اريد حلاً /خطأ قاتل

زاد الاردن الاخباري -

انا فتاة عمري 26 سنة، اتعرفت بالشغل على شاب ، و كان في تبادل بالأعجاب ، لحتى يوم اجا صارحني انه بحبني وبده يتقدملي، بس كونه ما معه فلوس رح يتأخر شوية، وانا من معرفتي فيه وبراتبه قدرت وضعه، المهم بهاي الفترة تقدملي شاب ثاني، زواج تقليدي، بعث اهله وشافوني وبعد فترة اجا هو، انا صراحة ما حبيته ولا كرهته بالبداية، شاب انيق ومحترم معه ماستر، وبشتغل بجامعة بالسعودية، المهم انا أبوي أصر انه اخذه وكمان أمي، انا كنت مترددة ،مش لأنه الشاب مش كويس، لأ ، لانه كنت متعلقة بالشاب اللي معي بالشغل، ولما حكيت للشاب اللي معي بالشغل قال :

الله يوفقك وشوفي حياتك، ورجع بعد يوم قال انه ارفضيه، المهم انا وافقت على العريس، بس اشترطت انه نخطب دون كتب كتاب ولما يرجع على عيد الضحية بنعمل كتب كتاب وحفلة، لانه بعد عيد الفطر رح يرجع على دوامه، المهم خطبنا ، وانا مترددة، وحكيتله من اول اسبوع انه انا ندمانة وانا بحب شاب معي بالشغل وعملت هيك لانه بخاف من ابوي، المهم الشاب طلع راقي جدا وقال خلينا نمثل عليهم انه مبسوطين ولما ارجع على عيد الضحية بنحكي انه ما اتفقنا او انا بضع اسباب من طرفي عشان ما يحكوا انه انت رافضة، وخلينا نكون اصدقاء مش مخطوبين، المهم استمرت علاقتي فيه من حوالي شهر، واكتشفت انه انسان رائع، محترم،صاحب دين، ورغم كل شي حكيتله ياه بظل يسأل عني، صرت استنى لما يحكي، واشتاق لكلامه، واستنتجت انه فعلا انا حبيت هالأنسان الشفاف والراقي، طبعا الشاب اللي معي بالشغل بقلي انه بس تتركوا انا رح اتقدملك، بس انا مش عارفة شو اللي صارلي ، صرت فكر فيه- لخطيبي- بكل الوقت، ولما يجي عنا اركض عليه مثل الصغار، وحاليا انا حابه اظل معه، بس انا عارفة انه مجروح مني، وخصوصا انه حكيتله انه في شاب بالشغل بده يتقدملي، مش عارفة كيف أصلح خطأي وانا جد دايما بالليل ببكي، كيف مرت الاحداث هاي خلال شهر واحد بس. بدي راي حكيم كيف اتصرف.

أرجوكم.