هل كل الفتيات هكذا ؟

زاد الاردن الاخباري -

القراء الكرام، انا شاب عمري حاليا 30 سنة، قصتي بأختصار عندما انهيت دراستي سافرت على السعودية للعمل، بعد حوالي سنتين قررت ارتبط بعد ما رتبت أموري، في إجازة الصيف طلبت من أمي وأخواتي يشوفوا بنات لغرض الزواج، طبعا شافوا كثير وآخر شي عجبتهم بنت، ولما رجعت حددوا موعد وقعدت معها وصار في اعجاب متبادل، وشعرت حتى انه أهلها بس بدهم يمشوا الأمور ، وأبوها قال: ترا إحنا ما بدنا منك شي وأعتبروا البنت بنتكو، أنا تفاءلت وقلت شكلهم فهمانيين وبالنهاية ما في داعي لمصاريف زيادة حتى لو كنت بشتغل بالخليج، المهم صار كتب الكتاب، وبعدها بفترة،، إنقلبت البنت وأهلها ، وكان على أساس أرجع بشهر 3 حتى نتزوج ونقعد اسبوعين ونسافر على السعودية، اللي صار انه البنت وأهلها انقلبوا، كثرت الطلبات، وصارت على أتفه سبب تزعل، وأنا صراحة بالي مش طويل وما عندي طولة بال حتى أتحمل دلع البنات، مرة موبايلها على حكيها ( زهئت منو) اشتريتلها واحد جديد هدية، إذا طلعنا سوا لازم تشتري شي ، طقم، مكياج ، عطر ، أي شي ، وكأنه انا بنك متحرك، أو اللي جمعته بسنتين لازم أدفعه عليها كله، مثلاً لو طلعنا على مطعم، بتطلب اكثر من ثلاث او اربع أنواع، لمين كل هاد الأكل ، طبعا كل على الكب ولا بتاكل شي منه ، بس قدام الناس انه الطاولة ممتلئة، واحيانا بتعزم أختها وبنت خالتها وأبصر مين فقط للتباهي، أنا مهمتي الوحيدة الدفع، واللي قهرني أنه بفكروا هي وأهلها انه مش فارقة معي لانه بشتغل بالخليج، صح راتبي قرابة الألفين شهري ، بعد المصروفات واجار البيت والسيارة بظل معي توفير قرابة الاف دينار، بس لو بدي أظل على مصروفها وطلباتها اللي ما بتخلص كل الخليج العربي ما لحق عليها،
قعدت معها قبل ما سافر ، طبعا هاد الحكي الصيف الماضي، وفهمتها انه لازم يكون في شي معقول لمصروفنا ، بالطريقة هاي ما رح يظل شي لأولادنا أو حتى للمستقبل ، نشتري بيت مثلاً ، أفتح شغل بالأردن، أنا حكيت من هون وهي طار عقلها من هون، على انت ما بتحبني، روح شوف كيف الناس عايشة، وانا فوق ما رضيت أروح معك على السعودية، ومن هالحكي، وقلتها وين حكي ابوكي، لما اجيت عندكم أول مرة ، انا بشتري رجال وما بدنا منك ايشي، قالت: انت عارف انه هاد للمجاملة مش اكثر،

طبعاً انا سافرت وتركتها وانا زعلان، وهي زعلانة، اللي حيرني انه عايشة حياة عادية، ليش لما اجت عندي صارت بدها كل شي؟ وبدها اظل ادلل فيها، المهم سافرت، وبعدين أهلي وأهلها على اساس حلوا الإشكال، بس انا ما رضيت نتزوج غير للصيف، وصرنا على التلفون، نزلت قبل فترة اسبوع عشان ازورها، واخذتلها هدايا ب 800 ينار يعني تقريبا كل اللي بوفره بشهر، ومع هيك نفس اسلوب الحكي، وزي اللي مش عاجبها، وزي كأنها ندمانة ، وهي أنا رجعت على السعودية ومحتار، شكلي رح أفسخ الخطبة ، بس المشكلة والله دفعت عليها كثير، الله يسامحها ويسامح أهلها، وكل ما أتذكر حكي ابوها بنقهر،
شو أعمل؟ بدي رأيي مقنع، وين الغلط بكل شي صار؟ أطلقها ، أو اتزوجها على الصيف؟ خايف أتورط أكثر، جد محتار، ويا ريت حد يعطيني رأي مقنع وحل واقعي. وشكرا للجميع وآسف على الإطالة بس من قهري والله. وصرت أسأل حالي هاليومين يا ترى كل بنات الناس هيك ولا حظي انا بس، جد انا متحطم من اللي صار.