اريد حلا .. محبط جدا

زاد الاردن الاخباري -

أنا شاب عمري حاليا 29 سنة، مشكلتي أنني محبط جداً وكرهان الحياة كلها، من حوالي سنتين ما ضحكت من قلبي، مشكلتي انه بدأت من ايام التوجيهي، كنت شاطر بالمدرسة بس صابتني حالة نحس وما ركزت بدراستي وأمتحاناتي،المهم ما حصلت على معدل كويس ، سجلت موازي رغم انه مكلف ،و والدي باع أرض لحتى درسني، وسجلت حاسوب، المهم بعد ما تخرجت، ما كان معي واسطة مثل كل صحابي، ما تركت شركة أو مكان وما قدمت إليه، بعد حوالي سنة رضيت بالأمر الواقع واشتغلت مندوب مبيعات، وهي حوالي 4 سنوات وانا مندوب مبيعات، تركت تخصصي، وكل خبرتي ما بتفيد بشي، أي واحد ما معه شهادة أصلا بيقدر يشتغلها، وأضافة أنه يا دوب اللي معي مكفيني، يعني بس مصروفي الشهري، وعمري صار 29 وانا مكاني، بجوز ما حدا يشعر بس أنا مقهور على حالي، كيف صار هيك، وين كنت وين صرت، وبصراحة انا انصدمت من واقع الحياة، هل أنا فاشل؟ شو اللي صاير بالزبط مش عارف، والله زملاء كانوا معي، كانوا أغبياء بالدراسة وحاليا مستلمين مناصب ، وبشوف زملاء نجحوا وانا بعتبر حالي فشلت ، بنقهر على حالي مش حسد لا سمح الله ، بس ولا شي من أحلامي تحقق، وانا مجرد مندوب مبيعات، ومرت بفكر لو أتزوج، رح أتبهدل أكثر بالحياة، فعلا أنا محبط ومش عارف شو أعمل وأين المخرج من مشكلتي.