شو اعمل ساعدوني

زاد الاردن الاخباري -

السلام عليكم:

مشكلتي مختلفه عن ما نقراه بهذه الزاوية لانها عملية جدا:

انا متزوجة عمري 30 وعندي ولدين عمر 5 سنوات و4 سنوات خريجة كمبيوتر.منذ تخرجي عملت بشكل متقطع لا يزيد عن اربع سنوات وتوقفت عن العمل لاني كنت اسكن بمحافظة والمدارس المرتبة والتي تعطي راتب كويس بالعاصمة وكنت احسبها الاقي الطلعة من البيت مش مستاهلة خصوصا انو بيت حماي لم يتعاونو معي ابدا بالرغم من وجود صبايا ببيت عمي غير حماتي الا انهم رفضو ابقاء اولادي نظرا انو ما بدهم شي يربطهم حتى لو بفلوس.ما بدي اطول عليكم قبل سنة ونص الله عز وجل بعتلي شغل كمبرمجة بالبيت فري لانس ما بحكي انو سهل بس الدخل صافي تقريبا 300 بدون اي مصاريف اخرى المهم بعد بشوي اتفقت انا وزوجي نشتري بيت بالعاصمة لنقرب من كل اشي وعلى شرط اني اساعدة وهيك صار.....بس بعد فترة سنة بالزبط من شراء البيت مرضت مرض لحد هلا ما حدا بيعرف شو هو اعراض كتيرة وما حدا عارف يشخص اشي بس اللي مبين لهلا هشاشة عظام لانو فيتامين دي عندي كتير منخفض وصرت بميل للنوم كتير ودايما تعبانه.بعد ما مرضت بشهرين ونص يعني من اسبوعين تقريبا طلعلي تعيين معلمة بالتربية وبمكان ما بياخد 15 دقيقة عن بيتي داومت اول يوم واعطوني توجيهي واول ثانوي روحت عل البيت نمت من اول ما روحت لتاني يوم وقررت اترك الشغل بس ما بعرف لما صحيت ولقيت ولادي بالروضة والبيت فاضي حكيت ما بعرف اترك الشغل ولا لا .علما انو مستحيل اترك شغل البرمجة الفري لانس وهيك بيكون لازمني خدامة اسبوعية عل الاقل وغير صحتي اللي بدها وقت لتصير زي اول وغير روضات الاولاد وغير مواصلاتي انا يعني رح يضل من راتب المعلمة 100 دينار .سؤالي بعد طول هالسيرة شو اعمل ساعدوني.