بعد طوووول تفكير

زاد الاردن الاخباري -

قراء زاد الأعزاء ....

السلام عليكم ورحمة الله وبركاته ...

أنا عرضت مشكلتي من شي شهر بنفس الزاويه تحت عنوان مصدومه بزوجي وأكيد للي ما قرأ مشكلتي رح تكون واضحه إلو من خلال عنوانها(مصدومه بزوجي)...وطبعاًعملت بنصيحتكم وخبرت أهلي وحكوا مع زوجي بس ما أخدوا منه لا حق ولا باطل...زادت المشاكل بينا مع أنه وعدني أنه رح يتغير بس للأسف كان تغييره للأسوأ...صبرت وتحملت لحدما صار نقاش بينه وبينه وحكالي أنه مش طايقني وحكى حكي كتير سيء بحقي لدرجه أنه أتهمني بالخيانه...

 

طبعا أنا بعد ما سمعت هالحكي جن جنوني وأخدت أغراضي وحردت لبيت أهلي...يشهد الله انه طلعت نفسي منه ومو قادره أتخيله...المهم وأنا حردانه ما كلف خاطره يحكي مع أهلي لأنه هو الغلطان وهو اللي طعني بشرفي وسبني وضليت أسبوع عندهم وما كلف خاطره يحكي ويتفاهم معهم...طبعا كان يبعتلي مسجات ويترجى واعترف بغلطه وحكى معي تلفون وصار يبكي متل الولد الصغير..ومع هيك والله قلبي ما حن مو بأيدي الشرف غالي...بس قلت لما يحكي مع أبوي وخواني بصير خير...وما حكى...طبعاً للعلم حماتي عايشه معنا والزن فوق راسه شغال منها... تفاجئت أنه أستغل وجودي عند أهلي ورحل من البيت لمحافظه تانيه وأخد كل أغراضي ولما سألته قال هاد قراري وحياتي وما حد إله دخل فيي...عز علي كتير تصرفه...وصار يقلي أنه ما بده يشوف أخواني لأنهم مو من مستواه مع العلم أنه أخواني متدينين ومتعلمين ومتفهمين والكل بحلف بحياتهم...بدو إياني من دون أهلي ...أنا وإياه وأمه مع العلم أنه أمه ما بطقيني والغيره رح تموتها كونه أبنها الوحيد...

للتذكير أنا ما إلي 3 شهور متزوجه...ولكن أخدت قراري بالانفصال رغم النصائح من الناس إني رح أندم ,انه المجتمع ما برحم وأنه لساتني صغيره 24 سنه ومن هالحكي بس أنا هلأ بدي أشوف محامي وأخلص منه ..

سؤالي قراري صح ولا غلط؟؟؟؟؟