انا وأختي .. ما الحل

زاد الاردن الاخباري -

مرحبا جميعا كل عام وانتم بخير وينعاد علينا وعليكم بالصحة والهنا والله يريح بالنا وبالكم ويغفر ذنوبنا وذنوبكم
بصراحة انا مشكلتي غير عن كل المشاكل هون حسب ما لاحظت يعني لا هي حب ولا هي غرام
انا عمري 18 سنة بدرس بالجامعة طبعا سنة اولى تخصص طيران بدولة غربية ..

المشكلة انو انا عندي اخت توأم وطول عمرنا بنعمل كل شي سوا بنلبس نفس اللبس ونعمل نفس التسريحة وبنتشارك بنفس الغرفة و اللابتوب وحتى الاكل بناكل بنفس الصحن غير عن كل اخواتي واخواني ..

المشكلة يا اخوان بدت من شي سنتين بدت اختي تغار من كل شي يعني بس بطلع عرحلة مع بنات خوالي و اشتري شي جديد من مصروفي بتزعل وبتحرد وبتحكي انو اهلي اعطوني وبدت تختلق المشاكل الي ما الها طعمة ..

الامور ما وقفت عند هيك لانو انا من صغري كنت بحمل بدرس هندسة كيمياء وهي كانت تحلم بالطيران وغرفتنا عاملتلها ديكور طيارات والوان زرقاء على صفرا وحتى لسبها و شكلها يعني كان حلمها كثير كبير انها تصير طيار لكن باخر سنة دراسة تعرفت على شب من الزعران تبع المدرسة الي ما بهمو غير يلاحق بنات و يبعث مسجات وهي انجرفت ورا كلام الحب والغرام وبدت تنسى هالحلم و تفكر بالزواج وما بعرف شو والله يا اخواتي حاولت معها كثير وخبرتها انو التوجيهي بس سنة لكن هي مصيرية وبعد الجامعة تحب على كيفها بواحد الو قدر وقيمة لكن لا حياة لمن تنادي وكانت تقلي انت غيرانة مني لانو ما حدا بحبك بالمدرسة لانك غريبة وما بعرف شو من هالكلام الي يسم البدن

على العموم لما طلعت النتيجة كانت الكارثة العضمى كان معدلي اكبر من معدلها وسجلت بالطيران و هي سجلت ادارة اعمال سبحان الله انا اريد وانت تريد ويفعل الله ما يريد حاولت افهمها هالمعنى لكن بدون فايدة و ظلت حاقدة علي وانا تغربت عبلد تانية وكنت دايما بسال عنها وبشتاق الها كثييير بس هي ما كانت ترد علي ولا تحب تحكي معي

ولما رجعت لقيت عمتي بالبيت بنفس اليوم وكانت اختي جالسة معنا و قالتلي عمتي \"حلويتي كثير ما شاء الله وانا بدي اخطبك لابني ترى ها ابني دكتور قد الدنيا \" فانا ضحكت وسكتت وطبعا ما كان شي من الزواج في بالي لانه موضوع مفروغ منه انه بعد ما استقل بحالي وبحياتي مش وانا ما فقست من البيضة بعدني وحسيت اختي ساعتها غارت اكثر ولا ما بعرف شو لكن حسيتها راح تبكي فرحت احكي معها بالمطبخ وهي بتجلي والله بيشهد ما كان قصدي اني اجرحها ابدا و قلتها شو صار بهاد الزعران فلتنة من لساني وهي بدت تصرخ وتلطم وتحكيلي انت ولا شي وبدك تجرحيني وبس وانتو بتكرهوني والكل بحبوكي وانا لا وما بعرف شو حتى اني حسيت حالي بفيلم هندي وراحت على غرفتها واه لو تعرفو شو ساوت راحت اخذت حقنة انسولين بجرعة مضاعفة و كانت راح تروح فيها لولا ستر الله وطبعا بابا تغيرت نفسيتو وماما كمان بعد هالوضع والله يا اخوان ما بقدر اعيش من دون اختي هي كل حياتي الله بيشهد اني ولا شي بدونها اصلا ما بتصور حالي غير وانا بفكر فيها وهي ما بدها تفهم هالحكي انا خايفة ترجع تساوي بحالها شي والله بروح فيها وبحس اللوم كلو علي والله بجن لو لا سمح الله صار فيها شي او ماتت منتحرة تعبت وانا بفكر بطريقة احل فيها القصة بس ما في فايدة حتى اليوم ما حكت معي ولا كلمة وكل ما بتشوفني جاية صوبها بتروح بعيد بصراحة كنت بدي احكي مع اهلي انو ناخذها على طبيب نفساني بس خفت هي تكرهني اكثر وانا متاكدة انو اهلي ما بوافقو لو شو ما صار
بتمنى انكم تساعدونا والله يجازيكم كل خير