عليه خصوصا اني مارح اسلم من شماتة الناس اللي حواليي. ، مش عارفة كيف بدي اخد قرار الطلاق لاني تعبت نفسيا بكرهه وبكره حياتي معه ؟