هل هذه هي الأخوة؟

زاد الاردن الاخباري -

قراء موقع زاد الأعزاء..بتمنى اللي بيقرأ عن هاي المشكلة انه يعطيني حل واقعي و يا ريت بعض المعلقين انه ما يستهزؤا بمشكلتي لأنها فعلا حساسة...

انا شاب عمري 23 سنة و عندي 4 اخوة شباب،بعاني من مشلكة عمرها 5 سنين و هي انه الي اخ شخصيته مخربطة لدرجة انه بيعكس عنا كلنا انطباع بيخلي الناس كلها تعاملنا على اساسه...هادا الاخ اكبر مني ب 3 سنين و ما كمل دراسته بيشتغل في احد المطاعم...خطب 3 مرات و فشل...طبعا انا ترتيبي التالت بين اخواني...لما توفى ابوي كنت احب بنت و علاقتنا كتير ممتازة و اهلها كانوا يعتبروني ابن و سهلوا علي موضوع الزواج و يسروا كل الأمور مع العلم انه البنت كانت بتدرس محاماه و اخلاقها رائعة جدا و جميلة يعني كل ما يتمناه الواحد كان موجود فيها...اخوي ما عجبه الوضع نهائيا و اتهمني اني بدي اتزوج على حساب والدي المرحوم و ضل يشوه صورتي حتى امام اهل البنت اللي بحبها..بس مخططه كان يفشل...وصار يعامل الكل باحتقار حتى والدتي و اخواني صاروا يكرهوه مع انه كنا كلنا بالبيت ايد وحدة و بنخاف على بعض باستثناء اخوي اللي عم بحكيلكم عنه وصل لمرحلة الاكراه يعني صار يكرهنا عيشتنا و صار يعمل اشياء ما حدا بيرضاها بيصدر اصوات بنص الليل من المسجل أو التلفزيون حتى نصحى كلنا و كل يوم مشكلة مع الجيران... وعدوه الأول هو أنا و اي تصرف بعمله بفسره اني بدي اضره حتى لو حاولت انصحه...خطبت البنت اللي حكيت عنها و الحمدلله كانت من اسعد ايام حياتي بس كمان اسوأ ايام حياتي لأنه بعد فترة (اخوي الله يسامحه) عمل مصيبة ما في انسان عاقل بيتجرأ يعملها تمنيت انه لو حرقني أو قتلني و ما عملها...حكا لأهل البنت انه هو كمان بيحب نفس البنت و إنه أنا سرقتها منه...و الباقي عندكم...تجنبا للمصايب البنت فسخت الخطبة و حرمت حالها علي...و ارتاح اخوي و ما عمل ولا مشكلة خلال سنتين الا اشياء بسيطة...مرت الايام والتقيت بفتاة رائعة و بنت ناس و عالم و  خطبت و  تزوجت الحمدلله بشهر 8 الماضي و طلعت سكنت ببيت انا و زوجتي...و من يومها ما هدي و صار يلف على بيوت القرايب و يحكي اني نصبت على امي و تزوجت من ورثة ابوي الله يرحمه...و لسوء الحظ صارت معي مشاكل في عملي و اضطريت ارجع اسكن عن اهلي...و الله لا يحط حدا مكاني...نار الغيرة خلته خلال اسبوع يخطب وحدة ما بقدر احكي اشي غير الله يهديها...و صار بدو يتزوج بالبيت...و ساعة بده ياخد قرض و ساعة بيدعي علي...و كل يوم امي بتنام و عيونها منفخة من عمايله...المهم اتفق هو و اهل العروس على الزواج بشهر 7 المقبل...و كل يوم بيسمعني حكي و انا و الله العظي قادر على ضربه و عمري ما خفت منه  بس و لا يمكن بيوم من الايام واحد يضرب اخوه و خصوصا لو كان اكبر منه مع انه جبان جدا...اخر تطور للمشكله انه صار يستغل اي فرصة من تجمع العيلة و بيروح يطلب منهم مصاري و بيضل يشكي للناس عن معاملتنا اله و أسوأ شي الناس كلها حتى الجيران صارت تحكي علينا و تتجنب اي واحد فينا لانهم بيفكروا انه رح نطلب منهم مصاري...و الله بطل النا عين نزور حدا لانه شوه صورتنا و طلعنا بين العيلة متسولين...بترجاكم احكولي شو اعمل و انا و الله العظيم متأثر لأني بحكي عن اخوي مش حدا غريب بس ما في طريقة الا حاولنا نصلحه فيها و دائما حاقد علي خصوصا انا ارجوكم تحكوا رأيكم لانه و الله بيهمني و انا ما حل ازعل لو في اي نقد...و سامحوني طولت عليكم