يا حيف على .. هيك نتائج توجيهي

بقلم : حكمت محمود البشير
من المؤكد أننا مازلنا جميعا ننتظر في غرفة العمليات على أمل أن يكون المولود ذكرا حيث أننا قد أخبرنا بأنه ما زالت العملية القيصرية في مراحلها الأخيرة حيث ما زال الجميع بانتظار الخير والسلامة للجميع دعونا نرى ماذا حل باليوم المشؤوم يوم النتائج(نتائج التوجيهي) ويا للفضيحة .
خلونا نشوف الشارع الأردني ،أبو حمدان كان لهذه الأحداث بالمرصاد !!!
حمدان:يابه ترانا اليوم رايحين نتغدى عند خالتي أم فريد. وتعالوا شوفوا شو صار عند الخاله أم فريد
أم حمدان : الو مرحبا يا خيتي شو صار بالنتائج ؟ الحمد لله فريد ناجح وجاب (59) أبس هاذا مش معدله الحقيقي يله تعالوا تغدوا عنا، أم حمدان : يله ياولاد خلصوا خلينا نروح عند خالتكوا فريدة ولما يوصلوا عند فريدة بلاقوا المناسف جاهزه ولكن ؟؟ ياخساره شوفوا أم فريد كيف تحولت حالها وصارت بالمستشفى ؟؟ قال شوه بيقولوا النتائج بيها غلط وسحبوا القرص الممغنط من المواقع الإلكترونية وهيها هسا فريدة مش صا حيه ودخلوها غرفة الأنعاش يابه الحق خالتي تراني خايف على أمي كثير خايف إنها تلحق خالتي يا ربي دخلك .
حميده: يابه عمتي منيرة بنتها سميرة جايبة نتيجتها ويا حرام طلع عليها خمس اكمالات وبيه واحد منهن ما قدمته وكيف حطولها اكمال ؟ تعال يابه حالا الوضع مش متحمل ؟
أبو حمدان : أنا يابه عند دار جيرانا أبو جورج ، حميده . يابه منته سيد العارفين مين الأولى اللي عنده نزيف ولا اللي عنده كسر ؟؟؟ أبوحمدان : يابه يا حميده ماهمه هظولا لا كسر ولا جبر الله يصبرهم أول اشي قالوا إنه جورج جايب سبعة وتسعين وبعد الإزاحة صار الولد مصفرن كلهن كمالات والله يابه لو تشوفي المشهد ناس بقع وناس بصحى الله يسامح اللي كان السبب أي هوه أنا منوين بدي القيها من الجيران ولامن الخوات ولا الأخوان ألله أكبر وين صارت ؟
الواحد بغلط بنتيجة واحدة قولوا ثنتين مش بالمملكة كاملة( مية وأربعين قلب بني آدم)
أبو سالم مسكين صار عنده توقف في ضربات القلب ونقلوه عالمستشفى لأنه ابنه سليمان من الأوائل وياويلي عليه مش داري عن حاله هوه ناجح ولا راسب وهيه يا ويلي عليه من مركز لمركز انترنت داير وعلى الله انه يكون ناجح وأخر المطاف قد ما داخ قالوا إله روح على المديريه وجيب النتيجة الورقية ويا ريت لما راح لقى النتيجة الورقية وبعد هيك صارلازم يراجع الوزارة وشو بيقول الوزير؟ قال ايش النتائج كلها صحيحة والقرص الممغنط تم سحبه من الأسواق ولحد هسا بعدنا بنستنا ويا ريت صاير اشي وبعدنا على حطةايدك الواحد مش عارف راسه من رجليه ويا هملالي عاد أبصر منوه الصادق الواحد محتار يصدق مين ولامين الواحد بده يتكل على رب العالمين لا على مدير؟! ولا على وزير؟! لكن حسبي الله ونعم الوكيل لأنه اللي تصرف هيك تصرف ما عنده قلب ولا ضمير أبس الجبر على الله .
أبو حمدان : يا جماعة توكلوا على الله لويش بتسوو بحالكوا هيك ما انتو عارفين كل الوزارة طول بعرض مش عارفة تطلع نتائج يا حيف على هيك نتائج وعلى اللي تسبب بربكة العالم ونزع فرحتها الله يسامح اللي كان السبب، القضية يا عمي ما بتنحل بيوم وليلة الوضع أصعب من انه يتصلح بيوم وليلة خلص اذا التوجيهي فقد مصداقيته هاظا لعاد كيف الجامعات يا فضيحتنا بين العالم قال ايش بعلقوا علينا بالفضائيات ( هذا وقد أعلنت النتائج بالأردن وكانت على النحو التالي
1- أن نسبة النجاح الله أعلم 2- الطالب الذي يتوقع أنه نجح يجد بأن نتيجته هي راسب 3-الطلبه الذين لم يقدموا مستويات معينة قد ظهرت لهم نتائجهم بمواد لم يتم أخذها 4- هذا وقد تم ازاحة القرص المدمج وأخيرا تم تحويل الطلبه وأهاليهم إلى المستشفيات الحكومية مع مطالبة رفع الكشفية لأن حالتهم غير طارئة وبناء عليه فقد تم تحويلهم إلى المستشفيات الخاصة ليصار إلى انتظار تحسن صحتهم لأن يتم اعلان النتائج النهائية بعد التحقيق وأخيرا لم يتم اعتماد النتائج ليصارإلى اعتمادها من قبل مجلس التعليم العالي ( معكم من المملكة الأردنية الهاشمية محدثكم وجعان مش نعسان من قلب عمان ننقل لكم الحدث وما زلنا على تواصل لحين اجراء عملية القسطرة والفلترة وبنقول الحمد لله على سلامة اهالي طلبة التوجيهي‘كل هذا بدون تعليق
هذا وقد أعلن الوزير اعتذاره للمجتمع الأردني.وكل هاظا قال شوه ،أسف ويا عيب الشوم .

الى اللقاء مع ....... يوميات ابو حمدان في حدث اخر .............. انتظروا

Hikmat_b@yahoo.com