زوجة اخي

زاد الاردن الاخباري -

السلام عليكم و رحمة الله و بركاته وكل عام وانتم بالف خير
بصراحه حابه اعرض مشكله مو الي لكنها بتخص اخي الكبير وانا كللي امل في ان تساعدوه

باختصار اخي متزوج من 4 سنوات من امراه سليطة اللسان بكل معنى الكلمه اخي طبعه هادئ جدا لكنها تستغل ذلك بانها دائما تصرخ وما بعجبها العجب و بتحكي معو بصيغة الامر ودائما صوتها طالع حتى برمضان ما بسلم من لسانها و بتصير تسب و تحكي كلام مو منيح وبتدعي على اخوي علما والله انو اخوي مش مقصر معها عندها سيارة اخر موديل و بعطيها مصروف و مش بعينها وكل ما بنحكيله استخدم نفس الاسلوب بحكي على الفاضي بجاوبها و بحكي معها لكن بتزيد و بتعند بزياده

اليوم مثلا عملت مشكله من ولا اشي و زعلت وصرخت وحكتله ما بدي اطبخ انا مو خدامه بدها تعمل كل اللي بدها اياه و اخوي يضل ساكت والمشكله انو عندو ولد و حكى اخوي والله لولا الولد لكان طلقتها من زمان
مرت اخوي مو متلنا ابدا ابدا شايفه حالها عليه علما انها مو متعلمه واخوي وضعه المادي احسن منها بكتير و اخر مرة طرها من البيت حكتلو انت اطلع هدا بيتي مو بيتك؟؟

والله اخوي تعب منها استخدم كافة الاساليب لترويضها لكن على الفاضي اسلوب الحوار ما نفع اسلوب التهديد ما نفع اسلوب المسايرة كمان ما نفع باختصار مرت اخوي حاله مستعصيه جدا غير هيك مهمله في بيتها كل اسبوع بتجيب الشغاله لتنضفلها البيت علما انها اعده بالبيت لا شغله ولا عمله طول الوقت تلفونات و اعده على النت اخوي فصل النت عنها جكت مع الشركة من وراه ورجعوه حرمها من الموبايل راحت من وراه اشترت موبايل و كرت جديد والله يا جماعة احنا كمان تعبنا منها واخوي حالته النفسيه سيئه جدا مع العلم فترة الخطبه كانت ملاك هادي كلها ادب لكن بعد الزواج انئلبت 180 درجه وابنها صار عصبي متلها مع انو عمره 3 سنوات لكن دائما بصرخ و ببكي من صوتها
اخوي تعب واحنا تعبنا من هالزوجه المتسلطة ساعدوني وساعدو اخوي شو ممكن يعمل ليرتاح واحنا نرتاح .

بعتذر اني طولت عليكم لكن انا ما لئيت غير هالموقع لاطرح مشكلة اخي حتى تساعدونا